Kultur og folkeliv

Hødd opna i comebacket i Adeccoligaen med 2-0-siger over Sarpsborg. Rogvi Jacobsen og Joacim Magnussen scora for Hødd. Men det gjekk fort nedover. Ved inngangen til haustsesongen låg Hødd heilt sist, og etter ei tid fann ikkje styret anna råd enn å sparke trenar Sture Fladmark. Snart tok trenarduoen Einar Magne Skeide og Lars Arne Nilsen, som begge hadde hatt ansvaret for rekruttane i Hødd, over A-laget. Det skulle vise seg å vere til lita nytte. Hødd gjekk på tap etter tap, og rykte til slutt ned. Men trenarduoen Skeide og Nilsen fekk fornya tillit.

Samtidig var det klart at Ulstein-jenta Erika Skarbø skulle vere hovudkeeper for det norske kvinnelandslaget under OL i Kina i 2008. Skarbø hadde gått gradene frå Hødd via Fortuna til toppserieklubben Arna-Bjørnar. No hadde ho teke over etter Bente Nordby som førstekeeper på landslaget. 21-åringen budde for tida i Bergen, der ho i tillegg til fotballen også studerte litt. Seinare på året vann Erika to prisar for innsatsen sin: Ho vart kåra til Årets keeper i toppserien. I tillegg vann ho Statoil og Hydros pris for Årets talent.

Ulstein Motorklubb var igjen i krise. Etter 20 år med klubb vart det bråstopp når klubben per 1. mai 2008 måtte flytte ut av lokala sine hos Infra Handel i Saunesmarka. Klubben hadde no om lag 50 medlemer frå 17 år og oppover.

Golfbana i Hovdemyra i Hareid vart lansert som idé på slutten av 1990-talet. No, våren 2008, låg ei golfbane på 350 mål klar til bruk. Den 18. mai 2008 var det offisiell opning. Anlegget hadde ni hol, sju dammar, treningsfelt og klubbhus. Tore Skodjevåg var dagleg leiar.

Ulstein Indremisjon feira 125-årsjubileum i november 2008. Jubileumsfesten vart halden på Ulsteinvik bedehus. Leiar Peder Almedal ønskte salen velkomen, Agnar Dag Ulstein heldt det historiske attersynet, og songevangelisten Irene K. Alnes var mellom underhaldningskreftene. Ulstein Indremisjon heldt skipingsmøtet sitt i Osnes bedehus 5. august i 1883. I 1919 vart dette huset rive, og indremisjonen bygde det nye Ulsteinvik bedehus.

Eit spennande innslag som gjorde seg gjeldande i Ulsteinvik nokre år framover frå 2009, var den såkalla Fado-festivalen. Det var Bjarne Wærdahl som stod i spissen for tiltaket inspirert av sine kontaktar inn mot portugisisk kultur. I februar 2009 reiste han til Vigra for å hente ein delegasjon på 19 personar frå Portugal, mange av dei erfarne fado-musikarar. Festivalen skulle starte med bacalaokveld på Kaffikari med innslag av fado-musikk. Dagen etter kom også den portugisiske ambassadøren til Ulsteinvik for å slutte seg til festivalen. Gjennom tre hektiske dagar skulle folk få kunnskap om Portugal gjennom mat, vin, musikk, kunst og foredrag.

Så har vi Ulsteindagane som no hadde ein lang tradisjon i kommunen. Dei siste Ulsteindagane i det første tiåret på 2000-talet gjekk mykje etter same malen som dei siste åra: Konsertar, utstillingar, messer (dette året lystbåtmesse), streetbasket, rånetreff og rådhusrock. Mellom artistane som gjesta dagane i 2009, fann vi Tone Damli, Gisle Børge Styve og Ole Børud. Finn Egil Eide hadde utstilling på Vikholmen, og Susie Hamilton heldt utstilling i Studio Hugo Opdal på Flø.

Vi har ikkje teke med alle kulturprisane i Ulstein i denne boka. Vi skal likevel stanse litt ved tildelinga i 2009. Då fekk nemleg entusiasten og historielagsleiaren Aksel Hauge prisen for 2008. Han leia som vanleg møtet i Ulstein historielag, då ordførar Hannelore Måseide dukka opp og delte ut prisen til Hauge. Det var ikkje minst arbeidet med årsskriftet Levd liv som var avgjerande for pristildelinga. Hauge har vore primus motor i arbeidet med denne årlege boka heilt til dags dato.

I ungdomsklubben Adventura hadde det i løpet av 2009 teke heilt av. Det kunne vere opp til 70 ungdommar på klubbkveldane på Ulstein bedehus laurdagane. Det var indremisjonen og Blå kors som stod bak tiltaket. Mellom eldsjelene som dreiv klubben, var Asgeir Leirvik, Irina Leirvik, Sigve Ulstein og Peter Nygjerde. Laurdagane heldt klubben ope frå klokka 21 til 01.00.

Det var høg aktivitet og stor oppslutning om Ulstein og omegn sykkelklubb. Laurdag 25. april 2009 var det klart for det første nasjonale sykkelrittet som nokon gong hadde blitt arrangert i regionen. Ulsteinrittet 2009 gjekk rundt Gurskøya.

Kulturarrangementa på Sjøborg heldt fram med uforminska styrke. Framleis var det kulturkontoret og kommunen som stod bak. Eitt av dei store konsert-trekkplastera før jul i 2009 var den svenske songstjerna Carola. Ho skulle halde dobbelkonsert på Sjøborg. Publikum stod i kø for å få billettar, og i oktober vart det klart at Carola skulle halde fire konsertar. Det vart ei flott oppleving på Sjøborg.

Før jul i 2009 markerte Ulstein Mannskor 125-årsjubileum. Dei første øvingane starta i ei stove på Saunes i 1884; no var det Sjøborg kulturhus som danna ramma rundt jubilanten, sjølv om øvingskveldane var på Ulstein vidaregåande. Det var sjølvaste Rasofiel Rise, korsongens far på Sunnmøre, som tok på seg dirigentoppgåva i 1884; 13 mann møtte opp til første øvinga, og alt i januar 1885 song koret på ein julefest i bygda. I 2009 hadde Robert Skeide vore dirigent for koret i 33 år; frå skrivepunktet i januar 2021 veit vi at han framleis dirigerer koret. Jubileumskonserten på Sjøborg samla kring 350 menneske i november 2009.

Ein annan jubilant i 2009 var forsamlingshuset Fredheim som runda 100 år. Huset var eit produkt av Ulfstens Ynglingeforening som kom i stand i 1883. På slutten av hundreåret starta planlegginga av eit hus til foreininga, men det skulle ta nokre år før huset kom opp. Det var arkitekt Johan Osnes, opphaveleg frå Ulstein, men busett i Trondheim, som teikna Fredheim. Bygget stod ferdig i 1909, og ein av dei første leigetakarane var Sunnmøre ungdomsskule (folkehøgskule), som flytta i eige bygg i 1919. Fredheim hadde elles fleire leigetakarar på dagtid i åra framover, både butikkar og andre, og vart nytta til mange aktivitetar, både for Hødd, saniteten, kommunestyret og ymse næringsorganisasjonar, i tillegg til å vere hovudarena for kulturen i Ulstein heilt fram til samfunnshuset kom i 1961. Jubileumsfesten gjekk av stabelen tidleg i november 2009.