– Det er ingen diskusjon lenger, spør du meg, vi må innføre eigedomsskatt, meinte rådmann Einar Vik Arset då han orienterte det nye kommunestyret om arbeidet med budsjettet for 2016. Rådmannen viste til at tidene hadde blitt trongare for næringslivet og at kommunen neppe ville få like gode inntekter dei neste åra. Dette var 4. året på rad at Vik Arset tok til orde for eigedomsskatt i Ulstein. Han meinte gevinsten første året ville lyde på vel 13 millionar kroner.
I slutten av november 2015 flagga ordførar Knut Erik Engh (Frp) at han gjekk inn for eigedomsskatt: – Partiet vårt har diskutert saka og kome fram til at det ikkje er anna råd, sa Engh til lokalavisa og viste til at kommunen innan kort tid ville hamne i ei likviditetskrise: – Det er betre å innføre eigedomsskatt no enn å vente på smellen, meinte Engh. Men då saka kom til formannskapet, var det berre Engh som røysta for. I kommunestyret røysta fleirtalet for å ikkje føre inn eigedomsskatt no.
Ni politikarar røysta imot då Ulstein kommunestyre vedtok at et skulle innførast eigedomsskatt frå 2018. Det var eit forslag frå Frp, Ap, KrF og Sp som avgjorde saka då politikarane handsama økonomiplanen og budsjettet. Verken Høgre eller Venstre ville ha eigedomsskatt. Det var varaordførar Steinar Torvik (KrF) som la fram fellesframlegget frå Frp, Ap, KrF og Sp om eigedomsskatt. Torvik slo fast at det hadde vore eit krevjande arbeid å kome i mål med budsjettet: – Med eit venta underskot for 2017 på om lag 10-11 millionar kroner, og nye utlegg for kommunen i 2018 var alternativet å redusere mange tiltak til eit minimum, forklarte Torvik ifølgje lokalavisa. Ordførar Engh (Frp) peikte på at partiet i valkampen hadde slått fast at dei ikkje kunne sjå bort frå at det ville bli eigedomsskatt. – For vår del var det avgjerande at vi framleis skulle ha musklar til å utvikle kommunen, sa han.
På grunn av uvisse mellom anna omkring grunnlaget for skatteutrekninga vart det kalla inn til ekstraordinært kommunestyremøte 28. desember 2017. Fleirtalet gjekk då på nytt inn for eigedomsskatt, og i april 2018 starta skattetakstnemnda feltarbeidet sitt for å taksere eigedommar for å finne ut eigedomsskatten. Leiar for nemnda var Olav Sæter.
Det var ikkje berre politikarane som debatterte eigedomsskatten. Mange i lokalsamfunnet engasjerte seg, og i lokalavisa har innlegga halde fram heilt til skrivepunktet i 2021. Hovudargumenta har vore det vi kan kalle påstanden om økonomisk vanstyre i kommunen, og at eigedomsskatten er ein usosial skatt – som kan råke hardt hos familiar med hus, men med låg inntekt. Likevel, frå 2018 vart det eigedomsskatt for ulsteiningane. Kommunen hadde no ei totalgjeld på 1,5 milliardar kroner.
I slutten av juni 2018 sende Ulstein kommune ut brev om kor mykje kvar enkelt skulle betale i eigedomsskatt. Skattesatsen var på to promille av bustadverdien. I mai 2019 kunne ordførar Knut Erik Engh informere kommunestyret om at kommunen hadde gått 14 millionar kroner i minus utan eigedomsskatt. I 2020 vart satsen senka til 1,75 promille, men samtidig vart botnfrådraget teke bort
