Ulstein veks fram

Utvikling, folketal, hendingar frå 2005 og dei næraste åra

Oppretta: 16.06.2025

Ved stortingsvalet hausten 2005 vart det regjeringsskifte, og den raud-grøne regjeringa med Ap, SV og Sp tok over under statsminister Jens Stoltenberg. Ytre Søre Sunnmøre vart det reine Frp-land. I Ulstein fekk partiet 25,4 prosent av røystene, Ap fekk 20,3, Høgre 19,3, KrF 16,9, Venstre 6,9, Sp 5,3, og SV 4,5.

Samtidig gjorde den gjennomsnittlege oljeprisen i Nordsjøen eit hopp frå vel 38 dollar fatet i 2004 til over 54 dollar fatet i 2005. Vidare hamna gjennomsnittsprisen per fat på 65,14 dollar i 2006, 72,39 i 2007 og heile 97,26 i 2008, trass i finanskrisa som råka verda i løpet av dette året. Norsk økonomi kom inn i ein høgkonjunktur i slutten av 2004, og den heldt fram. For område på Sunnmørskysten var høge oljeinvesteringar ei viktig drivkraft, og husstandane brukte pengar som aldri før.

Etter ein periode med stagnasjon og delvis tilbakegang på Ytre Søre Sunnmøre auka folketalet igjen utover i 2005. Ulstein voks med 36 i andre kvartal og kom opp 6822. Samtidig auka talet på menneske som trong bustadhjelp i Ulstein. Hausten 2005 fekk kommunen tilskot frå Sosial- og helsedirektoratet for å tilsetje miljøterapeutar til å hjelpe klientane. Sosialsjef Arthur Grønmyr fortalde til lokalavisa at mange i Ulstein trong hjelp både til å skaffe seg bustad og til å halde på bustaden. Sosialetaten hadde ei tid arbeidd med ein plan for bustadlause som ofte kom flyttande til kommunen frå nabokommunane. Dei fleste av desse høyrde heime i klientkategorien psykiatri og rus.

Det hadde ei tid stått strid om namnet på Dimnøya/Dimna etter at Kartverket og namnekonsulentane meinte øya heitte Dimna. Men i januar 2005 gjekk Kartverket inn for at dei to namneformene skulle sideordnast. Det betydde at den enkelte kunne bruke den forma han eller ho ville. Men sidan Ulstein kommune hadde gått så sterkt inn for Dimnøya, var det grunn til å tru at dette kom til å bli det gjengse namnet på øya, medan Dimna vart oppfatta som namnet på grenda på utsida av øya. Med det oppheva Kartverket vedtaket om Dimna og sidestilte dei to namna.

I januar 2005 kunne lokalavisa slå fast at Ulstein hadde fått den bemanninga som den offentlege tannhelsetenesta skulle ha. Midt i månaden opna distriktstannklinikken offisielt i det nye bygget i Kyrkjegata, og to nye tannlegar var på plass.

Rundt 2005 var Flø i ferd med å vekse fram til det vi kanskje kan kalle ein kultstad. Våren 2005 var seks familiar og einslege i ferd med å reise husa sine ute i havgapet. Alle nybyggjarane kunne fortelje til lokalavisa at dei var spesielt glade i lyset og havet. Eit fellestrekk med husa var store vindaugsflater og god utsikt mot bølgjene: – Eg ser ikkje dette som ein trend eller ein moteting. Tvert om. Eg meiner det heller er ein trend når folk heile tida vel å byggje i felt eller tettstader. Eg har prøvd storbylivet. Det kan ha sine gode sider, uttalte ein av husbyggjarane, Fredrik Steen, til lokalavisa. Han satsa på Flø – for ei tid.

Våren 2005 kom det for ein dag at Ulstein-politikarane hadde opna for endå ein privat barnehage. Dei tilsette i dei kommunale barnehagane gav uttrykk for at dei frykta for jobbane sine. Den private Grønmyr Barnehage AS skulle bygge ved Høddvoll, rett utanfor den nye kunstgrasbana. Målet var å setje barnehagen i drift frå 1. januar 2006. I dag har barnehagen namnet Gnist, lever i beste velgåande og har vore med på å gi foreldre i Ulstein eit fullverdig barnehagetilbod. Kommunen gjekk inn for å legge ned Ringen barnehage så snart Grønmyr var på plass ved Høddvoll.

Samtidig bad ei gruppe foreldre i Haddal om å få frigitt ei tomt bak barneskulen i bygda med tanke på å få reist ein ny barnehage. Foreldra meinte at barnehagen som leigde lokale i klubbhuset til Haddal IL, ikkje stetta dei behova og krava som ville dukke opp i åra framover. I dag står barnehagen der og har fullt belegg.

Den private Grønmyr Barnehage AS skulle bygge ved Høddvoll, rett utanfor den nye kunstgrasbana. Målet var å setje barnehagen i drift frå 1. januar 2006. I dag har barnehagen namnet Gnist, lever i beste velgåande og har vore med på å gi foreldre i Ulstein eit fullverdig barnehagetilbod.

I mai 2005 starta ein prosess som skulle føre til endringar i skulestrukturen i Ulstein. Oppvekst- og kultursjef Leif Ringstad lanserte då idéen om å byggje ny ungdomsskule i Ulsteinvik til 75 millionar kroner, og så legge ned Eiksund skule frå same tidspunkt som den nye skulen stod ferdig. Ulstein ungdomsskule hadde lenge vore i dårleg forfatning med lekkasjar og liknande. Nedlegging av Eiksund var ein del av finansieringspakken for den nye ungdomsskulen, og med det ei overføring av Eiksund-elevane til Haddal.

Ved skuleslutt i juni 2005 kunne ordførar Hannelore Måseide skrive under avtalen som gjorde Ulstein til den 93. MOT-kommunen i landet: – Ulstein er ein ung kommune, og vi må satse på born og unge. Mykje av arbeidet kommunen gjer, viser at vi tek dei unge på alvor, meinte Måseide. Ungdomsrådet hadde vore pådrivar for avtalen. MOT er ein ideell og landsomfattande organisasjon som driv haldningsskapande arbeid retta mot born og unge mellom 12 og 20 år. MOT vart stifta i 1997 på initiativ frå dei tidlegare skøyteløparane Johann Olav Koss og Atle Vårvik. Målet til organisasjonen er å skape eit varmare og tryggare oppvekstmiljø, og vere eit verktøy for mindre mobbing, vald og rusmisbruk.

Under kommunestyremøtet 1. september 2005 takka ordførar Hannelore Måseide Johs Klungsøyr (f. 1941) som mangeårig formannskapssekretær – og dei siste åra politisk sekretær. No ville han pensjonere seg og få tid til hobbyar og andre oppgåver. Han byrja som formannskapssekretær 1. februar 1968 og hadde hatt arbeidet sitt på Ulstein rådhus i 38 år. Frå 1959 til 1968 var han distriktssekretær i Oslo postdistrikt. Johs.

Klungsøyr hadde fått med seg ei rivande utvikling i Ulstein kommune. Han hadde arbeidd under mange ordførarar – Oskar V. Sundgot, Olav B. Urke, Asbjørn Flø, Ottar Kaldhol, Arne Walderhaug, Jan Berset og Hannelore Måseide. I administrasjonen hadde han arbeidd under kontorsjef og seinare rådmann Asbjørn Waage – og rådmann Hans Jakob Sandanger. Den nye kommunelova kom i 1993. Eitt av måla var å skape eit tydelegare skilje mellom politikk og administrasjon. Dei folkevalde skulle sjølve setje dagsorden for politikken.

Arena Eigedom AS hadde fått løyve til å byggje bustader – gjerne i blokk – på Ulshaug. Dei hadde også fått løyve til å rive den gamle kvileheimen. Dette opna for privat utbygging i eit kjerneområde av kommunale helse- og omsorgstenester. Men utbygginga og disponeringa skulle skje i nært samarbeid med Ulstein kommune. No ville Arena bygge husvære for aldersgruppa over 60 år. Bustadene skulle vere sjølveigde og var meinte som eit supplement til omsorgsbustadene.

I dei gamle lokala til Vikingen Pub var det i januar 2006 klart for ungdomslokale for Ulstein-ungdommen. I tre månader hadde dugnadsgjengen pussa, slipt og måla kjellarlokalet i dei gamle publokala. Resultatet var ei tøff innreiing og fleire aktivitetstilbod. Prosjektet var eit samarbeid mellom kommunen og ungdomsrådet i Ulstein. Tidlegare hadde samfunnshuset blitt nytta til ungdomslokale. Men det hadde ikkje vore optimalt. Ungdommen ville gjerne ha ein stad der sakene deira kunne stå. Lokala vart innvigde med ein strålande opningsfest, ifølgje lokalavisa.

Så var det den nye, private barnehagen på Støylane i Ulsteinvik. Grønmyr barnehage skulle gi rom til 115 born fordelte over fem avdelingar. Det var ordførar Hannelore Måseide som fekk æra av å klippe snora. Dagleg leiar i barnehagen var Gry Nordal. Kommunen hadde no svært god barnehagedekning.

I desember 2006 flytta tidlegare Solsida barnehage frå klubblokala til Haddal IL og inn i nytt bygg like ovanfor Haddal skule. No hadde barnehagen fått namnet Blåtind. Her hadde borna god plass til å boltre seg. Dei 27 borna frå Eiksund, Haddal og Leikong spente i alder frå null til fem år. Alle gjekk i den same store avdelinga, og snart skulle der byrje to born til. Barnehagen hadde mange rom og krokar som gjorde det mogleg å ta ut ei aldersgruppe. Eitt av romma var spesielt laga for dei yngste borna. Her var leikene og inventaret tilpassa born frå null til tre år. Barnehagen hadde også ein eigen femårsklubb. Styrar var Hanne Merethe Voldnes.

Litt seinare vart Ulstein kommune ein liten barnehage mindre. Då vart den private barnehagen i Røde Kors-huset på Saunes lagt ned. – Dette er trist, kommenterte Jon Åge Eidem, far til Pernille (4), til Vikebladet Vestposten. Han skulle gjerne ha visst det før slik at dei kunne ha verva fleire born. Det var for lite støtte frå kommunen og for liten søknad som førte til at Vesleby måtte slutte. – Vi kjenner oss litt utkonkurrerte; etableringa av ein ny stor barnehage i Ulsteinvik siste året har òg vore ein av grunnane.

Eit krav frå fotballforbundet gjorde at Høddvollbarnehagen etter kvart måtte ut av Høddvollhuset og finne seg ein ny stad å vere. Barnehagen ønskte helst å byggje i nærleiken av Ulsteinhallen, men vart etter kvar vist til ei tomt i Varleite. Barnehagen hadde i januar 2007 åtte tilsette fordelt på seks årsverk. Styrar var Kathrin Rise; ho forklarte til lokalavisa at dei fleste foreldre ønskte 80-100 prosent barnehageplass for barnet sitt.

Utfyllinga av Sjøsida starta i september 2006, etter at Kystverket hadde gitt Ulsteinvik Utvikling fyllingsløyve, og kommunen hadde gitt løyve til å starte. Den første tida skjedde utfyllinga om natta. Det var for det meste tunnelmasse frå Eiksundsambandet som skulle nyttast. Området som skulle fyllast ut, gjekk frå piren ved nye Ulstein Hotell og ut til Geileneset - og ville gå 35 meter ut i sjøen. Ulstein kommunestyre utstøytte i starten av september 2006 eit rungande ja til reguleringsplanen for Sjøsida. Planen tok omsyn til både fiskeriinteresser, småbåtar og bustadprosjekt på Saunes.

Frå 1. juli 2006 vart det slutt på å vende seg til Aetat eller Trygdekontoret. No skulle etatane slå seg saman i NAV og halde til i eitt av Kleven-bygga i Ulsteinvik. Det overordna målet til styresmaktene var at NAV skulle få fleire i arbeid og færre på trygd. Det gjekk seigt.

Etter 27 års drift låste Folkeuniversitetet for Ytre Søre Sunnmøre dørene i Ulsteinvik. No skulle FUMOR, Folkeuniversitetet for Møre og Romsdal, administrere tiltaket frå kontoret sitt i Spjelkavik. Frida Hatløy hadde leia kontoret i Ulsteinvik i over 20 år. Ho meinte aktiviteten hadde teke seg opp siste halvåret.

Årsmøtet i Ulstein samfunnshus AL i april 2006 vart eit historisk møte. Forsamlinga vedtok å selje samfunnshuset og samtidig avvikle lutlaget. Oppvekst- og kultursjef Leif Ringstad i Ulstein såg alt i 2006 for seg at kommunen kunne reise eit bygg med idrettshall, badeland og bibliotek i området ved samfunnshus-tomta. Oppvekst- og kulturetaten hadde no sett i gang ein prosess som kunne ende i eit slikt bygg; det som seinare skulle bli Ulstein Arena. Ringstad vart ein pådrivar for tiltaket.

Ulstein dagsenter skifta i april 2006 namn til Ulstein sanse- og aktivitetssenter. Namnebytet kom etter eit ønske frå dei tilsette. Dagleg leiar Renathe Rossi-Kaldhol og resten av dei tilsette meinte det nye namnet fortalde meir om dei tenestene senteret baud på. Senteret var eit tilbod til brukarar med ulike funksjonshemmingar og kunne by på mange ulike aktivitetar, mellom anna kreative formingsaktivitetar og arbeidsaktivitetar som klesvask, plenklipping og luking av ugras. Senteret hadde også ei turgruppe og ei song- og musikkgruppe, og eige kjøkken der brukarane kunne vere med å lage mat, og dessutan eigen kafé.

Aldri før hadde Ulsteinvik sentrum endra seg så raskt som i åra frå kring 2005/6 og utover. Planlagde bygg voks opp som paddehattar. Landskapet og utsikta vart annleis for kvar veke. Mellom bygga som reiste seg utover i 2006, var det nye hotellet med kulturhus og den massive utvidinga av Blåhuset. På Geileneset vart det fylt ut i sjøen. Her skulle mellom anna Snorrebuda flyttast og ligge litt annleis. I Brattøra bygde dei kontor- og butikklokale. På Saunes hadde Lidl-butikken etablert seg i nytt bygg. Men enkelte meinte at det var i ferd med å bli for mange butikkar og for hard konkurranse i Ulsteinvik. Ei av dei var Sissel Breivik som hadde drive Ulstein Sko ei tid. No var butikken konkurs, og Breivik hadde fått erfare at fire skobutikkar var for mange i Ulsteinvik.

I 2005 vedtok kommunestyret ny ungdomsskule i Ulsteinvik, og han skulle koste om lag 75 millionar kroner. Sommaren 2006 hadde skulen blitt 50 millionar dyrare, altså 125 millionar. Politikarar var redde for at kostnadsramma ville sprekke på ny. Finansieringa av skulen skulle leggast inn i økonomiplanen for 2007-2010.

I november 2006 bestemte politikarane i Ulstein seg for at Eiksund skule skulle leggast ned, og elevane flyttast til Haddal. Planen var å legge ned skulen frå 1. august 2007. Frå same dato skulle Haddal og Eiksund skulekrins opprettast. Eiksund bygdelag hadde kritisert kommunen for planane om å legge ned skulen i bygda. Det vart også arrangert folkemøte om saka med om lag 30 personar i salen. Den 20. juni 2007 var den siste dagen for elevane ved Eiksund skule.

Utfyllinga av Sjøsida starta i september 2006, etter at Kystverket hadde gitt Ulsteinvik Utvikling fyllingsløyve, og kommunen hadde gitt løyve til å starte. Den første tida skjedde utfyllinga om natta. Det var for det meste tunnelmasse frå Eiksundsambandet som skulle nyttast. Området som skulle fyllast ut, gjekk frå piren ved nye Ulstein Hotell og ut til Geileneset – og ville gå 35 meter ut i sjøen. Ulstein kommunestyre utstøytte i starten av september 2006 eit rungande ja til reguleringsplanen for Sjøsida. Planen tok omsyn til både fiskeriinteresser, småbåtar og bustadprosjekt på Saunes.

Eit tiltak som har fått mykje merksemd dei siste åra, Runde Miljøsenter, har røtene sine attende i 2004/6. I oktober 2006 var aksjekapitalen på plass til forskingsstasjonen på Runde. Eit mål var å knyte kontakt mellom forskarar og lokal industri. Det var fiskeribiolog Nils-Roar Hareide (Ulstein) og kona, biolog Greta Garnes, samfunnsvitar Hans Petter Runde og oceanograf Lars Golmen som stifta Runde Miljøsenter AS i 2004, som skulle leige bygget og drive forskingsstasjonen. Bak aksjeselskapet Runde Miljøbygg AS stod Jets, Rolls-Royce, Marin Teknikk, Havila, Olympic Supply, Prosjektbygg, Herøy kommune og fylkeskommunen – saman med Runde Miljøsenter.

I oktober 2006 godkjende Ulstein kommunestyre kjøpsavtalen mellom Arena Eigedom Ulsteinvik AS og eigedomsselskapet til kommunen. Det var i 2005 at Arena ville kjøpe tomta på Ulshaug der den gamle kvileheimen stod. Dei ville rive bygget og byggje bustader for aldersgruppa over 60. Slik skulle det bli; ei bustadblokk med om lag 20 bustader i ulike storleikar.

I februar 2007 var rivinga av kvileheimen i gang. Det var Ulstein Betongindustri som utførte jobben til om lag 570.000 kroner. Arena Eiendom Ulsteinvik AS hadde kjøpt tomta for å byggje seniorbustader der. Det var kommunen som kosta rivinga.

Hausten 2006 vart det kjent at Orkla Media-konsernet ville selje avisene sine, mellom desse Vikebladet Vestposten, til det britiske selskapet Mecom. Mange var kritiske til dette salet, og ein av dei var Kåre Willoch. Han talte på Hareidsstemna i oktober 2006 og kom mellom anna inn på nasjonalt eigarskap. Salet av Orkla Media var han svært kritisk til: – Er det ikkje slik at Vikebladet Vestposten også blir selt til England, spør Willoch den lokale journalisten, som stadfester salet. – Uff. Det er viktig at meiningsdannande media er norske. Det er svært uheldig at utlendingar skal få innflyting på meiningsdanninga i Noreg og få rett til å tilsetje redaktør, slo den tidlegare statsministeren fast.

Mange såg det nok som eit framsteg då kommunestyret i oktober 2006 godkjende at Ulstein skulle gå over til bossdunkar i staden for ordninga med sekker. Tidlegare hadde Herøy gjort det same. Etter kvart følgde også Hareid og Sande etter. Bossdunkane i Ulstein vart delte ut i juni 2007.

Samtidig vedtok Ulstein kommunestyre å kjøpe Ulstein samfunnshus for 2,6 millionar kroner. Målet for kommunen var å byggje idrettshall, badeland og kanskje bibliotek på tomta. Litt fram i tid såg så Ulstein Arena dagens lys, eit praktbygg i Ulsteinvik sentrum, men til ein nokså tung kostnad. Midt i desember 2006 snurra den siste filmen på Ulstein samfunnshus etter 45 år med kinodrift. No var det ikkje mogleg å gå på kino i Ulsteinvik før kulturhuset opna våren 2007.

I januar 2007 var Sunnmøre Folkehøgskule definitivt på plass i gamlehotellet i Varleite. Pianobaren hadde blitt kantine; det einaste som kunne tappast der, var mjølk. Ulstein Dancing var gjort om til SUFH Dancing, og Farmann var skapt om til kapell med utsyn mot himmel og hav. Ei 89-årig historie på Reiten var broten. Skulen hadde no 73 elevar, og Trond Berg var rektor.

Ved inngangen til 2007 kunne folk i regionen framleis gle seg over at næringslivet blomstra, oppdraga stod i kø, og dette perspektivet bora seg lengre inn i framtida enn det som hadde vore vanleg i eit syklisk næringsliv ved tidlegare årsskifte. Dessutan var bygdebyane på Søre Sunnmøre prega av endringar og utvikling, store byggjeprosjekt frå 2006 ville bli fullførte i 2007, og i løpet av året ville nye kome til: hotell, kulturhus, handelshus, skular, hallar for bading, fotball og annan idrett – og ikkje minst ei endelaus rekke av store bustadprosjekt. Det største lokale prosjektet var naturlegvis Eiksundsambandet – som vart offisielt opna i februar 2008. Då skulle bilane rulle og knyte regionen tettare saman.

Så var det utviklinga i næringsliv og bustadmarknad: Overskriftene hadde veksla med konjunkturane når avisene skreiv om norsk industri. I starten av 2007 var det ikkje mange åra sidan det handla om utflagging og nedlegging. No var optimismen stor og utsiktene lyse. Industrien gjekk så det gneistra. Slik også Ulstein-regionen. Men dei gode tidene pressa også bustadprisane i Ulsteinvik til himmels. Det gjaldt ofte også leigekostnadene. Særleg unge menneske sleit med å kome inn på bustadmarknaden. Men arbeidsløysa var rekordlåg. I april 2007 var ho på 1,8 prosent i regionen, medan Ulstein var heilt nede i 1,5 prosent, 21 menn og 29 kvinner. Samtidig frykta Fellesforbundet at den massive arbeidsinvasjonen skulle øydelegge for den norske modellen. I desember 2007 hadde arbeidsløysa i Ulstein kome ned i rekordlåge 0,9 prosent. I Hareid var ho 1,4 prosent, til saman 33 arbeidslause i dei to kommunane.

Eit oversiktsbilete i lokalavisa i mars 2007 demonstrerte den store byggjeaktiviteten i Ulsteinvik: G. Eilertsen utvida bilforretninga, bustadblokka på Geileneset skaut i veret, Hauge Eigedom midt i sentrum bygde på to etasjar, Blåhuset utvida, den gamle kvileheimen var riven og gjorde det klart til at Arena Eiendom Ulsteinvik kunne reise ei blokk med seniorbustader, keramikaren Susanne Fagermo hadde kjøpt den gamle tannlegestasjonen som stod i Bjørndalsvegen og flytta bygget til Saunesmarka. No stod berre murane att, Nor Teknikk og Nor Hus arbeidde saman om eit nytt byggjefelt med 30 bustader i Hofsetmarka, kjøpesenteret Amfi på Brattøra utvida med 3000 kvadratmeter, samtidig reiste Borgstein eit stort bygg ved Bjørndalsvegen, her skulle mellom andre Medi 3 få plass; i Saunesosen reiste det nye hotellet og kulturhuset seg, ei stor bustadblokk voks på Saunes i regi av Vest Bygg, arbeidet med bussterminal var straks i gang og i eit av Kleven-bygga vart Aetat, trygdekontoret og sosialkontoret – til NAV.

På indre Saunes vart det som lokalavisa karakteriserte som kystens vakraste molo ferdigstilt i mai 2007. Det var Borgstein AS som stod bak utbygginga, og arbeidet hadde teke om lag eit og eit halvt år. Parallelt hadde Inge Kolås arbeidd med å restaurere Olafbuda som stod på eigedommen til Borgstein. Snart skulle det byggjast eit anlegg i tilknyting til bua.

Det var framleis vekst i folketalet. Ved årsskiftet mot 2007 hadde Ulstein vakse med 28 siste året, til 6841. Men folketalet på Søre Sunnmøre minka i 2006. Det vart 152 færre søre-sunnmøringar dette året. I Ulstein var det tilflytting, men det var først og fremst fødselsoverskotet som berga folkeauken, 81 nyfødde og 42 døde.

Den nye ungdomsskulen i Ulsteinvik kom til å bli eit staseleg bygg. Men han vart stadig dyrare. Vedtaket om å byggje lydde i si tid på 75 millionar kroner i 2005. Eit år seinare var prisen 125 millionar. I mars 2007 hadde kostnadene stige til 150 millionar kroner. Oppvekst- og kultursjef Leif Ringstad hadde lite anna å gjere enn å be politikarane auke kostnadsramma. I slutten av mars 2007 vedtok kommunestyret å byggje ein ungdomsskule til 160 millionar kroner. Den 30. mai 2007 vart spaden for det nye bygget sett i jorda. Planen var at skulen skulle stå klar til innflytting ved årsskiftet 2008/09.

Det var elles mykje diskusjon om Skulevegen eller Skulebakken forbi barneskulen og opp til ungdomsskulen. Kritikarane skulda på anleggstrafikken til den nye ungdomsskulen og uvettige foreldre som køyrde slik at det svekte trafikktryggleiken. Ein periode utover hausten 2007 tok politiet oppstilling ved Skulevegen mellom klokka åtte og halv ni om morgonen.

Fredag 12. april 2007 havarerte Bourbon Dolphin og vart liggande med botnen i vêret ved Shetland. Av dei åtte sakna var to frå Hareid og fleire frå Herøy. Tragedien gjorde eit sterkt inntrykk på heile regionen. Flagga blafra på halv stong ved reiarlagskontora i Herøy. Og mange spurde korleis det kunne skje at ein solid båt tippa rundt i løpet av nokre minutt under tilsynelatande normale arbeidsvilkår og under eit vanleg arbeidsoppdrag for eit ankerhandteringsfartøy. I Hareid kyrkje var det ei gripande minnestund søndag 14. april. Den første forklaringa på forliset var at hjelpeskipet drog i feil retning. Ankerkjettingen drog skipet mot babord side, hjelpefartøyet klarte ikkje å lette trykket på kjettingen og drog i motsett av kva båten fekk beskjed om, og då førstestyrmannen skulle trykke på emergency-knappen, verka han ikkje. Saka enda med ei bot på 5 millionar kroner til reiarlaget.

Varaordførar Olav Sæter måtte klippe seg gjennom tre snorer då han markerte opninga av det første NAV-kontoret på Sunnmøre, Ulstein NAV, i september 2007. Snorene symboliserte dei tre einingane som no vart slått saman. Ulstein kommune hadde sidan NAV-reforma vart vedteken i 2005, vore pådrivar for å etablere NAV-kontor i Ulsteinvik. No var det på plass. Trygdekontoret, Aetat og sosialkontoret var ei eining. Leiar for det nye kontoret var Anne Karin Osnes.

Artikkelforfattar

Asle Geir Widnes Johansen

Asle Geir Widnes Johansen er fødd i 1954 og bur i Ulsteinvik. Utdanna adjunkt og bedriftsøkonom. Jobba i fleire år som lærar på Ulstein ungdomsskule. Arbeidde deretter som journalist og seinare som redaktør i Vikebladet i over 20 år.

Om noko i artikkelen er feil eller du har tilleggsopplysningar eller aktuelle bilde, så er det fint om du melder til post@ulsteinhistorielag.no

Pluss-medlem

Medlemskap i Ulstein Historielag
Årleg utgåve av tidsskriftet Levd liv
Digital tilgong til alle artiklar