Kultur, idrett og folkeliv

Oppretta: 19.06.2025

Lat oss ta med nokre hendingar i kultur- og idrettslivet i perioden utover frå 2015. IL Hødd hadde til dømes nokre sterke utøvarar i turngruppa. Nettopp i 2015 tok klubben den første NM-medaljen sin i turn. Edel Charlotte Eiken Fosse tok sølv i junior-NM og vart teken ut på juniorlandslaget. Fosse hadde då nettopp vunne ein større regional konkurranse og hadde vist talent og treningsvilje i fleire år. I 2016 tok Edel Charlotte to gull i junior-NM. Litt seinare kvalifiserte ho seg til EM i Sveits.

Edel Charlotte Eiken Fosse vart noregsmeister for junior våren 2017 og kvalifiserte seg med det til europeisk ungdoms-OL i Ungarn. Ein annan ung ulsteining vart også noregsmeister; Jonas Moe Sundgot (18), var raskare enn alle andre, også dei som var fleire år eldre, og suste over målstreken til NM-tittel i gokartklassen X30: – Dette NM-gullet set eg høgt. Det er det største eg har opplevd i gokart-karrieren, sa Sundgot til lokalavisa.

I åra rundt 2015 gjorde Ulstein kommune ein innsats for å byggje turveger i fjella på øya. I august 2015 var arbeidet med å lage turveg frå Gamleeidet til Vikeskaret i gang. Målet var at turvegen skulle stå ferdig til jul. Kultursjef Leif Ringstad i Ulstein kommune var ein viktig pådrivar for turvegane. Det same var trimentusiast Lindor Skeide i Hødd: – Idéen med denne turvegen var at trakkemaskinen kunne kome seg lengre opp. Snøen ligg lenger oppe i Vikeskaret, og det er eit område der det har vore populært å gå på ski, fortalde Ringstad til lokalavisa – og la til: Vi har hausta erfaringar frå det vi har fått til frå Vikemarka og opp på Gamleeidet, men også ute i Bugarden. Vi har fått mange gode tilbakemeldingar frå publikum, som meiner vi har fått til flotte turvegar.

Det var likevel ikkje alle som likte turvegane gjennom myrar og lyng: – Inngrepa i naturen er som vandalisme å rekne, basunerte Nils-Roar Hareide, ulsteining og leiar ved Runde Miljøsenter, til Vikebladet Vestposten.

Midt i januar 2016 var det storstilt opning av skeisebane og turvegar i Bugardsmyrane: – Anlegget med dammen i Bugardsmyrane og gangvegen over til Skeide er eit døme på at vi her i Ulstein er flinke å få til i lag, uttalte kultursjef Leif Ringstad i samband med den offisielle seremonien. Under arrangementet i Bugardsmyrane fekk Lindor Skeide tildelt Frivilligprisen for innsatsen sin for trim, trivsel og folkehelse.

SSR-sjef Einar Heimdal fekk gleda av å klippe snora under den offisielle opninga av NMS Gjenbruk i store gode, lokale i Sjøgata i Ulsteinvik i 2016. Styreleiar Inge Kaldhol orienterte om tiltaket, og fortalde at Det Norske Misjonsselskap hadde om lag 48 butikkar omkring i landet, som det siste året hadde hatt eit overskot på 17 millionar kroner. Pengane gjekk til det internasjonale arbeidet til misjonsselskapet. Butikken i Ulsteinvik opna i 2002.

I 2005 gjekk 14 tamilske kvinner saman om å stifte lokallag for Tamilsk Kvinneorganisasjon i Ulstein, Hareid og Herøy. I januar 2016 markerte lokallaget 10-årsjubileum, rikt på farge, smak og program. Det var ein vakker fest på loftet til Ulsteinvik barneskule, med dans, song og mat.

Laurdag 16. april 2016 var det stor festivitas på rådhusplassen i Ulsteinvik. Då vart krigsveteranen, forfattaren og krigshistorikaren Ragnar Ulstein heidra med byste. Initiativtakar Kjell Garnes hadde teke kontakt med Ottar Kaldhol og meinte Ulstein fortente ei særleg markering og takk frå heimbygda. Kaldhol var samd og tok kontakt med leiar Aksel Hauge i Ulstein historielag. Historielaget nemnde så opp ei arbeidsgruppe med Aksel Hauge (leiar), Heidi Myklebust, Kjell Garnes, Svein Eiksund, Ottar Kaldhol, og med kultursjef Leif Ringstad som representant for Ulstein kommune. Framfor ein tettpakka rådhusplass avduka forsvarsminister Ine Eriksen Søreide bysta, berre få dagar før 96-årsdagen til Ragnar Ulstein. Ulstein vart heidra for innsatsen sin under andre verdskrigen, men også for alt dokumentasjonsarbeidet han hadde lagt ned etter krigen. Forsvarssjef Haakon Bruun-Hanssen delte eit år tidlegare ut Forsvarets Heiderskors til Ragnar Ulstein, no var han på rådhusplassen i Ulsteinvik for å heidre Ulstein.

Ståande ved bysta av seg sjølv talte Ragnar Ulstein til sambygdingane: – Eg har i hjerte og sinn alltid vore ulsteining, sjølv om eg no er ålesundar. Han takka for æra og sa mellom anna: – Fridommen er den søyla som ingen må røre. Ho kan ikkje bøye av. Denne utfordringa kjem vi til å møte i generasjonar framover. Då må vi stå fast.

Det var skulptøren Ola Stavseng frå Stordal som hadde skapt bysta av Ulstein. Til stades under festlunsjen etter avdukinga var mellom andre krigsveteranane Joakim Rønneberg og ulsteiningen Anton Kleiven.

Då Hødd handball feira 70-årsjubileum i juli 2015, varta klubben opp med eit spenstig arrangement. Ulstein Cup i den nye Ulsteinhallen var ei landslagsturnering mellom kvinnelandslaga i Noreg, Frankrike, Romania og Spania. Arrangementet samla eit stort og entusiastisk publikum, og aktørane signaliserte at dei var særs nøgde med arrangementet og stemninga. Spania vart til slutt det beste laget.

Ulstein Hotell feira stort i oktober 2016 med blant anna fyrverkeri. I 100 år har hotellet tent innbyggarane og tilreisande til regionen og til kommunen.

I juli 2021 sette Karsten Warholm verdsrekord på 400 m hekk på tida 46,70 på Bislett. Og under OL i Tokyo same år set han ny verdsrekord og blei olympisk meister på tida 45,94.

Karsten Warholm nærma seg sakte med sikkert verdstoppen. Han satsa no meir og meir på 400 meter hekk, og i EM 2016 kvalifiserte han seg til OL i Rio, der han nådde semifinalen. I EM sette han norsk rekord på 48,84 utan å nå heilt opp. I OL enda han på ny norsk rekord med 48,49. Han hadde hatt Arve Hatløy som trenar opp gjennom åra heilt til han reiste frå heimbygda. Hatløy var sjølve hjernen bak treningsmiljøet i Dimna IL. Med brei kompetanse og lang erfaring skapte han stadig gode resultat. I oktober 2016 vart han heidra med den gjeve European Coaching Award under gallaen til det europeiske friidrettsforbundet – på Madeira.

Karsten Warholm tok stadig nye steg på friidrettsbana. På friidrettsgallaen i Stavanger i januar 2017 fekk han utøvarprisen og vart kåra til årets namn i norsk friidrett. Under innandørs-NM, som Dimna IL arrangerte i Ulsteinhallen i starten av februar 2017, vart det tre gull til arrangørklubben, to til Karsten Warholm, eitt til Ådne Andersen. I starten av juni dette året sette Warholm ny norsk rekord på 400 meter flatt med 44,87. Like etter vann han Bislett Games på 400 meter hekk og sette norsk rekord med 48,25. No hadde han fått ny trenar, Leif Olav Alnes, og dei to skulle kome til å bli eit radarpar i åra framover.

Onsdag 9. august 2017 vart Warholm verdsmeister på 400 meter hekk ein regnfull kveld i London. Han fekk tida 48,35, og 21-åringen sjokkerte nok både seg sjølv, publikum og konkurrentane. Men det skulle bli meir. Etter kvart etablerte han seg som den beste hekkeløparen i verda og snuste på verdsrekord. I mellomtida heldt utøvarar frå Dimna IL fram med å prestere. I NM i Sandnes i 2017 vann laget like godt 1000 meter stafett for herrar. Under den TV-overførte Idrettsgallaen 2018 måtte Warholm på podiet tre gonger og ta imot tre glaskuler. I EM i Berlin i august 2019 vart det eit nytt gull på Dimna-løparen. Under NM på Byrkjelo tok Warholm imot den fjerde kongepokalen sin på rad. I juni 2019 sette Warholm Europa-rekord på 400 meter hekk med tida 47,33 under Bislett Games. I slutten av juli sprang Warholm inn til årsbeste i verda på 47,12, ny Europa-rekord igjen. Og under NM i august klarte Karsten Warholm det ingen mannlege utøvarar hadde gjort før, å vinne kongepokalen for femte år på rad. Så, den siste dagen i september 2019, sprang Warholm inn til sin andre VM-tittel på 400 meter hekk i Doha, ein fantastisk prestasjon. Men det stoppa ikkje der. Då Møre og Romsdal Idrettskrets feira 100 år i november 2019, vart Karsten Warholm kåra til hundreårets idrettsutøvar i fylket. I desember kåra det verdskjende magasinet Track & Fields News Warholm til årets mannlege friidrettsutøvar. Vi må ta med at han har den europeiske og norske rekorden på 400 m hekk med 46,87, sett 23. august 2020 i Stockholm, berre hundredelar bak verdsrekorden til amerikanaren Kevin Young på 46,78 frå 1992. I juli 2021 sette han verdsrekord på 46,70 på Bislett. Og under OL i Tokyo same år set han ny verdsrekord og blir olympisk meister på 45,94.

I slutten av oktober 2016 vart det klart at Hødd rykte ned frå 1. divisjon etter å ha tapt den siste kampen 5-0 borte mot Sandnes Ulf. På dei åtte siste kampane hadde laget berre teke tre poeng, og baklengsmåla hadde runne inn. Det hjelpte ikkje å sparke trenar Hans-Erik Eriksen midt i sesongen, og hjelpetrenar Steinar Lein, som steppa inn og tok over laget, vart berre eit kortvarig mellomspel.

I 2017 starta Hødd opp Høddskulen med mål om å skape fleire lokale A-lagsspelarar, som i sin tur skal syte for at Hødd er ein del av norsk toppfotball. Satsinga starta med dei yngste spelarane og skulle vare heilt til dei eldste. Foreldra måtte betale ein sum for å få borna sine med i satsinga, og Hødd tilsette tre spelarutviklarar for å drive prosjektet fram.

Studio Hugo Opdal feira ti år med kunst i mai 2017. Jubileumsutstillinga var nesten ein parade gjennom dei ti åra til galleriet. Under opninga takka Hugo Opdal Flø-bygda for samarbeidet gjennom dei ti åra. Det var Jan Vincents Johannesen, lege, kunstmesen og forfattar, som opna utstillinga.

Fotograf Cecilie Hatløy frå Ulstein vart i oktober 2017 kåra til årets beste fotograf av Møre og Romsdal Fotograflaug: – Dette hadde eg ikkje venta, og det er ei ære for meg, sa ho til lokalavisa. Hatløy starta med å ta bilete profesjonelt i 2010. I slutten av november kom Cecilie som den einaste profesjonelle fotografen i Noreg gjennom nålauget til ei høg utmerking i regi av den europeiske fotograforganisasjonen FEP. Under samlinga i Roma var juryen samd om at Cecilie Hatløy var verdig til å kunne kalle seg Qualified European Photographer (QEP). I april 2018 fekk ho gull under Norges Fotografforbunds årlege landskonkurranse.

Ein ulsteingut som blomstra både nasjonalt og internasjonalt, var operasongaren Bror Magnus Tødenes. I ein alder av 24 år i 2017 var han i ferd med å erobre operaverda, rosa Leiv Ove Andsnes, ambassadør for Statoil Morgendagens Helter då han som juryleiar kunne overrekke Statoil-stipendet til Tødenes i november 2017, ein million kroner fordelt på fire år: – Dette betyr i grunnen alt, smilte Tødenes i samtale med lokalavisa.

I 2017, 2018 og 2019 skulle det bli mykje snakk om TV-serien Heimebane både i Ulsteinvik og elles i landet. I november 2016 vart det kjent at duoen Ane Dahl Torp (bildet) og John Carew skulle spele viktige roller i serien som skulle spelast inn hovudsakleg i Ulsteinvik. Innspelinga av den første sesongen skulle skje i tidsrommet mars til oktober 2017. Laurdag 24. februar 2018 var det premiere på Sjøborg

I 2017, 2018 og 2019 skulle det bli mykje snakk om TV-serien Heimebane både i Ulsteinvik og elles i landet. I november 2016 vart det kjent at duoen Ane Dahl Torp og John Carew skulle spele viktige roller i serien som skulle spelast inn hovudsakleg i Ulsteinvik. Innspelinga av den første sesongen skulle skje i tidsrommet mars til oktober 2017. Laurdag 24. februar 2018 var det premiere på Sjøborg. Mellom kjendisane som var til stades, var John Carew. Serien hadde fleire lokale statistar, men også ein skodespelar med opphav i Ulsteinvik. Rune Sæter spelte ein hardbarka supporter for fotballklubben Varg. Serien skulle få god mottaking, både mellom TV-sjåarane og i avisene, og vart følgt opp med ein sesong to. Kanskje var Heimebane med på å setje Ulstein endå meir på kartet i landssamanheng. I mai 2018 vart Heimebane den store vinnaren under Gullruten-utdelinga i Bergen.

Då IL Hødd heldt årsmøte i mars 2018, lydde det krass kritikk mot administrasjonen og styret i Hødd Fotball frå Yrjar Garshol i kontrollkomitéen. Han meinte mellom anna at dei ikkje hadde hatt oversikt og styring. Underskotet i 2017 var på 1,5 millionar kroner. Klubben hadde budsjettert med eit lite overskot. Men både billettsal og kampdagsinntekter hadde svikta. Garshol kom også med kritikk av ei lang rekke andre forhold, mellom anna med omsyn til det sportslege og kontraktar som var inngått med ulike spelarar. Det vil føre for langt å gå inn på detaljane i denne boka. Men det var klart at IL Hødd Fotball var på veg inn i ein kritisk fase. Det skulle kome til å bli endringar i mannskapet på Høddvollhuset. Den første som trekte seg, var styreleiar Håvard Haanes i Hødd Fotball. Styret elles ville halde fram, og sa seg leie for at Haanes trekte seg. I eit intervju med Vikebladet Vestposten 27. mars 2018 uttalte Haanes at han meinte det gjekk føre seg ein maktkamp i Hødd, og at det var usemje om kven som skulle bestemme saker og ting: – Raskt etter at eg starta som styreleiar, opplevde eg at det er personar og ikkje funksjonar som bestemmer i klubben.

I Hødd var nok ein del usamde med Haanes, men fleire skulle kome til å trekke seg i klubben ei tid seinare. I mai 2018 vart Ivar Morten Normark vald til ny styreleiar i IL Hødd Fotball. Og i juli 2018 måtte Hødd gjere grep på grunn av den pressa økonomien. Dagleg leiar Oddmund D. Otterlei, sportssjef André Nevstad og FFO-ansvarleg André Gardshol vart permitterte i 50 prosent til over sommarferien.

Det hadde vore ei turbulent tid i Hødd Fotball med underskot og stramme budsjett då sportssjef André Nevstad slutta i klubben etter mange år både som spelar og leiar på ulike plan, mellom anna ein lang periode som dagleg leiar. No i januar 2019 var det slutt: – Han er vel kanskje den som har betydd mest for klubben nokon gong. Han har vore ein profil både på bana og utanfor bana; ein bauta som har stått på for klubben døgnet rundt, kommenterte dagleg leiar Oddmund Davik Otterlei då Vikebladet Vestposten tok kontakt. Til avisa kommenterte Nevstad avgangen mellom anna slik: – Vi har hatt eit mål om å rykke opp til 1. divisjon heilt sidan vi rykte ned. Det ville bety at vi kunne ha gjort ein del ting som vi ikkje kan gjere der vi er no. Som sportssjef kjenner eg på ansvaret for at vi ikkje klarte det, og eg har kjent på ansvaret for å gi rom til å få på plass eit budsjett for 2019.

Etter ei stund med jobb i Sparebanken Møre i Ulsteinvik, vart Nevstad kalla til jobben som dagleg leiar i eliteserieklubben Mjøndalen i desember 2019. I skrivepunktet 2021 er han på veg til å flytte til Ulsteinvik igjen.

Ikkje mange dagane seinare vart det kjent at også Oddmund Davik Otterlei sa opp jobben sin i Hødd Fotball. Han fortalde i intervju at han følte det var rett å skifte beite. Han hadde fått tilbod om ein annan jobb i Haram. Hødd hadde fleire utfordringar. Hovudtrenar for A-laget, Sindre Eid, hadde blitt sjukmeld, og unge Sander Håskjold Nyland fekk jobben med å leie treningane medan Eid var sjuk. I februar 2019 melde Hødd at Eid ikkje lenger var hovudtrenar. Han hadde ønskt å forlenge kontrakten, men styret sa nei. No skulle han konsentrere seg om jobben som marknadssjef i klubben. Det enda opp med at Nyland vart hovudtrenar permanent i sesongen 2019. Men ut på hausten 2019 avgjorde styret i klubben at dei ville ha inn ein hovudtrenar med større erfaring. Det enda med Kevin Knappen frå Elverum.

Styret i Hødd Fotball svarte for seg under eit medlemsmøte i midten av februar 2019. Då kom det mellom anna fram at klubben måtte spare tre millionar kroner i 2019. Før møtet hadde Sunnmørsposten avslørt at tidlegare dagleg leiar Oddmund Otterlei sa opp stillinga si mellom anna fordi han hadde blitt skjelt ut av styreleiar Ivar Morten Normark. Under møtet orsaka Normann ordbruken i den konkrete episoden. Per Arve Moldskred, «alt mogleg mann» på Høddvoll i mange år, hadde no teke over som dagleg leiar i klubben. Under årsmøtet vart Normark attvald til styreleiar. Han fekk tidlegare styreleiar Bård Dalen som motkandidat og vann valet med knapp margin.

Hødd runda 100 år i 2019. Dette vart markert med fleire arrangement gjennom året. Den 1. august dette året var det akkurat 100 år sidan klubben vart skipa. No skulle det markerast med ope hus på Høddvollhuset med kakefest, mimring og talar. Kjell Garnes som har spelt aktiv og har hatt fleire verv i klubben står klar ved festkaka.

Samtidig runda Hødd 100 år i 2019. Dette vart markert med fleire arrangement gjennom året. Det første var eit såkalla kick-off på Sjøborg 26. januar. Laget hadde peika ut ein komité til å ta seg av jubileumsarrangementa. Leiar var Arne Flatin, og med seg hadde han André Nevstad, Ragnhild Kriken Garnes, Liv-Janne Dalehamn og Eldor Skeide. Desse fire var alle æresmedlemer i IL Hødd. Kick-off-arrangementet samla full sal i Sjøborg og baud på ei fin blanding av kultur og klubbhistorie. Den 1. august dette året var det akkurat 100 år sidan klubben vart skipa. No skulle det markerast med ope hus på Høddvollhuset med kakefest, mimring og talar. Dagen vart også markert av dei Hødd-laga som var på Norway Cup på Ekebergsletta. Så avslutta Hødd feiringa med ein stor fest i Ulstein Arena i slutten av september. Her var Jan Åge Fjørtoft programleiar, og det vart igjen ei god blanding av kultur og historie.

Samtidig dreiv to entusiastiske karar i eit naust ved Ryssholmen på Ulstein med eit spesielt oppdrag. Hallbjørn Leirvik og Per Ødegård la siste hand på det som skulle bli Rotary-gåva til jubilanten IL Hødd, monumentet som skulle stå i rundkøyringa ved Amfi i Ulsteinvik. Dei sette saman delane som var 11 kuler og 11 stenger. Kulene var importerte frå Kina, stengene kom frå ein grossist i Bergen. Dei 11 kulene skulle symbolisere dugnadsånda og breiddeidretten i Hødd. Gullkula på toppen symboliserte cup-gullet i 2012.

I november 2019 kom jubileumsboka, og det var godt med folk på Ulstein bibliotek då forfattaren Arne Flatin presenterte det siste verket sitt, Hundre Hødd-historier – 1919-2019. I høve lanseringa hadde Flatin fått med seg fire av dei mange personane han hadde snakka med i arbeidet med å skrive boka: Herleiv Saunes, Tom Vågen, Annlaug Sundal og Vegard Heltne.

Haddal IL markerte 50-årsjubileum i september 2018 – mellom anna med å arrangere løpet Garnestua opp. Haddal IL vart starta 25. mai 1968. I 2018 hadde klubben seks lag i aldersbestemt fotball, i tillegg til ei trimgruppe som stod bak den populære Fjelltrimmen.

Nyttårskonserten har blitt eit innarbeidd omgrep og fast årleg arrangement i Ulstein. I det siste året i denne tiårsperioden, 2019, vekte korpsa HDU og Ulf godkjensla hos publikum endå ein gong. Den 12. januar samla korpsa to fulle salar på Sjøborg, slik dei hadde gjort år etter år. Dirigentar var Frode Dalhaug og Jette Hougaard Holstad. Men seg dette året hadde dei tenoren Marius Roth Christensen og barytonen Yngve Søberg. Konferansier var Kjersti Kleven, slik ho hadde vore det i fleire år.

Ungdommens kulturmønstring hadde også blitt ein langvarig tradisjon i Ulstein, ofte i samarbeid med Hareid, slik som i den siste utgåva av det tiåret denne boka no er inne i, 2019. Denne gongen var det rekordstor påmelding med 40 ulike sceneinnslag, i tillegg til kunstutstilling. Fire ungdommar var konferansierar, og arrangementet samla mykje folk på Sjøborg.

Under den siste kvinnedagen i tiåret, 8. mars 2019, vart to trufaste tenarar innan frivillig arbeid heidra med Kvinneprisen, sanitetskvinnene Solveig Kristensen og Heidi G. Ulstein. Begge hadde vore aktive i Ulstein sanitet i mange år. Dei to kvinnene hadde også utført mykje anna frivillig arbeid. Dette året var det Ulstein sanitet som stod som arrangør for kvinnedagen, eit ansvar som går på omgang mellom ulike lag og foreiningar i Ulstein og Hareid. Om lag 200 menneske hadde funne vegen til arrangementet ved Sunnmøre Folkehøgskule denne dagen. Generalsekretær Grete Herlofson i Norske Kvinners Sanitetsforening heldt hovudtalen.

I november 2019 kom jubileumsboka, og det var godt med folk på Ulstein bibliotek då forfattaren Arne Flatin presenterte verket sitt, Hundre Hødd-historier – 1919-2019.

I 2011 var det tid for det som skulle bli heitande Smak av Ulstein. Denne første gongen varte arrangementet frå 9. til 11. juni. Smak av Ulstein tok over etter det som i mange år heitte Ulsteindagane. Her var det smakebitar av kva Ulstein hadde å by på, både kulturelt og i matvegen. Både utestader og kulturinstitusjonar la seg i selen. I tillegg kunne kommunen skilte med trekkplaster som Alex Rosén, Ole Børud og Fredrik Steen.

Smak av Ulstein var innarbeidd som fast arrangement i Ulstein gjennom fleire år, og tidlegare gjennom Ulsteindagane, som første gongen vart arrangert tidleg på 1980-talet. Her tek vi med litt om det siste arrangementet i det tiåret vi skriv om i dette hovudkapitlet, Smak av Ulstein 2019. Denne utgåva vart prega av tre store idrettsarrangement for born og ungdom med over 1000 tilreisande: – Vi har lagt vekt på at det skal vere mange aktivitetar. Målet har vore å skape ein festival med liv og røre. Til meir folk vi kan få til Ulsteinvik desse dagane, til betre er det. Vi vil gjerne vise fram dei flotte anlegga våre, fortalde kultursjef Leif Ringstad til lokalavisa. Han utgjorde spydspissen i arrangementet saman med Kristine Brungot og Annika Brandal på kulturkontoret. Festivalen baud på handballcup i Ulstein Arena, og same stad var det symjestemne, medan turnarane samla seg til konkurransar i Ulsteinhallen ved Høddvoll. På festivalprogrammet elles stod mellom andre operasongaren Bror Magnus Tødenes, Kjell Elvis, Dance With the Stranger og ei rekke lokale korps, kor og aktørar.

Den 23. juni 2019 var det klart for den tiande kunstfestivalen Go With the Flø. Jubileet vart markeret med kunst, musikk og rømmegraut. Kunstnar dette året var Brian Eno. Musikar Lena Nymark spelte under opninga. Jonsokkvelden feira Flø-folket på tradisjonelt vis med bål i fjøra og rømmegraut på samlingshuset Vonheim. Kunstfestivalen hadde no blitt arrangert sidan 2010 i eit samarbeid mellom gallerist Hugo Opdal og bygdefolket.

Den siste Trebåtfestivalen i det tiåret vi no skriv om, gjekk av stabelen frå 15. til 18. august 2019. Dette året, som året før, var ulsteiningen Guttorm Osnes, no busett i Ålesund, festivalkunstnar. Han stilte ut over 50 måleri. Osnes arbeidde som kunstnar på heiltid. I spissen for Trebåtfestivalen stod no ekteparet Line Urke og Hugo Antonsen, med Line som festivalsjef. Festivalen i 2019 samla mykje folk og presenterte eit rikhaldig og folkeleg program.

Rett før jul i 2007 gjekk den 10. julenattinéen av stabelen. Arrangementet hadde blitt godt innarbeidd og samla eit stort publikum til to framsyningar i Ulstein kyrkje. Mellom aktørane denne gongen var Christoffer Masters frå Flø, Aase Styve, Gunn Marthe Veddegjerde Pieroth, Atle Remøy, Mia Constance Årdal og Ingrid Støylen Runde. Kapellmeister var Jan Thormodsæter.

Eit anna tradisjonsrikt arrangement var Julenattinéen i Ulstein kyrkje rett før jul. I desember 2019, den siste nattinéen i tiåret, slo lokalavisa fast at arrangementet ikkje hadde blitt utslite. Her var det igjen eit stort oppbod av lokale artistar som baud på song og musikk som det høvde seg ein førjulskveld. Og igjen var kyrkja stappfull på begge framsyningane. Mellom aktørane var Ann Cesilie Skundberg, Iris Tangen, Trude Håkonsholm, Mari Ann Vattøy, Magne Grimstad jr, Oddlaug Grimstad, Øyvin Sønnesyn og songgruppa systrene Bjerkvik – mellom andre.

I slutten av oktober 2019 kjøpte Ulstein kommune eigedommen Petterbakken i Gjerdegata i Ulsteinvik sentrum for 1,2 millionar kroner. Kommunen åtte løa i tunet frå før. No skulle tunet førast over til ei stifting, og Ulstein historielag ville stå sentralt i arbeidet med å få stiftinga i stand. Tanken var at Petterbakken skulle bli eit bygdetun som innbyggjarane kjende eit eigarforhold til.

Tysdag 3. desember 2019 døydde Ragnar Ulstein 99 år gammal. Krigsveteranen, historikaren, journalisten og forfattaren vart fødd i 1920 i Ulstein. Under andre verdskrigen var Ulstein med i Kompani Linge. I åra etter krigen dokumenterte han krigen og motstandskampen gjennom ei rekke bøker. Ulstein vart gravlagd frå Spjelkavik kyrkje i Ålesund 13. desember.

Artikkelforfattar

Asle Geir Widnes Johansen

Asle Geir Widnes Johansen er fødd i 1954 og bur i Ulsteinvik. Utdanna adjunkt og bedriftsøkonom. Jobba i fleire år som lærar på Ulstein ungdomsskule. Arbeidde deretter som journalist og seinare som redaktør i Vikebladet i over 20 år.

Om noko i artikkelen er feil eller du har tilleggsopplysningar eller aktuelle bilde, så er det fint om du melder til post@ulsteinhistorielag.no

Pluss-medlem

Medlemskap i Ulstein Historielag
Årleg utgåve av tidsskriftet Levd liv
Digital tilgong til alle artiklar