Ei nyheit som fekk merksemd i midten av januar 2019, var lagnaden til Kongsberg Evotec. Tysdag 15. januar sende Kongsberg Gruppen ut ei pressemelding der dei fortalde at dei hadde selt Kongsberg Evotec til investeringsselskapet Rome AS, kontrollert av ulsteiningen Jogeir Romestrand. Med dette var han tilbake i den maritime utstyrsbransjen etter nokre år med andre aktivitetar. Det høyrer med til historia at Romestrand var mellom aksjonærane i det som tidlegare heitte Evotec, som vart kjøpt av Kongsberg i 2011. No ville bedrifta, med kring 50 tilsette, få tilbake det gamle namnet sitt, Evotec. Kongsberg tok formelt over Rolls-Royce Commercal Marine i april 2019. Kjøpet førte nokså raskt til at Kongsberg Gruppen kutta 260 stillingar. Dette og ein del andre tiltak skulle spare konsernet for kring 200 millionar i året, og innan 2022 skulle innsparingane kome opp i 500 millionar i året. Om lag 100 av dei 260 jobbane vart kutta i Noreg.
Island Offshore-sjef Håvard Ulstein såg positivt på inngangen til 2019. Han hadde fått skip ut av opplag, omstillingstiltak såg ut til å fungere. Mellom anna hadde reiarlaget bygt om fartøy, og på slutten av 2018 vart det klart at Island Clipper skulle i arbeid for Equinor i tre år. Dette var eitt av fleire skip som reiarlaget hadde fått bygd om for å kunne fungere for aktuelle kundar. I eit intervju med Vikebladet Vestposten i mars dette året kunne Ulstein gle seg over at dei fleste av skipa til reiarlaget hadde kome i arbeid. Men i august 2019 overlét Håvard Ulstein sjefsjobben til Tommy Walaunet. Han hadde vore nestkommanderande i fleire år. I oktober kunne den nye sjefen sende ut ei pressemelding som fortalde at Island Offshore i løpet av hausten hadde sikra seg både små og større kontraktar til fleire av skipa sine. Sjølv om fem av båtane til reiarlaget no var i opplag, og mellom 20 og 25 tilsette ville misse arbeidet, var utsiktene for vinteren betre enn før krisa i den maritime næringa.
Mot slutten av 2018 byrja Color Hybrid å ruve ved Ulstein Verft. Over 40 meter av det største plug-in hybridskipet i verda stakk ut frå den store høghallen. Prosjektet sysselsette heile 800 menneske. Samtidig, i starten av mars 2019, kunne Ulstein kunngjere at dei skulle byggje endå eit polarskip til Lindblad Expedition Holdings. Skipet skulle byggjast i Ulsteinvik og leverast hausten 2021. I mai 2019 melde lokalavisa om fullt køyr ved Ulstein Verft, som hadde meir arbeid enn på lenge. Seinare skulle det atter vise seg at vansken var å tene pengar på oppdraga. I mai 2019 vart Lars Lühr Olsen utnemnd til ny verftsdirektør. Han erstatta voldingen Kristian Sætre. I starten av august forlet Color Hybrid Ulstein Verft.
Men uvissa omkring dei to store verfta var utover i 2019 til å ta og føle på. Ulstein Group hadde gått med underskot kvart år dei siste fire åra. I perioden 2015 til og med 2018 hadde konsernet eit samla underskot på vel 1,3 milliardar kroner. Folk i Ulstein er vane med at skipsindustrien er syklisk, og at det går opp og ned. Men slike tal hadde folk aldri sett før. I tillegg hadde Kleven tapt pengar tre år på rad med eit samla underskot på 850 millionar kroner.
Det var også uvisse kring Rolls-Royce Marine som no hadde blitt ein del av Kongsberg Gruppen. Konsernet hadde slite med svake tal etter oljeprisfallet og tapt pengar i Noreg kvart år sidan 2013. I 2018 var underskotet nesten 900 millionar kroner. I slutten av september 2019 melde Kongsberg at konsernet ville redusere talet på tilsette med 130 stillingar. Det var i hovudsak avdelingane i Hjørungavåg, Brattvåg og Ålesund som vart råka.
Situasjonen i den maritime næringa hausten 2019 var slik at berre tre offshore serviceskip var under bygging for norske reiarar, mot 63 sommaren 2014. Omstillinga hadde vore særs krevjande. Men i desember 2019 intervjua Vikebladet Vestposten konsernsjef Gunvor Ulstein i Ulstein Group. Ho var klar på at verftet på Osnes framleis skulle byggje båtar, og at bedrifta ikkje skulle seljast: – Vi skal ta oss igjennom dette, insisterte konsernsjefen. Men då tala for 2019 låg føre, viste dei at Ulstein hadde gått med over 204 millionar kroner i minus dette året.
