To veker før jul i 2015 var heile 24 skip i offshoreflåten på Ytre Søre Sunnmøre lagde i opplag. Skipsreiar Åge Remøy såg ikkje lyst på situasjonen då han kommenterte saka til Vestlandsnytt: – Vi er i ferd med å legge eit vanskeleg år bak oss, men eg trur vi får det endå tøffare i 2016. Oljeprisen går feil veg, og aktiviteten vil ikkje auke. Så eg kan ikkje sjå noka lysning i året som kjem. Krisa som næringa står oppe i, er truleg den verste nokon gong, meinte Remøy.
I juli 2016 kjøpte Røkke-eigde Aker ASA seg inn i Rem. Aker hadde alt kjøpt seg inn i Solstad Offshore, og såg for seg å slå saman dei to reiarlaga. Rem-sjef Åge Remøy likte situasjonen dårleg, og i samtale med Sunnmørsposten kalla han Aker-manøveren for eit bakhaldsangrep. Herøy-ordførar Arnulf Goksøyr (H) kalla Røkke-raidet for eit plyndringstokt. Men det enda med at Aker tok over både Rem og Solstad, og i august 2016 hadde Røkke festa augene sine på endå eit gjeldstyngd reiarlag, Farstad i Ålesund.
Den 10. oktober 2016 var det slutt for Rem Offshore som eige selskap. Men Remøy (66) gav seg ikkje. Han ville arbeide for å berge den kriseråka offshorenæringa på Nord-Vestlandet med ei investering på ein halv milliard. Saman med to andre investorar skipa han Remøy Nord Vest AS, der dei tre hadde skote inn ein halv milliard. Målet var å halde på lokalt eigarskap. I 2019 kunne Remøy gå ut av dei leigde lokala i Diamanten hos Havila – og heise flagget ved sitt eige bygg – som Solstad hadde leigd.
På tampen av 2016 vart det klart at Havila hadde klart å få til ein avtale om restrukturering med obligasjonseigarane og såg med det til å vere berga for dei næraste åra.
Men Kleven-konsernet såg ut til å halde seg flytande. Midt i desember 2015 hadde Kleven og Myklebust 16 båtar i ordreboka, som skulle leverast dei neste to åra. Verdien på kontraktane var kring 10 milliardar kroner. Dermed hadde konsernet arbeid fram til siste kvartal i 2017. Den første båten til Maersk skulle leverast i oktober 2016. I januar 2016 hadde konsernet 18 båtar i ordreboka til ein verdi av 11,2 milliardar etter at Sølvtrans hadde vedstått seg ein opsjon på brønnbåt nummer to frå Myklebust Verft. Alt dette skapte ringverknader i elles tronge tider. I februar 2016 signerte Mare Safety AS i Ulsteinvik den største kontrakten sin nokon gong: Ein leveranse på heile 14 bysser og fire MOB-båtar til Klevenkonsernet.
I april 2016 teikna Kleven ein intensjonsavtale med Hurtigruten om å byggje inntil fire skip: – Kontrakten med Hurtigruten er gledeleg, og gjer at vi ikkje skal seie opp folk, men i staden rekruttere fleire, fortalde konsernsjef Ståle Rasmussen til lokalavisa. Dei to første skipa skulle leverast i 2018 og 2019. Kvart skip ville koste over ein milliard kroner. Som vanleg dryste slike store kontraktar hos verfta gullstøv nedover diverse underleverandørar. I august 2016 kunne Ulsteinvik-baserte Hatløy Maritime gjere kjent at selskapet skulle levere heile 15 hurtiggåande tenderbåtar til Hurtigruten.
I juni 2016 var det seremoni for det Kleven-bygde diamantskipet SS Nujoma. Eigarane var ein del av De Beers Group, og skipet skulle drive med utvinning av diamantar på havbotnen utanfor Namibia. Men 2015 vart ikkje noko godt år for Kleven økonomisk. Kleven-konsernet gjekk på eit driftsunderskot på 250 millionar kroner mot eit overskot på 76 millionar i 2014. No var håpet å snu skuta i 2016. I desember 2016 trong Kleven fleire tilsette for å ta unna alle oppdraga.
Ei spesiell hending med positivt forteikn var dåpen av den nye redningsskøyta RS Idar Ulstein: – det er ikkje nokon betre måte å heidre far vår på enn ved ei slik flott redningsskøyte med namnet hans. Pappa hadde vore stolt no, smilte Gunvor Ulstein då ho hadde vore med på prøvetur med skøyta i november 2015. Gunvor var sjølv gudmor under dåpen av RS Idar Ulstein.
Utover i 2016 måtte Ulstein Group ta tøffe grep. I slutten av januar hadde konsernet om lag 120 permitterte og 150 tilsette var permanent ute av konsernet. Men det var aldri snakk om å legge ned verftet, sjølv om det butta kraftig imot, forsikra konsernsjef Gunvor Ulstein: – Det tek på å måtte seie opp tilsette, men vi har verftet med i dei vidare planane for konsernet. Nøkkelen er omstilling, sa konsernsjefen til lokalavisa.
I april 2016 gjekk regjeringa Solberg inn for å utvide permitteringsordninga frå 30 til 52 veker. Det var dei glade for i mellom andre Ulstein Group, sjølv om tiltaket diverre kom for seint for ein del permitterte. Men i november 2016 kom gledeleg nytt; Ulstein Verft skulle byggje ei nesten 90 meter lang luksusyacht. Denne marknaden var ny for Ulstein, no håpte både verft og andre på ringverknader. X-bow var medrekna i pakken.
