Vi må også sjå litt på nokre hendingar innanfor kultur, idrett og folkeliv. I løpet av 2010 var det klart for eit nytt arrangement i kult-bygda Flø: Kunstivalen Go with the Flø med utgangspunkt i galleriet til Hugo Opdal. Han hadde alliert seg med sterke kunstnamn, og det vart eit nytt stort publikumsinnrykk til den vesle bygda.
I januar 2014 markerte Ulstein kunstlag 70-årsjubileum. Rundt 100 gjester var samla på Aktivitetshuset Vikholmen og feira kunstlaget med kunst, talar og god mat og drikke. Laget vart skipa den 17. januar 1944, og hadde sidan halde ei rekke utstillingar og samla over 100 bilete som laget har lånt ut gratis til ulike bygg i kommunen. Til jubileumsfeiringa var det også stelt i stand ei utstilling, der kunstlaget viste fram 60 av bileta sine. Leiar i jubileumsåret var Aud Marit Wigg.
Frå fredag 11. februar 2011 tilbaud Sjøborg digital kino. Anlegget var nytt, og kinosjef Kristine Brungot var glad for nyvinninga. No ville den gamle 35-millimeter-filmen bli borte frå norske kinosalar i løpet av året.
I slutten av mars 2011 opna Skollebakken aktivitetshus i lokala etter den nedlagde barnehagen. Der kunne ungdomsklubben, Frivilligsentralen og psykisk dagsenter flytte inn. Ungdomsklubben skifte no namn til Bell, etter ei gammal sjøbu som stod i Ulsteinvik tidlegare. Klubben var innretta mot ungdom i alderen 13 til 20 år. Klubben hadde godt besøk i sine tidlegare lokale, og håpte på endå meir no. Marie Flatin hadde arbeidd ei tid i kommunen for å koordinere aktivitetar retta mot unge. Ho var sentral for å gjere den nye klubben til ein suksess.
I 2011 var det tid for det som skulle bli heitande Smak av Ulstein. Denne første gongen varte arrangementet frå 9. til 11. juni. Smak av Ulstein tok over etter det som i mange år heitte Ulsteindagane. Tidlegare vart Ulsteindagane arrangert i samarbeid mellom kommunen og Ulstein marknadsforum. Etter at Ulstein marknadsforum no var lagt ned, ønskte kulturkontoret i kommunen å føre vidare det dei meinte var bra med Ulsteindagane. Resultatet vart altså Smak av Ulstein. Her var det smakebitar av kva Ulstein hadde å by på, både kulturelt og i matvegen. Både utestader og kulturinstitusjonar la seg i selen. I tillegg kunne kommunen skilte med trekkplaster som Alex Rosén, Ole Børud og Fredrik Steen.
Både Ulstein og Hareid la opp til ei grundig markering av grunnlovsjubileet i 2014. Begge kommunane starta feiringa 16. februar med vardetenning på Melshornet og Hasundhornet. Så gjekk det slag i slag med større og mindre markeringar gjennom året. Den store dagen var naturlegvis 17. mai der begge kommunane stod for arrangement som markerte Grunnlova. Også Ulstein historielag markerte grunnlovsjubileet. I årsskriftet Levd liv 2014 var det artiklar om dei lokale hendingane i tida fram mot og i 1814. Boka hadde også ein artikkel om presten Buschmanns store tale i mars 1814.
I oktober 2014 vart det kjent at ekteparet May-Britt og Edvard Moser hadde vunne Nobelprisen i medisin og fysiologi. Dei to forskarane budde i Trondheim, men hadde røter til Ytre Søre Sunnmøre. May-Britt var opphavleg frå Herøy, Edvard voks opp på Hareid. Dei to var dei første Nobelprisvinnarane frå Noreg i denne kategorien. Dei to hadde drive med hjerneforsking i mange år. Begge hadde vore elevar ved Ulstein vidaregåande skule.
Ulsteiningen Bror Magnus Tødenes (21) kunne på slutten av 2014 sjå tilbake på eit hektisk år. Operatalentet var nominert til Spellemannsprisen i kategorien klassisk musikk og hadde farta rundt på europeiske scener med songstemma si: — Eg flytta til Roma i haust for å gå på Concervatori di Musica Santa Cecilia, ein skule der mellom andre ein av heltane mine, Beniamino Gigli, har vore før meg, fortalde Tødenes til lokalavisa. På skulen i Roma hadde han den norsk-italienske operasongarinna Elizabeth Norberg-Schulz som lærar.
Dimna IL-guten Karsten Warholm (17) heldt fram med å imponere. I juni 2013 tok han del i VM for ungdom (18) i Donetsk i Ukraina. Han tok VM-gull i mangekamp og sette i løpet av konkurransen heile seks personlege rekordar. Det skulle ikkje bli det siste VM-gullet til Warholm. I januar 2014 kunne Dimna IL fortelje at laget hadde fått tildelt både ungdoms-NM (UM) og junior-NM innandørs i den nye Ulsteinhallen i 2015. I NM utandørs i 2014 tok Warholm to gull, mellom anna med tida 47,03 på 400 meter.
Dimna IL hadde bygt seg opp til den sterkaste friidrettsklubben i Møre og Romsdal takka vere nokre store talent, men også breidde og miljø. Ikkje minst hadde trenar Arve Hatløy mykje av æra for eit godt og produktivt treningsmiljø. I 2012 tok utøvarar frå Dimna grovt for seg av medaljane i junior-NM, og tre frå klubben hamna på juniorlandslaget til den nordiske meisterskapen: Karsten Warholm, Marthe Mjøen Berg og Henrik Overvåg.
