I 2014 og 2015 melde 80 personar seg ut av Den norske kyrkja i Ulstein og Hareid. Det var rekordmange, og lokalavisa konkluderte med at striden om kyrkjeleg vigsling av par av same kjønn var hovudgrunnen. Men det vart ikkje gjennomført noka gransking mellom dei utmelde om grunnen.
I samband med 200-årsjubileet til Det Norske Bibelselskap arrangerte Ulstein sokn ein konkurranse om å finne den eldste Bibelen i Ulstein. Ikkje uventa var dei eldste biblane mykje eldre enn bibelselskapet. Soknet fekk inn kring 60 biblar, og den eldste var frå 1718 og høyrde til Kjell Inge Bjørke. Den nest eldste høyrde til Leiv Bjørndal og stamma frå 1719.
Midt i juni 2016 gjorde juryen for nytt kyrkjebygg i Ulstein kjent at dei hadde valt utkastet Excelsior. No starta kampen for finansiering for alvor.
Vinteren 2019 er biskop Midttømme igjen på visitas i Ulstein. I visitasmeldinga rettar soknepresten blikket mot behovet for nytt kyrkjebygg: – Den fine, gamle trekyrkja frå 1849 er i dagleg bruk, men ho er ikkje godkjend for universell utforming. Huset vi leiger som kyrkjelydshus, Fredheim, er frå 1909, og er heller ikkje universelt utforma. Arbeidet til kyrkja held såleis til i fire lite tilfredsstillande lokale, og det fører med seg slitasje for tilsette og frivillige, og hindrar fornying og utvikling av kyrkjelydsarbeidet. Dei siste 20 åra har soknet arbeidd for å få realisert eit nytt kyrkjebygg med rom for moderne kyrkjelydsarbeid, plass til alle på høgtidsdagar og ei universell utforming som ikkje diskriminerer menneske med funksjonshemming. Kommunen har vedteke at tomta for den nye kyrkja skal ligge i Ulsteinvik sentrum og i sambruk med den gamle kyrkja. No manglar det berre politisk vilje til å realisere bygget, konkluderer sokneprest Margit Lovise Holte.
Går vi eit par generasjonar tilbake, var så godt som 100 prosent i Ulstein medlemer av Den norske kyrkja. Dette prosenttalet har minka gradvis, både som følgje av innvandring, utmeldingar og tilslutning til andre kyrkjelydar. Ved den førre bispevisitasen i 2011 var 81,9 prosent medlemer av kyrkja; i 2017 hadde dette minka til 77,9 prosent, samtidig som folketalet i soknet hadde auka frå 7751 i 2011 til 8457 i 2017. Det gjennomsnittlege deltakartalet på hovudgudstenestene har variert ein del. Årsmeldinga til soknet frå 2018 viser 229 (2014), 194 (2015), 211 (2016) 215 (2017) og 193 (2018). Det gjennomsnittlege deltakartalet medrekna alle gudstenester er 176 i 2018, og med eit toppår på 206 i 2015.
Ulstein sokn hadde bestemt seg for å kaste lys over den lokale kyrkjehistoria. Ein utløysande faktor var at det i 2019 var 170 år sidan trekyrkja i Ulstein vart reist. Først vart ho reist på Ulstein, deretter flytta til Ulsteinvik i 1878. Men den gamle steinkyrkja vart bygt rundt 1150 og var kyrkje i soknet heilt til 1849. No ville Ulstein kyrkje markere hendingane med ein festkveld i Ulstein kyrkje i mai 2019, med kultur og historiske innslag. Litt seinare på året låg jubileumsboka føre. Tittelen på boka var Ulstein kyrkje, eit ankerfeste i tida, skriven av Asle Geir Widnes Johansen, og tok for seg heile historia frå kristendommen kom til Ulstein og opp til vår tid.
