Hødd slo på stortromma før cupfinalen den 25. november og leigde eit større areal på Youngstorget i Oslo og sette opp ein teltlandsby som skulle stå frå fredag til søndag i den aktuelle veka. Klubben rekna med å vere vertskap for 10.000 til 15.000.
Sjølve kampen vart så spennande han kunne bli. Det stod 0-0 ved pause. Så tok Hødd leiinga av Kjell Rune Sellin etter 62 minutt. Tromsø utlikna i det 87. minutt, og det vart ekstraomgangar; ingen mål der, og i straffekonkurransen scora Hødd fem medan Tromsø berre klarte tre. Andreas Rekdal sette den avgjerande straffa.
Redaktøren i Vikebladet Vestposten kalla keeper Ørjan Nyland Supermann etter fleire praktredningar, medan redaktøren i Nordlys, Anders Opdahl, trykte avisa med svart førsteside dagen etter finalen, berre med følgjande tekst: «Her skulle vi egentlig feiret Tromsø ILs cupgull. Men vi hadde ingen plan B». Dei to redaktørane hamna med det i debatt i ein av kanalane.
Cupheltane returnerte til Ulsteinvik søndag kveld til stor festivitas. Oskeladden Hødd hadde sprengt ei ny grense.
