Vi skal følgje nokre hendingar i utviklinga i Ulstein kommune litt inn i det neste tiåret, sjølv om det er utanfor ramma for denne boka. Lat oss først sjå på Kleven: Det var framleis mykje uvisse omkring Kleven då verftet leverte den siste Maersk-båten i februar 2019; ein serie på seks ankerhandteringsfartøy var med det ferdig. Dei blå skroga hadde vore eit landemerke i tre år medan bygginga heldt på. Lokalavisa konkluderte med at dette markerte slutten på offshore-æraen for Kleven, i alle fall for denne gongen. No kunne avisa fortelje at det hadde vore møte mellom Kleven-leiinga og leiinga i Vard-konsernet. Det var då ingen løyndom at Hurtigruten ikkje såg for seg å drive skipsverft særleg lenge framover. Hurtigruten hadde teke over 100 prosent av aksjane i Kleven sommaren 2018. Då vart Myklebust Verft skilt ut som eige selskap. Men det kom ikkje noko ut av samtalane med Vard. Den 25. juni 2019 vart MS Roald Amundsen formelt levert over frå Kleven Verft til Hurtigruten: – Vi har opparbeidd oss ein eineståande kompetanse gjennom dette prosjektet. Det set oss i ein heilt ny posisjon når det gjeld bygging av passasjerskip, insisterte Kleven-sjef Olav Nakken i samtale med lokalavisa. Nakken varsla i juni 2019 både oppseiingar og permitteringar ved verftet, sjølv om han var optimistisk for framtida til Kleven. Men vi som kan vurdere situasjonen frå skrivepunktet i 2021, veit at korona-åtaket vinteren 2020 og utover ikkje akkurat fremja marknaden for cruise- og passasjerbåtar.
Fredag 20. desember 2019 vart ekspedisjonsskipet MS Fridtjof Nansen overlevert frå Kleven til Hurtigruten. Dette styrkte sjansen for eit snarleg sal av verftet. Kleven Verft prøvde no å rigge seg for framtida og oppretta eit nytt selskap for å gjere verftet meir attraktivt for nye eigarar, eventuelt å ta verftet vidare på eiga hand. I nye Kleven skulle dei tilsette, verftseigedommen og nye kontraktar inngå. Gamle forpliktingar skulle ikkje følgje med inn i det nye selskapet. Samtidig som eigarane no rigga Kleven for sal, jakta selskapet på nye kontraktar. Midt i juli 2019 melde Kleven om eit nytt direktørskifte. No var det Kjetil Bollestad som skulle ta over etter Olav Nakken. Bollestad hadde blitt henta inn av Nakken som produksjonsdirektør på Kleven i desember 2018.
Den 20. januar 2020 melde lokalavisa at det kroatiske industrikonsernet DIV Group ville ta over Kleven Verft, etter at verftskonsernet hadde vore til sals i fleire månader. Det hadde også vore samtalar med fleire potensielle kjøparar, men no enda eigarane i Hurtigruten med å selje til det kroatiske selskapet eigd av Tomislav Debeljak. Men løysinga, som Kleven-leiinga først såg på som god, vart alt anna enn ei lykke for det tradisjonsrike verftet. Det tok ikkje lang tid før vanskane tårna seg opp. Kleven hadde då også blitt åtvara mot den kroatiske eigaren, som ifølgje politiske kjelder ikkje hadde nødvendig kapital. Fleire i Ulstein, mellom dei ordførar Knut Erik Engh, hadde fått e-post frå EU-parlamentarikaren Ivan V. Sincic med skuldingar retta mot den nye Kleven-eigaren. I starten av juli 2020 kom Debeljak til Kleven. Han var no både styreleiar og fungerande verftsdirektør etter at Kjetil Bollestad hadde sagt opp. Han ville prøve å rydde opp i vanskane som truga med å velte verftet. Fristen var kort, for tre låntakarar hadde terminert avtalane sine. Kleven var i havsnaud.
Problema var til slutt slik at DIV Group-eigar Debeljak 3. juli 2020 måtte stå skulerett og fortelje pressa at det var meldt om oppbod for Kleven-selskapa. Ambisjonen til kroaten var å utvikle Kleven, men no stod han framfor ein knusande dom over ei av dei store hjørnesteinsbedriftene i det maritime Noreg. Fleire hundre tilsette stod utan jobb.
Men fredag 10. juli 2020 vart det klart at det Molde-baserte familiekonsernet Langset AS tok over Kleven Maritime Contracting. Med det var 225 arbeidsplassar berga, mange av dei aust-europearar. Om lag samtidig kom meldinga om at dagleg leiar Trond Liavaag og tre av kollegaene hans tok over selskapet dei sjølve jobba i, Kleven Maritime Technology. Liavaag hadde vore dagleg leiar der sidan 2012. Så var gleda ikkje mindre då Agder-baserte Green Yard Group vart offentleggjort som eigar av verftsselskapet 14. juli 2020 etter å ha kome i hamn med ein avtale med konkursbuet og dei involverte bankane. Kjernekompetansen skulle takast vare på, og det nye Green Yard Kleven skulle også i framtida vere eitt av dei mest kjende verfta i Noreg, heitte det i pressemeldinga frå dei nye eigarane, som ville føre verftsdrifta vidare og samtidig utvide verksemda til nye forretningsområde. Green Yard var ein leiande aktør inn resirkulering av skip, men ønskte å halde fram med også å byggje skip på Kleven.
Midt i den turbulente kroat-tida, fredag 26. juni 2020, fekk lesarane av lokalavisa vite at Kjetil Bollestad hadde sagt opp stillinga som direktør ved Kleven. Men no var han tilbake hos dei nye eigarane som direktør for Green Yard Kleven. Men før tilsette, eigarar og leiing kunne senke skuldrene, var det ei oppgåve som venta: Å få selt skroget som den tidlegare eigaren, Debeljak, påstod var hovudgrunnen til at verftet gjekk konkurs. Utover heile hausten 2020 svirra spørsmålet i lokalsamfunnet: Når får verftet selt skipet. For med eit sal av dette skipet ville Green Yard Kleven kome skikkeleg i gang. Svaret kom som ei julegåve til ein heil region, skreiv Vikebladet Vestposten. Herøy-baserte Rem Offshore møtte opp på Kleven 16. desember og annonserte at dei ville ha verftet til å byggje skroget om til eit havvindskip. Ein heil region kunne puste letta ut. Frå skrivepunktet i mars 2021 ser det ut til at Kleven igjen har ei framtid – til glede for regionen og folka her.
I februar 2021 var det elles klart for gjeldsforhandlingar rundt Kleven Prosjekt 401 AS, også kalla Gamle Kleven Verft, i Sunnmøre tingrett. Selskapet vart verande eigedommen til Hurtigruten etter at reiarlaget selde det nyetablerte Nye Kleven Verft til DIV Group. Nye Kleven Verft vart stifta 1. november 2019 for å kunne selje verftet med tilhøyrande selskap utan forpliktingar og gjeld frå det gamle selskapet.
