Det finst årstal og datoar som skjer seg inn i historia som eit barberblad og deler henne i eit før og eit etter. Tysdag 4. mai 1999 er ein slik dato i lokalhistoria. Bygda vart aldri den same.
Då gjorde Vickers opp for aksjane i Ulsteinkonsernet, og aksjonærane fekk utbetalt til saman om lag 3,9 milliardar kroner. Ifølgje Dagens Næringsliv fekk kommunen 35 nye millionærar og var like etter tusenårsskiftet opp i over 200 slike. Etter skatt sat kvar av dei seks greinene i Ulstein-familien att med godt og vel 400 millionar kroner. Konsernsjefen i Vickers, den belgiske baronen Paul Buysse, som i løpet av forhandlingane hadde utvikla eit vennskap med Idar Ulstein, var på plass i Ulsteinvik og heiste det britiske flagget på Vikholmen.
To dagar seinare kunne lokalavisa fortelje at den nye konsernsjefen til Vickers Ulstein Marine Systems var Morten Ulstein (46). Sidan 1995 hadde han vore konserndirektør for området propellar i Ulstein. Bård Mikkelsen gjekk dermed av etter å ha vore sentral i forhandlingane med britane. Samtidig jobbar leiinga for å tilpasse Ulstein Verft til ei ny tid. Det blir no klart at det i denne omgang skulle bli slutt på seksjonsbygginga i Ulsteinvik. Stålarbeidet skulle skje ved Ulstein Vanylven; 50 tilsette i stålavdelinga miste jobben.
Arbeidsløysa på Ytre Søre Sunnmøre hadde skote fart, og auka med nesten 70 prosent på eit år. Ved utgangen av juli 1999 var det 434 arbeidsledige i regionen, 84 fleire enn månaden før, ei arbeidsløyse på 3,3 prosent mot 2,4 prosent på landsplan.
