Første nyttårsdag 2008 tok selskapet Tide over sambandet Hareid-Sula. Med det var ein epoke på åtte år for ferjeselskapet Hurtigruten AS over for dette sambandet. Frå 1. januar 2009 skulle hurtigbåten Tideekspressen bryte bølgjene over Breisundet.
Så var det oppkøyringa til opninga av Eiksundsambandet, ei storhending for Søre Sunnmøre. Før bilane og bussane slapp til gjennom tunnelen, vart det gjennomført eit mosjonsritt på sykkel gjennom sambandet laurdag 23. februar 2008. Arrangørane i sykkelklubben reklamerte med verdas djupaste sykkelritt. Deltakarane ville få ein medalje laga av slipt eklogittstein frå botnen. Arrangementet samla 260 deltakarar. Søndag 17. februar var det stinn brakke under havet, ei rein folkevandring gjennom holet, og laurdag 23. februar var det offisiell opning. Då var det direkte TV-overføring av opningsseremonien på Nyheitskanalen i TV2. Denne dagen gjekk ferja mellom Eiksund og Rjånes den siste turen sin. Det var ein vemodig dag for mannskapet på Solnør, men no var ein epoke over, og dei fleste på Søre Sunnmøre kom ikkje til å sakne ferja. Prosjektleiar for utbygginga var Oddbjørn Pladsen, og byggeleiar var ulsteiningen Svein Skeide, begge grundig intervjua i lokalavisa før opninga. Styreleiar for Eiksundsambandet AS var framleis den legendariske Knut Nærø. Etter 30 år såg han endeleg lys i tunnelen. Han hadde vore utrøytteleg optimist, og no fekk han lønn for strevet og kunne ta på seg dress og sløyfe til opningsfesten. – Eiksundsambandet er eit stort framsteg ikkje berre for Søre Sunnmøre, men for heile Nordvestlandet, sa samferdselsminister Liv Signe Navarsete då ho opna Eiksundsambandet laurdag 23. februar, den djupaste undersjøiske tunnelen i verda. Ho kom også med ei oppmoding til dei som skulle bruke sambandet: – Bruk fornuft når de køyrer. La vegen bli til glede, ikkje til sorg.
I løpet av første døgnet køyrde det om lag 7000 bilar gjennom tunnelen. Men formaningane til Navarsete var det ikkje alle som la seg på minne. Snart skulle det skje ei frykteleg ulykke i tunnelen. Opninga vart likevel ein stor folkefest.
Eiksundsambandet gjorde alle økonomiske kalkylar til skamme. På sju år var sambandet betalt ned, altså på under halvparten av tida som ekspertane hadde rekna med. Mobiliteten mellom kommunane vart mykje forbetra, og området fekk ein sterk bu- og arbeidsmarknadsregion. Lengda på heile Eiksundsambandet var 14.880 meter, vegen til Eika 730 meter, Eiksundbrua 405 meter og sjølve Eiksundtunnelen 7807 meter. Det var dei harde fakta.
Det var i 1970 at Eiksundbrua kom inn i Norsk Vegplan. Eiksundsambandet AS vart skipa i 1978. Statens vegvesen tok over planarbeidet i 1994 og i 2000 godkjende Stortinget Eiksundsambandet, medan det første spadestikket i Eiksund vart trykt ned i jorda i 2003. Første salve i sjølve Eiksundtunnelen small i 2005. Ei av markeringane i samband med opninga var den såkalla Eiksundsamklangen, der dirigent Svein Eiksund hadde samla 300 songarar frå 11 kor frå regionen med konsert mellom anna i Herøy kyrkje.
Eiksundsambandet førte til auka flytrafikk på Hovden flyplass. Widerøe sette inn eit nytt morgonfly og dobla kapasiteten. Fleire representantar for næringslivet i Ulstein signaliserte at dei ville nytte Hovden meir. Samtidig var styreleiar i Ulsteinkonsernet, Idar Ulstein, klar på at sambandet både utvida arbeidsmarknaden og gav meir robuste kommunar i området. Det skulle også snart vise seg at trafikken gjennom sambandet vart uventa høg. I løpet av 32 dagar etter opninga hadde 55.278 køyretøy passert gjennom tunnelen, det ville seie 1728 per dag.
Eiksundtunnelen hadde vore open i nesten halvtanna år då fem menneske omkom i ei kraftig bilulykke i tunnelen i slutten av juni 2009. Fire ungdommar sat i ein Mercedes som hadde kome over i feil køyrebane; alle omkom. I den møtande bilen sat 52 år gamle Sigbjørn Tødenes frå Ulstein. Han var sjanselaus i den kraftige samanstøyten. Ulykka skaka opp heile regionen. Det var på Eiksund-sida av tunnelen det small, om lag 1,5 kilometer inne i tunnelen. Eit par dagar seinare kom det fram at Mercedesen hadde hatt stor fart.
