I oktober 1936 kom meldinga om at Norges Farmaceutiske Forening hadde peikt ut Ulsteinvik som ein stad der det kunne vere aktuelt å opprette apotek. Dette var noko folk i kommunen hadde sett for seg i mange år. Vestre Sunnmøre hadde krav på eit apotek ut frå mellom anna folketalet. No kunne dette altså bli lokalisert til Ulsteinvik. Sosialdepartementet godkjende tiltaket i oktober 1938, og no kunne dei lyse etter apotekar. Og slik vart det. Apoteket kom i stand i 1940.
Apoteket fekk namnet Mørejarlen. Den nytilsette apotekaren Arne Th. Heide hadde planane klare for eit apotekbygg i sentrum i 1939 og sikra seg ei tomt til føremålet. Men før grunnmurane til det påtenkte apoteket hadde kome opp, døydde Heide brått. I staden vart det Ingolf B. Eikill som enda opp som apotekar i Ulsteinvik. Då lokalavisa skriv om saka i oktober 1939, har den 45-årige familiemannen frå Stavanger vitja Ulsteinvik og såg fram til å byrja, men han var usikker på om han skulle nytte tomta som Heide hadde sikra til apoteket. Eikill rekna med å vere i gang med apoteket i Ulsteinvik i løpet av 1940.
Måndag kveld 20. mai 1940, midt under den dramatiske tida landet var inne i, kom apotekar Eikill med familie med motorbåt til Ulsteinvik frå Stavanger. Til lokalavisa sa han at han ville setje all kraft inn på å få innreiinga av apoteket og huset i stand så fort som råd. Dersom han fekk ein avtale med bankane i den vanskeleg tida som var no, trudde han at dei ville vere på plass i løpet av eit par månader. Ikkje lenge etter kunne Vikebladet melde at arbeidet med å få i stand apoteket var i full gang. Både snikkarar, målarar og murarar var på plass, og arbeidet gjekk raskt unna.
Den 15. august 1940 opna det apotekbygget som apotekar Heide så vidt hadde byrja på – og som no vart fullført av Eikill. Her var det ei rekke maskiner for å framstille mellom anna tablettar. Ei tablettmaskin kunne spytte ut 6000 tablettar i timen, ifølgje lokalavisa. Her var destillasjonsapparat, morterar og mengder av glas.
