Andre hendingar i næringslivet

Etter fleire månader med ombygging opna Coop Mega den nye butikken sin i Blåhuset i Ulsteinvik i mars 2008. Ombygginga starta i januar. Butikksjef Sissel Kopperstad var glad for at byggetida no var over. Det hadde til tider vore nokså kaotisk i butikken. Dei siste dagane hadde butikken vore stengd, men når kundane no fekk sleppe inn, kunne dei boltre seg i ein 1100 kvadratmeter supermarknad i første etasje på Blåhuset.

Butikksenteret var no fylt opp med nye butikkar – litt etter litt. Midt i september 2008 flytta Nordea inn i fjerde etasje på Blåhuset. Heis opp gjorde det lett for kundane å kome til. Banken har halde til her til denne dag.
Så – i mars 2008 – gjorde Lidl kjent at dei ville legge ned butikken sin i det nye lokalet på indre Saunes. Lidl ville avslutte verksemda si i heile Noreg og selje butikkane til Rema 1000. Lidl hadde ikkje lykkast i den norske marknaden. No ville kjeda satse vidare i andre land der dei vart tekne imot. I september flytta Rema 1000 til det som hadde vore Lidl-butikk på Saunes. Då hadde Rema flytta to gonger sidan årsskiftet; først heldt butikken til i Sjøgata, deretter flytta dei til Nesevegen på indre Saunes, og 11. september opna dei dørene til den nye butikken sin på Saunes: – No kan vi slå oss til ro; vi har fått det slik vi vil ha det. Der finst ikkje finare butikklokale i Ulsteinvik, slo dagleg leiar Jonny Mork fast. Lidl hadde halde til i bygget sidan 2006.

May-Britt Bigset Johnsen tok i mars 2008 over Gåvebutikken til Åse Dimmen. Med det var ein lang familietradisjon over. Johnsen hadde jobba i mange år på rekneskapskontoret til Rolls-Royce, men i november i 2007 byrja ho som ekstrahjelp hos Åse Dimmen, eit samarbeid som altså resulterte i at ho tok over heile forretninga.

Den 25. april 2008 vart det liv i Snorrebuda igjen. Den gamle sjøbua i Ulsteinvik skulle romme restaurant, kafé og kulturscene. Fersk fisk stod framleis fremst på menyen. Dagleg leiar Fredrik Steen lova ufrosen fisk som aldri var meir enn 14 timar gammal og berre fiska med garn eller line, for å unngå redusert kvalitet på grunn av stressande trålfiske. Dette stod på menyen då bua vart restaurant. Golvborda i bygget var dei same som i det gamle bygget. Med på laget hadde Steen fått eit svensk-norsk kokketeam med ulsteiningen Günther Dahler i spissen. Men alt i desember 2008 var Snorrebuda AS konkurs. Dei ambisiøse planane hadde ikkje svart til forventningane, og innteninga hadde blitt for svak. Styreleiar Fredrik Steen opplyste til lokalavisa at dei den siste tida hadde jobba for å slette ein del gjeld i selskapet: – Vi hadde ei løysing som vi håpte ville redde den vidare drifta, i tillegg til å betale kreditorar, men vi fekk ikkje med oss banken på vilkåra våre, fortalde han.

Det var stadige endringar, konkursar og eigarskifte i kafé- og restaurantbransjen i Ulsteinvik. I slutten av juli 2008 fekk Kaffebaren ny eigar. Linn Wingsternes var berre 20 år då ho kasta seg inn i denne krevjande bransjen. Dei tidlegare eigarane var Karl Johan Barstad og Ingrid Remø. Wingsternes skulle kome til å drive Kaffebaren i mange år, ikkje minst med god hjelp frå faren Lidar Wingsternes: – Eg har ein veldig snill pappa. Han har kjøpt 40 prosent av aksjane, og hjelpt meg i gang. Sjølv sit eg med dei resterande 60 prosentane, fortalde Linn til lokalavisa. Ulsteinvik hadde no heile ni skjenkeløyve innanfor ein radius på 500 meter; dette trass i at kommunen var med i eit pilotprosjekt for å redusere tilgangen og bruken av alkohol. Men politikarane fann det vanskeleg å gjere forskjell på utestadene.

Leigeavtalen i Bjørndalsvegen 13 gjekk ut for ølutsalet i juli 2008. Huseigar Odd Idar Garnes gav melding om at han ikkje ønskte å forlenge avtalen. Han hadde andre leigetakarar som var interesserte i å ta over lokala. Kanskje forstod Garnes at det uansett ville gå mot slutten for det kommunale ølutsalet – som etter kvart no hamna i Amfisenteret. Politikarane hadde vedteke at utsalet skulle halde fram, i alle fall så lenge det gjekk med overskot.

Det kom som ei bombe på dei tilsette då møbelforretninga Skeidar i Ulsteinvik valde å legge ned. Butikken hadde aldri vore ei forretning med gode plusstal. Dei hadde hatt bruk for større lokale og meir lagerplass, men slik vart det ikkje, og no var det slutt.

Det nyetablerte selskapet Arbiro i Saunesmarka i Ulsteinvik klarte å klore seg fast. Dei starta i 2006 med ei omsetning på to millionar kroner, medan dette auka til 10 millionar i 2007. Selskapet utvikla og leverte sport- og fritidsprodukt til bedrifter og organisasjonar og var eit registrert varemerke. Deira eige design vart produsert i Kina. Bedrifta hadde ni tilsette i Saunesmarka.

Braud og Bollur etablerte seg på Amfisenteret i Ulsteinvik i mai 2008. Dei ville tilby dagsferske bakarvarer baka i steinomn av ekte råvarer. Braud og Bollur var ei bakeri/konditori-kjede med sju utsal i Møre og Romsdal og med nærare 100 tilsette. Det var islendingen Andri Sigthorsson som starta kjeda i 2004. Bakarsonen var fødd og oppvaksen i Reykjavik, der familien dreiv den største bakeri- og konditorikjeda på Island. No hadde dei altså etablert seg i Ulsteinvik.

Ulstein Betongindustri AS hadde dei siste åra satsa mykje på betongflåtar. I juni 2008 var bedrifta i gang med flåte nummer 50: – Vi leverte den første betongflåten vår i 1988. Kring ti år seinare hadde vi produsert fem stykke. Etter tusenårsskiftet har marknaden for betongflåtar eksplodert, fortalde dagleg leiar Vidar Moldskred til lokalavisa. Han hadde vore i bedrifta sidan 1965.

Aasen Bilverksted på Dimnøya fekk ny eigar i september 2008. No hadde Frode Aasmo, som også dreiv Frodes Bilverksted AS i Dragsund, kjøpt 91 prosent av aksjane. Dei resterande eigde Jonny Aasen, son til den tidlegare eigaren Knut Aasen. Han hadde drive familiebedrifta sidan 1970, men pensjonerte seg rett før juli 2007. Han ville likevel ikkje heilt kalle seg pensjonist; han dreiv med litt omsetning av hagekust.

I starten av oktober 2008 flytta Sunnmøre Elektro inn i nye og større lokale i Saunesmarka. Verksemda starta i 2004 og hadde auka til 35 tilsette sidan då: – Med så stor auke i bemanninga treng vi meir plass, derfor er det godt med eit stort og fint lokale, som også er viktig for at vi skal lagerføre artiklar vi treng i det daglege arbeidet, fortalde Odd Breyholtz, avdelingsleiar i Ulsteinvik, til lokalavisa. Selskapet hadde avdelingar både i Herøy og Vanylven.

I januar 2009 vart det klart at Tussa kom til å kjøpe Rud Elektro AS i Ulstein. Kjell Rud starta opp Rud elektro i 1991. I samtale med lokalavisa vedgjekk han at det var litt vemodig, men at det samtidig var eit gunstig tidspunkt å selje på: – Vi ser på Tussa som ein god og langsiktig aktør i marknaden, fortalde han. Meininga var at verksemda på Skeide med sine 25 tilsette skulle halde fram som før. I 2008 hadde bedrifta ei omsetning på kring 38 millionar kroner og eit overskot på 5,5 millionar. Tussa betalte 15,75 millionar kroner for bedrifta.

I januar 2009 vart det kjent at trioen Joakim Skeide, Yun Lin Zhan og Neil LeClerq hadde teke over drifta av den konkursråka Snorrebuda i Ulsteinvik. Under namnet Skibet Pub & Dansing ville dei skape ein ny uteplass der dei ville føre vidare noko av konseptet frå dei førre eigarane. Men dei ville også satse nytt, mellom anna vart det dansegolv oppe i 2. etasje. Skibet opna i februar 2009, og sikta seg i første rekke inn på aldersgruppa 23 til 40 år.

Om lag samtidig vart det kjent at MCO Eigedom, leia av Glenn Thoresen, ønskte å flytte den gamle Foreininga og byggje hyblar i bygget: – Vi vil gjerne flytte Foreininga fram mot sjøen. Utvendig vil vi gjerne så langt som mogleg ta bygget tilbake til den opphavlege utsjånaden, fortalde Thoresen til lokalavisa.

Søndag 8. mars 2009 opna Moods of Norway butikk i første etasje på den gamle Flø-skulen, der Hugo Opdal no regjerte. Same dag opna han ei kunstutstilling med Nicolay Aamodt. Folk strøymde som vanleg til Flø for å få med seg utstillinga.

I februar 2009 var det endeleg slutt på utanlandsk eigarskap av lokalavisa Vikebladet Vestposten – og ei lang rekke andre avisa langs norskekysten. Det norske selskapet Polaris Media hadde kjøpt avisene frå britiske Mecom. På leiarplass slo redaktøren i lokalavisa fast at uvissa om eigarskapen hadde lege der som ein klamp om foten på avisa ei stund, og han var glad at det no var avklart, og at norske eigarar tok over. Han meinte den nye eigarskapen ville gi avisa gode sjansar til vidareutvikling.

Etter mykje fram og tilbake gav Kystverket Ulstein Utvikling AS i mars 2009 klarsignal til vidare utfylling av hamnebassenget ved Sjøgata i Ulsteinvik. Prosjektleiar Jostein Kiperberg i Ulstein Utvikling var glad for at Kystverket no hadde godkjent både den eksisterande utfyllinga og den planlagde utfyllinga, kvar av dei på kring 25 meter. Til saman ville heile utfyllinga vere 50 meter. Selskapet ville gå stegvis fram; akkurat no var det lite tilgjengeleg fyllmasse. Sjølve utbygginga ville måtte vente til utfyllinga var ferdig.

Rundt 2009 var det mange nye etableringar i Saunesmarka; nye bygg skaut opp, og nye forretningar såg dagens lys. Ei av dei var Biltema. Den store kjeda opna butikk i bygget til Øyehols Varehus tidleg på haustparten i 2009. Då Biltema starta i Sverige på byrjinga av 1960-talet, var verksemda konsentrert om bildelar og ymse bilutstyr. Men med åra voks aktiviteten både i omfang og innhald. I 2009 hadde kjeda utsal i både Sverige, Finland, Danmark og Noreg.

Løvens Hule var namnet på den nye blomsterbutikken som opna i Ulsteinvik 1. oktober 2009. Mayleen Dimmen ville skape ein jungel av norsk natur, ifølgje Vikebladet Vestposten. Den 29 år gamle eigaren var utdanna blomsterdekoratør, og hadde tilleggsutdanning i økonomi og som interiørkonsulent. Når ho no starta sin eigen butikk, rekna ho med å få nytte av heile utdanninga: – Løvens Hule skal ha alt innan blomster, men vi kjem også til å satse på interiørdesign, hageplanlegging og blomsterdekorering i heimen, forklarte Dimmen i samtale med lokalavisa. Løvens Hule vart inga døgnfluge i Ulsteinvik, og frå skrivepunktet i januar 2021 veit vi at butikken held det gåande.

I november 2009 kom meldinga om at Ahlsell, som hadde teke over anlegget til Bergens Rørhandel ein del år tidlegare, ville redusere i Ulsteinvik. Frå 1. januar ville alle som arbeidde med logistikk ved bedrifta i Ulsteinvik, stå utan jobb. Det svarte til 25 arbeidsplassar. Selskapet var storleverandør til skipsindustrien i området, men skulle no byggje lagerfunksjonar ved Gardermoen. Ahlsell ville likevel halde fast på salsavdelinga i Ulsteinvik.

Krukkehuset var nabo til Farmors Krambod og May-Britt Gåver og Interiør i Kyrkjegata i Ulsteinvik. Huset hadde skapt seg renommé som ein stad for kreativitet, skaparkraft, varme og omsorg, slik lokalavisa formulerte det i ein reportasje før jul i 2009. Heile huset var no i bruk; butikk i første etasje, kafé i andre etasje og lokale utstillarar i tredje etasje. Samtidig hadde Ulsteinvik fått ei rekke etestader; det var kaffibarar som Kaffikari og Kaffebaren, det var fleire pizza-restaurantar, konditori og meir tradisjonelle kaféar og restaurantar, som til dømes Kokk`n Roll, der du måtte bestille bord på førehand, helst i grupper.

Gravferdsbyrået Ringstad vart i 2009 overteke av Bellis Blomster & Byrå på Hareid, som no skulle ha blomsterbutikk og kontor både i Ulstein og Hareid. Overtakinga hadde skjedd i det stille, og det meste skulle vere som før, også telefonnummera, garanterte den nye eigaren, Dagny Vartdal, som skulle føre gravferdstenestene vidare i begge kommunane. Nina Ringstad gav seg no etter 12 år i bransjen. Men Ringstad Blomster skulle drivast som før med Greta Flø som leiar og eigar.