Skipsverfta i regionen starta 2006 med over sju milliardar kroner i ordreboka. Fleire hadde byrja å snakke om at ordrefesten snart ville vere over. Men forskingsleiar Oddmund Oterhals ved Møreforsking trudde ikkje på noko krakk. Bodskapen hans var at verfta ville ha god ordreinngang i fleire år framover. Slik vart det. Ordrane strøymde inn. Ulstein hadde tre milliardar i ordrereserve, Kleven to milliardar. Dette skulle auke. Ulstein teikna til dømes ein kontrakt med Olympic på 1,3 milliardar i desember dette året. Ein større boom hadde den lokale skipsindustrien aldri opplevd. No investerte Kleven også i bedding og ny hall. Ikkje lenge etter tinga Rem Maritime to nye skip ved Kleven.
Det var verkeleg gyldne tider for skipsverfta. Det var nok med på at Gunvor Ulstein vart kåra til Årets forretningskvinne i Noreg av den franske champagneprodusenten Veuve Clicqout. Dei gode tidene i den maritime næringa – saman med høg byggjeaktivitet – førte også til topptider for hotella utover i 2006. Både Hareid Hotel og Ulstein Hotell var smekkfulle på kvardagane.
Arbeidarane ved Kleven sperra auga opp då direktør Ståle Rasmussen kalla inn til morgonmøte i kantina i slutten av oktober 2006. Kleven Maritime skulle byggje seks pluss seks fartøy til reiarlaget Siem Offshore i Kristiansand. Den samla kontraktsummen var på 7 milliardar kroner: – Kontrakten er ei tillitserklæring til heile Kleven-laget, slo Rasmussen fast, og fekk klappsalvar tilbake frå dei mange i kantina. Verftet hadde frå før fire kontraktar med Siem Offshore. Ikkje lenge etter, i desember 2006, kunne Kleven skilte med ordrar for ni milliardar kroner og 29 skip i ordreboka. Oppgåva no var å skape overskot av alle oppdraga.
Den siste veka i oktober 2006 hadde vorte ei historisk veke. Først bad Siem Kleven byggje seks store ankerhandteringsfartøy – med opsjon på seks til. Så tinga Farstad Shipping fire skip med UT-design, noko som gav Rolls-Royce den største offshore-ordren sin nokon gong. På toppen vart veka krydra med dobbel Bourbon-dåp ved Ulstein Verft. Og det skulle ikkje slutte her. Den høge oljeprisen skapte boom i offshore-reiarlaga og overrisla så vel utstyrsleverandørar som verft. Men det var stor konkurranse om fagfolka, og det kan hende at enkelte medarbeidarar shoppa litt rundt i ulike bedrifter og hausta betre lønnstilbod. Bedrifta Servi Technics på Skeide var i 2006 nøydd til å takke nei til kontraktar på 15 millionar kroner fordi dei mangla fagfolk. Av ei årsomsetning på 45 millionar kroner var dette ein stor sum. Bedrifta hadde søkt etter fagarbeidarar over heile landet og på nettstader i Sverige. Men i oktober 2006 hadde resultatet blitt berre eitt napp. Mangelen gjorde at bedrifta ikkje fekk vekse slik ho ville.
Ingen land i verda hadde tent så mykje på globaliseringa som Noreg. Det hevda sentralbanksjef Svein Gjedrem i talen sin i Herøy kulturhus i desember 2006. Også auka produktivitet hadde slått positivt ut for norsk økonomi. Verdiskapinga per time hadde vakse med fem prosent, og norske hushaldningar var dei mest optimistiske i verda. Det hadde vore sterkt vekst i inntektene, og folk brukte pengar til privat forbruk. No gjesta Gjedrem ein vibrerande region nesten utan arbeidsløyse og med behov for arbeidskraft. Løysinga vart arbeidsinnvandring, spesielt frå Polen.
Island Offshore tinga i april 2006 eit skip av det nye X-bow-designet til Ulstein. Båten var eit konstruksjonsfartøy, og kontakten lydde på 600 millionar kroner. – Vi liker å skilje oss ut og vere litt annleis, forklarte direktør Håvard Ulstein i Island Offshore til lokalavisa. Reriarlaget ville tilby nyskapande, effektive skip. Den nye båten skulle vere vel 120 meter lang, ha ei breidde på 25 meter og dødvekta var på 8700 tonn.
Ei anna bedrift som siglde i medvind desse åra rundt 2005/6, var Mare Safety. I september 2006 skreiv bedrifta til dømes ein kontrakt med Simon Møkster Shipping om å levere fem mobbåtar til ein verdi på 20 millionar kroner. Båtane skulle Mare byggje hos Holen AS i Langevåg. Mare Safety hadde fleire gonger tidlegare levert bysseutstyr og mobbåtar til Simon Møkster Shipping.
