Torsdag 8. januar 2015 var det offisiell opning av den nye, store Ulsteinhallen. Hallen hadde vore opna for aktivitetar før dette, men no skulle det formelle på plass. Først var det talar og omvising for dei mange aktørane som hadde vore involverte i prosjektet.
Politikarar frå kommune og fylkeskommune, representantar for ulike idrettslag, Dimna IL og Hødd, idrettskrinsen, leiinga ved Ulstein vidaregåande skule og diverse leverandørar, og ikkje minst han som hadde teikna det nye store bygget, arkitekt Georg Grimstad: – Dette blir eit landemerke, eit bygg for framtida til Ulstein-samfunnet, kommenterte Grimstad i samtale med lokalavisa.
Fylkesordførar Jon Aasen (Ap) la i sin tale vekt på at den nye Ulsteinhallen var eit skuleeksempel på kva ein kan få til saman. Ordførar Jan Berset (H) brukte ikkje saks, men startpistol då han opna den nye hallen.
Med eit skot i vêret sette han i gang eit heat med åtte løparar på 60 meter. Ikkje lenge etter arrangerte Dimna IL det første friidrettsstemnet i hallen, klubben hadde fått ein arena i landsmålestokk. Og i starten av mars skulle Dimna IL arrangere det største innandørsmeisterskapet i landet, Ungdoms-NM i friidrett innandørs. Klubben venta storinnrykk og hadde mobilisert over 150 frivillige til å hjelpe til med arrangementet.
Karsten Warholm markerte seg i stemnet, og Ulstein kommune gav Dimna IL kulturprisen for 2014. Dimna IL-nestor Olav Hansen tok imot prisen på vegner av laget, diplom og 20.000 kroner. Kommunen gav prisen i eit samarbeid med Sparebanken Møre og Nordea. Olav Hansen fekk også fortenestemedaljen til friidrettsforbundet under tinget i mars 2015.
