I februar 2007 opna Adventura IUF dei nye klubblokala sine i Ulstein bedehus. Sidan september 2006 hadde medlemene i den kristne ungdomsklubben lagt ned eit omfattande dugnadsarbeid for å pusse opp huset: – Det kjennest godt å vere på plass, fortalde Asgeir Leirvik, vaksenleiar i klubben saman med Sigve Ulstein og Irina Leirvik. Indremisjonens Ungdomsforbund (IUF) i Ulstein hadde eksistert i mange år. I 2000 vart foreininga med i Adventura, ungdomssatsinga til fråhaldsorganisasjonen Blå Kors. Til no hadde Adventura halde til i kjellaren på Ulsteinvik bedehus, eit lokale dei hadde vore nøydde til å dele med mange andre.
I august 2007 var det nye orgelet i Ulstein kyrkje i ferd med å kome på plass. Orgelbyggar Matthias Becker hadde kome til Ulsteinvik og starta monteringsarbeidet. Målet var å vere ferdig innan 15. september. Arbeidet med orgelet starta alt i januar dette året, og Ulstein kommune hadde løyvt 860.000 kroner til ombygginga. På gudstenesta i Ulstein kyrkje søndag 23. september 2007 kunne kantor Ståle Helvig benke seg ved det ombygde orgelet og glede kyrkjelyden med skikkeleg orgelbrus att. Kantoren var nøgd med instrumentet.
Arrangementet Jazz & Koral vart arrangert for første gong i Ulstein kyrkje i september 2007. Publikum tok godt imot konserten, og arrangementet har vore eit fast innslag i kyrkja sidan. Konserten var samansett av vakre salmar og jazzlåtar. Mellom dei artistane som har følgt arrangementet heile vegen, var Ståle Helvig og Rune Ertesvåg (gitar).
NMS Gjenbruk i Ulsteinvik opna 24. november 2003. No i november 2007 markerte butikken femårsjubileum. Dei hadde hatt ei jamn auke år for år. Til butikken kom mange berre for å gå på oppdagingsferd mellom hyllene. Brått kunne dei kome over spesielle ting som var verdt å samle på, gamle vakre ting, eit koppeservise, rimelege lampar eller møblar. Butikken bogna. Mange hadde møblert hytter, hyblar og barnerom med møblar frå bruktbutikken. Alt arbeid ved butikken var gratisarbeid; dugnadsånda var stor. Om lag 30 personar var faste medarbeidarar, fleire av dei over 80 år. Overskotet frå butikken gjekk til Det Norske Misjonsselskap og arbeidet med prosjekt i utviklingsland. Fram til no hadde overskotet vore på kring ein million kroner. Det var Karin Ertesvåg og Inge Kaldhol som hadde stått i spissen for å få tiltaket i gang.
I november 2007 opna Ulstein kyrkje dørene sine til katolsk messe for polakkar. Det hadde vore utenkeleg nokre tiår tidlegare. Ved Kleven Maritime og i Ulsteinkonsernet arbeidde det no 770 polakkar, dei fleste katolikkar, og mange av dei sakna å kunne gå til katolsk messe. No hadde bedriftene i samarbeid med verkstadforeininga (Mafoss) fått lov til å bruke Ulstein kyrkje, Hasund bedehus og Gursken kyrkje til katolske gudstenester.
Rett før jul i 2007 gjekk den 10. julenattinéen av stabelen. Arrangementet hadde blitt godt innarbeidd og samla eit stort publikum til to framsyningar i Ulstein kyrkje. Mellom aktørane denne gongen var Christoffer Masters frå Flø, Aase Styve, Gunn Marthe Veddegjerde Pieroth, Atle Remøy, Mia Constance Årdal og Ingrid Støylen Runde. Kapellmeister var Jan Thormodsæter.
