Nokre hendingar frå det vi kan kalle kyrkje og kristenliv set ditt preg på denne perioden. Frå og med 2014 skulle til dømes konfirmasjonen i Ulstein kyrkje flyttast frå mai til september. Det var eit fulltallig sokneråd bak vedtaket. Målet var å heve kvaliteten på konfirmantundervisninga.
Atle Hopland heldt si siste jul som sokneprest i 2010. No skulle han pensjonere seg. Han hadde stått i tenesta frå 1982. Kanskje såg nokon det som ein lagnadsironi at han som hadde vore kvinneprest-motstandar, skulle bli erstatta av ei kvinne. Søndag 9. januar 2011 tok ein rørt Atle Hopland farvel med kyrkjelyden då han heldt avskilsgudstenesta. Den nye soknepresten vart Margit Lovise Holte. Ho var på plass i den nyoppussa prestegarden i slutten av juli 2011 saman med mann og born, og tok fatt på tenesta i starten av august. Den nye presten kom flyttande til Sunnmøre frå Bærum. Gjennom lokalavisa retta Holte ein stor takk til kyrkjeverje Olav Sæter som hadde stått på for å få prestebustaden innflyttingsklar. Søndag 14. august var det innsetjingsgudsteneste i Ulstein kyrkje for Holte, som opphavleg er frå Folkestad i Volda kommune.
Michal Møgster sa opp stillinga si som sokneprest i Hareid og heldt si avskilsgudsteneste 21. august 2011. Han hadde også blitt godt kjend og likt av kyrkjelyden i Ulstein. No hadde biskopen funne ei løysing. Jens Terje Johnsen, omstridd og populær prest i Herøy, hadde blitt løyst frå oppgåvene sine der og skulle fungere som prostiprest. Fellesrådet i Hareid likte ikkje prosessen rundt tilsetjinga av Jens Terje Johnsen og klaga i eit brev til biskopen. Etter ei tid med intern uro valde Jens Terje Johnsen i oktober 2012 å trekkje seg som prest i Ulstein prestegjeld.
I mars 2013 takka Ruth Eva Sollie (26) ja til soknepreststillinga i Hareid. Samtidig fekk ektefellen Kristian Myklebust ei kombinert stilling som prest på Ytre Søre Sunnmøre og ungdomsprest i Hareid. I midten av august var det nye presteparet på plass. Det vart eit nokså kort opphald i Ulstein prestegjeld for dei to. I mai 2015 sa Ruth Eva Sollie opp stillinga si for å verte ny sokneprest på Vartdal. I starten av november 2016 vart Leidulv Grimstad innsett som sokneprest i Hareid.
Men før dette er det visitas i Ulstein sokn i november 2011. Denne gongen er Ingeborg Midttømme biskop. Sidan visitasen i 2002 hadde det skjedd store endringar med tanke på mellom anna tilflytting og folkevekst. Dessutan hadde Eiksundsambandet eksistert sidan 2008.
Ulstein sokneråd hadde hausten 2011 vedteke ein visjon for kyrkja: «Ulstein kyrkje – saman på ferda.» Dette skulle vere grunnlaget for mykje av arbeidet i kyrkja. Visitasmeldinga fortel om eit sokn prega av sterk tradisjon: Utanom sommarferien har Ulstein kyrkje gudstenester kvar søndag, og dei er godt besøkte. I 2010 var 242 gjennomsnittet på hovudgudstenestene, noko som gav Ulstein ein åttandeplass mellom dei best besøkte kyrkjene i landet. I denne samanhengen nemner soknepresten songtradisjonen og den gode songen i kyrkja, vakker og sterk. Det er elles stor vilje i kyrkjelyden til å verke med i gudstenesta.
Frå november 2011 byrja Ulstein kyrkjelyd med ny tekstbok, ny dåpsliturgi og nokre forsøk som skulle ende i lokale ordningar i løpet av 2012. Mange i kyrkjelyden såg fram til endringane med glede.
Den kyrkjemusikalske verksemda i Ulstein femnde på denne tida breitt som tidlegare, med korarbeid, konsertar, gudstenester og kyrkjelege handlingar som nedslagsfelt. Soknet har sitt eige musikk- og kulturutval som legg planar for arrangement og handsamar saker under ansvarsfeltet til kantor Ståle Helvig. Som ein del av stillinga hadde Helvig hatt ansvar for fleire kor: kyrkjekor for vaksne og to aldersbestemte barnekor.
Så arrangerer Ulstein kyrkje Torsdagskveld på Fredheim for vaksne – i samarbeid med NMS og Ulstein KFUK-KFUM om lag ein gong i månaden, anten som bibeltime eller temakveld.
Barne- og ungdomsarbeidet i Ulstein sokn var framleis allsidig. Frivillige dreiv mellom anna ungdomsklubben Adventura, speidararbeid og ulike barneforeiningar. I tillegg dreiv tilsette i soknet eit omfattande arbeid: Klubben Merkur for sjette- og sjuandeklassingar møttest på Fredheim annankvar torsdag med mellom 30 og 50 ungdommar på kveldane. I Ulsteinvik var det også to KRIK-grupper, ei for åttande til tiande klasse, og ei for vidaregåande.
Dessutan hadde soknet Ulstein Ten Sing som samla 50-60 unge på øvingar kvar onsdagskveld. Tensing-koret hadde to-tre vaksne leiarar, og dessutan ein representant for foreldra som stilte med mat til kvar øving.
Byggeklossen open barnehage hadde i 2011 for lengst blitt ein integrert del av arbeidet til soknet. Barne- og ungdomsarbeidar Beate Mjøen Berg var pedagogisk leiar og hadde ein assistent i tillegg. Dessutan hadde barnehagen ei gruppe på 12 frivillige eldre som rullerer på å møte i barnehagen, to stykke kvar opningsdag. Barnehagen var open fire timar to dagar i veka. Byggeklossen runda 10 år i 2010 og var flittig brukt av flyktningar, asylsøkjarar og fastbuande.
Misjonsarbeidet stod i 2011 framleis sterkt i soknet, med mange aktive foreiningar. NMS dreiv det største arbeidet lokalt, med 16 kvinneforeiningar, to mannsforeiningar og tre barneforeiningar, men dei fleste organisasjonane var meir eller mindre representerte i soknet, anten med foreiningar eller kontaktperson. Det vart mange hundre medlemer og samlingar kvart år.
