Næringslivet elles

Arbeidet med å plukke ned Snorrebuda bit for bit var godt i gang våren 2006. I sjøkanten hadde utfyllingsarbeidet for den første bustadblokka på Geileneset skote fart. Planen var at bygget skulle stå ferdig i 2007. Snorrebuda vart heisa trygt på plass i starten av november 2006. Det knitra litt i gammalt tømmer, men to heisekraner klarte brasane. Med perfekt presisjon lyfte dei den 57 tonn tunge bua inn på det nye fundamentet ho hadde fått på Geileneset. Prosjektleiar for operasjonen var Gro Kjoss Lynge i Nor Teknikk. Fredrik Steen hadde vore pådrivar. Han hadde planar om restaurant og scene i Snorrebuda. I andre høgda skulle det bli intimscene og kontorlokale.

Då Sparebank 1 etablerte seg i Ulsteinvik, var det meininga at dei etter kvart skulle drive med banktenester. Hausten 2006 vart planane realiserte. Sparebanken Volda Ørsta hadde vedteke å gå inn i Sparebank 1-alliansen. Banken vart med det ein del av eit samarbeid med 20 sjølvstendige sparebanker med over 300 kontor og filialar rundt om i Noreg. No hadde Sparebank 1 gått inn ein avtale med Sparebank Nordvest om å ta over forsikringskontoret i Ulsteinvik. Banken var på jakt etter nye lokale i Ulsteinvik og hamna etter kvart på Geileneset, slik vi kjenner det frå skrivepuktet i 2021.

Ein av dei mange butikkane som flytta inn i Blåhuset etter at andre butikkar hadde avvikla våren 2006, var Parfymelle; det som skulle bli Skin Tonic. Butikkleiar Siri Waage Pilskog var nærast fødd inn i dette yrket. Det var far hennar, Peder Fritz Waage, som starta det heile i 1951. Butikken førte den gongen hovudsakleg parfymeartiklar, gåver og gullsmedvarer.

Utover i siste halvdel av det første tiåret på 2000-talet var det fleire bedrifter som etablerte seg i Saunesmarka. Mellom desse var Dimo. Bedrifta flytta i starten av oktober 2006 frå Hareid og inn i dei tidlegare lokala til Ulstein Elektro. Det var i 2002 at bedrifta, som leverte hydrauliske system og komponentar og heitte Odim Hydraulikk, skilde seg frå Odim og vart til Dimo. I starten hadde bedrifta 12 tilsette, men i oktober 2006 hadde talet kome opp i 20. Dagleg leiar Asbjørn Pilskog fortalde til lokalavisa at bedrifta hadde ekspandert dei siste åra og hadde bruk for meir plass. Det same hadde Odim som trong den plassen Dimo hadde nytta ved Odim-anlegget i Hjørungavåg. Omsetninga til Dimo ville ende kring 45 millionar i 2006.

Laurdag 30. desember 2006 var siste dagen for butikken i Haddal. Med det var ein 75-årig tradisjon med butikk og post i bygda broten. Styret i Coop Nordsunn vedtok tidlegare i desember å legge ned butikken ved årsskiftet. Drifta hadde vorte svakare, og no gav ho ikkje rom for nødvendig oppussing. Med det såg dei ikkje nokon annan utveg enn å legge ned.

I februar 2007 starta den storstilte utvidinga av Blåhuset som mellom anna tok i bruk tomta der det tidlegare Nordea-bygget hadde stått. No var bygget rive og området skulle bli sjåande ut slik vi kjenner det i dag. Men Blåhuset ville halde ope i byggjetida og drive som før.

Det hadde ei tid vore snakka om endå eit apotek i Ulsteinvik. I august 2007 opna Alliance Bandagistapotek i dei tidlegare kontora til trygdekontoret i eit av Kleven-bygga. Bandagist-apoteket var eit nytt tilbod i regionen. Terje Grønmyr frå Ulsteinvik hadde starta firmaet Vital Helse Nordvest. Idéen selde han vidare til Alliance Boots. Tilbodet hadde eigentleg alt vore i sving ei tid; i Vikemarka hadde Grønmyr selt både sjukepleieartiklar og andre hjelpemiddel. No hadde dei hamna på eit gunstig gateplan. Men det skulle vise seg krevjande å drive over tid, med to andre apotek i Ulsteinvik. Det var også vanskeleg å få tak i kvalifiserte farmasøytar.

I november 2007 vart det kjent at det tredje apoteket skulle opne i Ulsteinvik. Til sommaren 2008 ville farmasøytane Margrethe Kvalsvik Jensen og Hans Kjølen opne apotek på Blåhuset. Hans Kjølen var no apotekar ved Apotek 1 i Amfi-senteret i Ulsteinvik, men hadde lyst til å starte sitt eige apotek, og han var overtydd om at dei skulle lykkast. Det gjorde dei; apoteket eksisterer den dag i dag.

Den 15. desember 2006 var den siste kvelden på Ulstein Hotel Varleite. Den 24 år lange epoken vart markert med skalkefest, konsert med Ulstein-bandet Scottys Dreamteam og jamsession utover natta. Og i det det lysna av dag, stengde hotellet dørene for godt.

Tysdag 10. april 2007 opna det nye hotellet i Ulsteinvik for den første gjesten, ein danske frå eit selskap som skulle gjere business i Ulsteinvik. Lite ante han at han var først ute, men han vart traktert med både jordbær og champagne. Hotellet opna også dørene for publikum denne dagen, og nyfikne strøymde inn. Bygget og detaljane sende ut signal om god kvalitet. Den offisielle opninga av hotellet på Saunes skjedde i november 2007. Det vart ein festkveld for dei mange innbodne gjestene, og leiar i Choice-kjeda, Petter Stordalen, stod i sentrum. Odd Petter Meinseth var direktør for det nye hotellet.

Ved Flø Feriesenter var det gode tider sommaren 2007. Hyttene var fulle, og dei fleste var utlendingar, sjølv om staten hadde innført avgrensingar i kvotene kvar enkelt fiskar hadde lov til å ta med seg frå landet: – Vi hadde trudd at besøkstalet ville gå ned i år ettersom det har kome eit kvotesystem som gjer at kvar enkelt fiskar ikkje kan ta med meir enn 15 kilo, fortalde dagleg leiar Eldar Stein Flø til lokalavisa. Slik vart det ikkje.

Sommaren 2007 hadde det kome til det punktet at Pefo Brød og Kaker i Ulsteinvik valde å avvikle drifta – etter å ha forsynt regionen med brød og kaker i 21 år. Valaker Bakeri AS hadde no kjøpt alle aksjane og tok formelt over drifta 1. august dette året. Pefo-bakeriet i Dragsund vart avvikla tidlegare denne sommaren.

Spar Straumane fekk nye eigarar i november 2007. Det vart markert gjennom å pusse opp heile butikken. Den nye eigaren var Gange-Rolv AS med Trond Valderhaug som dagleg leiar. Staben på butikken talde no ni personar, der mange hadde vore med ei god stund. Ei av dei var den nye butikksjefen Vigdis Baade. Ho synest den nye butikken hadde fått til eit breitt spekter av varer – også ferskvarer – til glede for publikum.

Eit selskap som drog nytte av dei gode tidene, var Beslag & Ventilasjon med eigarane Dag Kristensen og Oskar Grimstad. Dei flytta inn i nye lokale i Saunesmarka i oktober 2007. Berre vel ein månad seinare viste aktiviteten seg så stor at dei ville utvide med 200 kvadratmeter. Blekkslagarane Grimstad og Kristensen slo seg saman hausten 2007 og danna det nye selskapet. Oskar Grimstad vart dagleg leiar.

Kalenderen viste langt ut i november 2007 då butikkeigar Greta Overvåg stod fram som kjerringa mot straumen og flytta den eine klesbutikken sin ut av Blåhuset og inn i eigne nyoppussa lokale. Overvåg hadde drive både B-Young på Blåhuset og Overvåg i eige lokale. Men så valde ho å utvide og pusse opp sjølv og flytte også B-Young dit. Til lokalavisa forklarte ho at lokala i Blåhuset hadde blitt for små. Ho var også redd for å hamne i ei bakevje i det utvida Blåhuset.

G. Eilertsen satsa massivt på bilsal i Ulsteinvik. I starten av desember 2007 stod den 1200 kvadratmeter store bilhallen ferdig. Frank Hofseth og Geir Eilertsen fortalde til lokalavisa at dei hadde auka salet jamt og trutt dei siste åra. Til no i 2007 hadde dei passert 200 nye bilar, 130 bruktbilar, så dei rekna med å selje 350 bilar i 2007. I 2006 selde dei om lag 300 bilar til saman. Det hadde vore god auke berre siste året.

På ti år hadde omsetninga for Rørservice i Ulsteinvik vakse frå sju millionar til 30 millionar kroner. Palmar Gjerde angra ikkje på at han etablerte seg i Ulsteinvik i 1997: – Vi hadde så mange oppdrag i Ulsteinvik at vi meinte vi måtte flytte hit for å følgje opp kundane våre. Eg såg også at det var nødvendig med eit utsal. Kundane burde få sjå kva dei kjøpte, smilte sandssokningen Gjerde i samtale med lokalavisa.