Sidan starten av april 2004 hadde reiarlaget Island Offshore i Ulsteinvik nærast i det stille rusta seg opp til å bli verdsleiande innan brønnvedlikehald med skip som var klassifiserte som flytande riggar. Men sjølv om brønnvedlikehald hadde stor merksemd, la dei like stor vekt på dei andre avsnitta i reiarlaget.
I mai 2008 stod internasjonal presse og studentar frå ulike høgskular nærast i kø for å observere det siste bygget frå Ulstein Verft, eit fartøy til Island Offshore. Heile 15 utanlandske journalistar frå maritime tidsskrift og magasin kom til Ulsteinvik for å sjå Island Constructor, det nydesigna skipet som Ulstein Verft hadde bygd. Informasjonsleiar Lene Trude Solheim i Ulsteinkonsernet slo fast overfor avisene at interessa for å sjå skipet var enorm. Nesten dagleg kom det grupper frå høgskulemiljø og næringsliv for å få omvising om bord. Då verftet inviterte til ope skip i mai 2008, var det reine folkevandringa. Kring 5000 personar var om bord i løpet av dagen. I slutten av august 2008 vart Island Constructor kåra til årets skip av eit viktig offshore-magasin.
Kontraktsboomen gav seg ikkje med dette. Ulstein Verft og Remøy Shipping teikna til dømes ein kontrakt på 800 millionar kroner i slutten av mai 2008. No skulle verftet byggje to miljøvennlege plattform-forsyningsskip (PSV). Skipa var teikna av Ulstein Design og skulle leverast i 2011.
Synet på yrkesmessa hadde kanskje endra seg litt i positiv retning då messa vart avvikla i starten av februar 2008. Organisasjonssjef Torild Bugge i Ulsteinkonsernet fortalde til lokalavisa at det hadde vore ei god messe for dei. Ho håpte no at mange unge i regionen såg sjansane og kva som var mogleg i den maritime næringa i åra framover.
Skipa som Ulstein Verft og Kleven Maritime leverte utover i 2007 og 2008 var i stor grad bygde i utlandet. Det byrja med stålkonstruksjonar, så vart heile skrog bygde ferdige i Polen og Romania. No i mars 2008 vart også rørarbeid og målingsarbeid delvis utført i utlandet. Det var ikkje uvanleg at meir enn halvparten av enkelte skip vart bygde i utlandet. Direktør Ståle Rasmussen i Kleven meinte dette var ei utvikling som berre ville halde fram. Men rekordhøg ordreinngang gjorde likevel at denne utflagginga ikkje fekk dramatisk effekt for verftstilsette i Ulstein. Større og meir avanserte skip hadde gitt meir enn nok arbeid til dei tilsette ved dei lokale verfta. Nokre år seinare vart det meir bygging av skrog og seksjonar lokalt.
Dei gode tidene gav seg utslag på botnlinja til Ulsteinkonsernet. I 2007 vart overskotet på heile 194 millionar kroner. Driftsmarginen var på nærare 10 prosent. Avgjerande for det gode resultatet var at alle skipa vart leverte til rett tid. Dei om lag 400 tilsette fekk betalt ut ein bonus på 31.000 kroner. Overskotet elles skulle konsernet nytte til å utvikle nye produkt.
Men hos Kleven var det underskot. Trass i fullspekka ordrebøker enda 2007 opp med eit underskot før skatt på 82 millionar kroner. Årsresultatet enda på minus 57 millionar. Direktør Ståle Rasmussen meinte underskotet i første rekke skuldast store forseinkingar frå leverandørar av utstyr og produksjonsteikningar frå designselskapa. Skifte av skrogverft på nokre av prosjekta hadde også ført til at Kleven og Myklebust ikkje hadde klart å levere alle skipa til avtalt tid.
Borgstein – som hadde investert både på sjø og land, fekk eit godt år i 2007. Då tala låg føre i slutten av august 2008, viste det seg at årsresultatet enda på over 104 millionar kroner.
