Ulsteinvik sentrum hadde utvikla seg mykje dei siste tiåra. Men tettstaden hadde fått sterkare konkurranse frå bygdebyane rundt på Søre Sunnmøre, og naturlegvis frå Ålesund og Moa. Dessutan var det skjerpa konkurranse mellom butikkar i Ulsteinvik. I tillegg hadde det vakse til mykje nytt næringsareal, og då tidene vart tøffare utover i 2015, 2016 og 2017, auka talet på ledige nærings- og butikklokale. Også i eit senter som Blåhuset såg publikum no fleire tomme lokale.
Samtidig var det heile 6,1 prosents arbeidsløyse ved starten på 2017. Det utgjorde 280 personar, 207 menn og 73 kvinner. Hareid hadde ei arbeidsløyse på 6,3 prosent. I desember 2017 hadde arbeidsløysa i Ulstein falle til 3,8 prosent. Det siste året vart det 45 færre arbeidsledige i kommunen, og tidleg i 2018 gjekk arbeidsløysa ytterlegare ned til 3,6 prosent.
Den 31. oktober 2017 var det siste opningsdag for Ulstein Bibliotek i Bjørndals Minne. Her hadde biblioteket halde til i 38 år, og det var mange som hadde sterke og gode minne knytta til bygget. Biblioteksjef Mona Auganæs la ikkje skjul på at det var vemodig, men samtidig såg ho fram til å vere på plass i Ulstein Arena i starten av desember. Den siste dagen vart markert med gjester, kaffi og kaker. No ville ulsteiningane vere utan bibliotek i tre månader.
I oktober 2017 bestemte politikarane i Ulstein og Hareid seg for å slå saman NAV-kontora i dei to kommunane. På sikt skulle Hareid vere vertskommune, og det felles kontoret skulle leggast til Hareid og det planlagde helsehuset der. Med dette er det slutt på at sosialtenestene er ein synleg del av tenestetilbodet i Ulstein. Ulstein sosialkontor vart oppretta i 1964 med Asbjørg Hasund Grønmyr som sosialsjef. I 2007 vart dette ein del av NAV.
Ulstein kommune vart også råka av ei mobbesak: – No kan eg gå vidare med livet mitt, sa Glen Børge Løset Flø til lokalavisa etter dommen i lagmannsretten 4. oktober 2017. Det vart han tilkjend 1,3 millionar kroner i erstatning. Det var i 2016 han gjekk til sak mot Ulstein kommune for å få erstatning for ein øydelagd barndom på grunn av mobbing i skulen. Kommunen hadde anka saka vidare frå tingretten, men etter dommen i lagmannsretten beklaga kommunen mobbinga og ville ikkje anke vidare.
Det nye dagsenteret i Holsekerdalen 24 vart offisielt opna 13. desember 2017. Bjørn Johansen, ein av dei som nytta dagsenteret, klipte snora under seremonien. På programmet stod det talar, sjølvsagt, og i tillegg til allsong sytte gruppa Fjøresteinane for musikk: – Merkesteinane i Volda er forbileta våre, forklarte leiar Stig Grimstad som fekk frivilligprisen for arbeidet med Fjøresteinane i 2017. Arkitekt Georg Grimstad fortalde at dagsenteret skulle ha både karakter og personlegdom.
Det var lenge planen at undervisnings- og aktivitetstilbodet Snoezelen skulle flyttast frå Reiten til Holsekerdalen. Men protestar frå tilsette og pårørande gjorde at politikarane til slutt enda opp med at Snoezelen skulle få halde til på Reiten. Saka hadde vore igjennom fleire rundar i dei politiske organa i kommunen, før kommunestyret til slutt kom fram til eit samrøystes vedtak.
Frå januar 2018 starta Olav Helt Brubakk i stillinga som brannsjef for Ulstein og Hareid. Han hadde vore befal i Hareid brannvesen sidan 2002 og frå 2012 brannsjef i 25 prosents stilling. Men no var det altså oppretta ei full brannsjefstilling for Ulstein og Hareid. Ulstein var vertskommune, og derfor hadde Brubakk fått seg kontor på Ulstein rådhus. Det hadde kome nye forskrifter for stillingsprosentar for brannbefal, og dette saman med kommunesamanslåinga som aldri kom, var mellom årsakene til at Ulstein og Hareid bestemte seg for å slå saman brannvesena og med det også stillinga som brannsjef. I intervju med lokalavisa forklarte den nye brannsjefen at innbyggjarane i dei to kommunane ikkje ville merke så mykje til omorganiseringa av brannvesenet. Kvar kommune skulle framleis ha sitt brannmannskap på 16 personar med tilhøyrande overbefal. Desse vil rykke ut som normalt ved brann eller ulykke. Hareid hadde ein ny brannstasjon i Hareidsmyrane med garderobar både for kvinner og menn. Men førebels er det berre ein kvinneleg brannkonstabel i Hareid. I Ulstein er det ingen kvinner, enno. Den gamle brannstasjonen i Krushammarvegen i Ulsteinvik har berre ein garderobe. Det skulle det bli orden på når kommunen skulle byggje ny stasjon. I januar 2018 var det ikkje bestemt kvar stasjonen skulle ligge. I 2021 reiser ny brannstasjon seg i Holsekerdalen.
Helsestasjonen på Reiten i Ulsteinvik fekk i januar 2018 3,2 millionar kroner frå Helsedirektoratet. Pengane gjekk til etablering av tverrfagleg helsestasjon, fleire ulike stillingar og styrking av helsestasjon- og skulehelsetenesta. Helsestasjonen ville i tida framover mellom anna koordinere ei rekke tiltak for risikoutsette born. Då trongst det at fleire fagpersonar jobba i lag. Det tverrfaglege teamet skulle bestå av helsesøster, jordmor, familierettleiar og helsestasjonslege. Målet var etter kvart også å få ein kommunal psykolog.
Rådmannen og politikarane i Ulstein gav vinteren 2018 grønt lyst til at Ulstein Utvikling kunne byggje neste steg, Sjøsida 2, utan at strandpromenaden skulle bli lagt rundt huset mot sjøen. Sjøsida 2 består av 31 bueiningar, og bygget har fem etasjar. Denne delen av Sjøsida vil ikkje ha forretningsareal eller kontor. I juni 2018 var det klart for byggjestart.
