Andre hendingar i næringslivet

Skattefuten i Møre og Romsdal bad om konkurs for Regionavisa i Ulsteinvik i april 2003. Bakgrunnen var eit skattekrav på 200.000 kroner. Selskapet, som fram til no hadde gitt ut avisa, hadde slite tungt heilt sidan starten i 2000. No hadde bankane sett ned foten og ville ikkje vere med vidare. Men styreleiar og medeigar Bjarne Wærdahl hadde alt starta eit nytt avisselskap, Nye regionavisa AS, som skulle få tilført kapital og gi ut gratisavisa vidare.

Også restauranten Matlyst i Convex-bygget bad om oppbod i april 2003. Restauranten hadde halde til i Convex sidan sommaren 2000, men hadde skifta eigarar fleire gonger. Convex Eigedom AS var hovudaksjonær, og dagleg leiar Tore Skodjevåg sa til lokalavisa at det var både trist og tungt at Matlyst var historie. Verken banken eller styret meinte Matlyst var liv laga. Etter to år i Ulsteinvik valde også Johs. Riise å legge ned klebutikken sin i Convex-bygget i februar 2004 og konsentrere seg om drifta i Hareid.

«Ein næringspark i Ulsteinvik». Det var overskrifta i lokalavisa på reportasjen frå anlegget til Borgstein på Saunes. I utgangspunktet var det selskapet sjølv som trong lokale då dei kjøpte dei tidlegare anlegga til Odim. No i 2003 hadde området blitt utvida med eit kontorbygg, og endå eit bygg var under oppføring. Til saman 28 verksemder hadde på dette tidspunktet adresse Stålhaugen 5, som området heitte, og lokalavisa hadde god grunn til å kalle det ein næringspark. Samtidig sprengde Borgstein ut 17.000 kubikkmeter fjell og fjerna jord slik at Stålhaugen også skulle få plass til seglbåtar og andre småbåtar. Ulstein Marina hadde då bygt ut ein 2800 kvadratmeter stor parkeringsplass for desse fartøya – som skulle på land for ettersyn og service. Første vinteren rekna dei med å lagre om lag 20 båtar utandørs, men etter kvart kalkulerte dagleg leiar Per Botnen med å passere 40. Utandørs var det mest seglbåtar, medan motorbåtane vart plasserte innandørs.

Det kom stadig negative meldingar om God Invest utover i 2003. I juli dette året viste det seg at selskapet hadde gått med eit underskot på 21 millionar kroner i 2002. Den vidare eksistensen kvilte på aksjonærane. Selskapet var no i ein alvorleg situasjon, og berre 23 prosent av eigenkapitalen var igjen i selskapet. Utsiktene var dystre. I januar 2004 kom det igjen litt opplyftande meldingar frå selskapet. Aksjonærane hadde gjort lån om til aksjekapital, og den hardt pressa styreleiaren, Agnar Dag Ulstein, hadde fått mange oppmuntrande telefonar. Det hadde auka aksjekapitalen frå 6 millionar på det lågaste til nesten 18 millionar no. Det gav eit visst pusterom. Men vanskane var ikkje over, og Kapital-journalist Stig Flesland, som hadde følgt selskapet tett, meinte i samtale med Vikebladet Vestposten at God Invest hadde små sjansar til å overleve.

I starten av juli 2004 var det slutt. Då var God Invest med base i Ulsteinvik konkurs. Det var eit krav på om lag ein million kroner frå aksjonæren og innskytaren Svein Skårland i Sandnes som sette sluttstrek for historia om God Invest: – Eg er forundra over at denne innskytaren valde konkurs framfor å satse på selskapet vidare med eit nytt styre. Vi meiner vi hadde fått meir att for å satse vidare, sukka styreleiar Agnar Dag Ulstein til Vikebladet Vestposten.

Lampebutikken til Hareid Elektriske vart flytta frå Hareid til Saunesmarka i oktober 2003. Der var butikken til selskapet under ombygging og utviding. Lampe- og gåvebutikken til Hareid Elektriske hadde hatt tilhald i det rosa Solstrandbygget på Hareid i fleire år. Men no var det slutt: – Det er tøffe tider i næringslivet, og vi er nøydde til å sjå på kostnadene. Fordelane ved ei samordning var openberre, kommenterte dagleg leiar Bjørn Teigene.

I starten av september 2003 var det dags for eigarskifte i Ulstein Sko. Den tidlegare fiskeskipperen Jostein Hareide hadde då selt sko i Ulsteinvik sentrum i 34 år. Men den 10. september var det stopp. Frå då av heitte eigaren av Ulstein Sko Sissel Brevik (29). Ho hadde tidlegare vore tilsett i butikken, før ho eit par år tidlegare flytte til New Zealand med familien for ein periode. Ho hadde signalisert at dersom butikken vart til sals, ville ho gjerne ta over. No gjekk det som ho håpte. Men det vart ikkje noko langvarig eventyr.

Det private ambulanseselskapet for Ulstein og Hareid, Aktiv Omsorg, starta offisielt i dei nye lokala sine i Saunesmarka 20. oktober 2003. Lokaliseringa i Saunesmarka skulle ifølgje SINTEF vere den optimale for å nå pasientar både i Ulstein og Hareid raskast mogleg. I spissen for selskapet stod Sigbjørn Haddal og Anders Riise. Ei samanslåing av ambulansetenesta i dei to kommunane skulle både gi god dekning og eit betre fagleg miljø. På dette tidspunktet hadde Aktiv Omsorg 12 tilsette.

Etter vel 40 år som bokhandlar gav Arne J. Eiken over styringa til dottera Gry Eiken Eksund (32). Selskapet A. J. Eiken vart delt, og i januar 2004 vart Gry Eiken Eksund dagleg leiar av aksjeselskapet Eiken Bokhandel AS, der også leikebutikken Ringo var med. Verksemda ville bli marknadsført som Eiken Libris. Det personlege selskapet A. J. Eiken stod framleis som eigar av bygget.

I januar 2004 leitte Ulstein Hotell fram igjen dei gamle logoane sine. Det tre år lange samarbeidet med Radisson SAS var over. Dagleg leiar Sølvi Lillebø Remøy fortalde til lokalavisa at avtalen med Radisson SAS vart for dyr i høve til det hotellet fekk igjen. Nedgangstidene i den lokale industrien i 2003 hadde ført til at Ulstein Hotell hadde færre gjestedøgn.

Den 21. januar 2004 var det 75 år sidan Vikebladet kom ut første gongen. Jubileet vart grundig markert både i spaltene og gjennom festlege samvær. Redaktør Asle Geir Widnes Johansen skreiv på leiarplass: – I dag er det 90 prosent av innbyggarane i Ulstein og Hareid som les lokalavisa. I tillegg har vi mange abonnentar utanfor kjerneområdet vårt. Dessutan har vi dei siste åra hatt vår eiga nettavis med mange lesarar. Vil papiravisa Vikebladet Vestposten leve om 75 år? Det er naturlegvis umogleg å svare på det. Men spør du om papiravisa vil eksistere om til dømes 30 år, er svaret mitt ja. Papiret er eit unikt massemedium. Det gir lesarane høve til å konsumere produktet kvar og når ho eller han måtte ønskje det.

Det var ålesundaren Johs. Thorkildson som kom til Ulsteinvik og starta Vikebladet i januar 1929. Han heldt fram som redaktør til 1976. I 1989 vart avisa slegen saman med Vestposten.

Gjennom eit personleg aksjeselskap tok Ove Ulstein over Sverre Skeide Bilforretning og etablerte Skeide Bil og Traktor i januar 2004. Verkstaden på Skeide starta i 1957 og var no den eldste i Ulstein. Ove Ulstein kom inn i firmaet i 1962. Då han vart verksmeister i 1974, kjøpte han seg inn i selskapet og vart etter kvart hovudaksjonær. No hadde han to medarbeidarar i verkstaden, medan kona, Kirsti Ulstein, tok seg av rekneskapen. Han valde å endre namnet på firmaet fordi han meinte det nye namnet fortalde meir om kva dei dreiv med.

I starten av februar 2004 låg det berre ein steinhaug att etter Central Pensjonat i Ulsteinvik sentrum. Ulstein Betongindustri hadde gjort jobben. Med det hadde Ulsteinvik mist ein del av historia si, men utviklinga måtte gå sin gang, og no ville Frede Uldbæk reise eit nytt og moderne bygg i fire etasjar på tomta. I november 2004 var bygget klart til innflytting, og det heile var leigd ut. Mellom andre skulle Pernilles Clinique halde til i første etasje og fylkestannlegen i andre, med inngang frå Kyrkjegata.

Møbelsatsinga til Bjarne Wærdahl og Convex AS vart nokså kortvarig. I februar 2004 hadde dei selt seg ut av Bohus Møbelland i Ulsteinvik, Ørsta og Ålesund. Skeidar Ålesund AS tok over varehusa som hadde ei årsomsetning på om lag 110 millionar i året.

Samtidig reiste dei storstilte bygga seg i Brattøra ved Saunesosen i Ulsteinvik. Utbyggarane med Borgstein Eigedom i Ulsteinvik og Møre Detalj i Molde investerte for minst 70 millionar i senteret, og dei to bygga med eit samla bruttoareal på ni mål, skulle knytast saman med ei bru over Sauneselva. Sporstøl Arkitekter i Ulsteinvik stod for både prosjektering og byggeleiing, det største oppdraget firmaet nokon gong hadde hatt. Tyngda i Ulsteinvik sentrum var no for alvor i ferd med å bli flytta til Saunes: Brattøra, Ulstein Hotell og kulturhus, matvaregiganten Lidl var mellom tiltaka som var under planleggig eller oppføring i området. Då bygget på Brattøra stod ferdig, ville lensmannen i Ulstein og Hareid flytte kontoret sitt frå Hareid til Saunes. Trass i protestar frå Hareid vart det slik.

I juni 2004 vart Bergen Rørhandel svensk. Ahlsell AB kjøpte både bedrifta i Ulsteinvik og Stavanger Rørhandel. Auka konkurranse frå internasjonale aktørar og større krav til logistikk og innkjøp fører til behov for å vere med i ei større nordisk gruppering, heitte det i pressemeldinga. Tysdag 1. mars 2005 var det flaggskifte ved Bergens Rørhandel i Holsekerdalen. No var tida komen til Ahlsell AB. Ulsteiningen Elling Strand vart distriktssjef.

Då tilbygget til Øyehols Varehus i Saunesmarka stod ferdig hausten 2004, flytta forretninga Jernia frå Hareid og inn i det nye bygget. Sigfred Garnes var dagleg leiar. Jernia opna i slutten av september 2004. Tilbygget til Øyehols Varehus ruva i terrenget. Tilveksten var på 4400 kvadratmeter og gjorde varehuset til eit bygg på 8400 kvadratmeter. Møbelforretninga Møbelringen skulle no få rikeleg plass å boltre seg på.

I starten av august 2004 opna den nye optiske forretninga Havblikk Optikk i Ulsteinvik. Dei skulle halde til i eitt av Kleven-bygga, det same bygget som Ulstein legesenter leigde i. Dei fire eigarane var Geir Lydersen (dagleg leiar), Tordis Nerem Lydersen, Berit Roppen og Sølvi Moldskred. Butikken vart inga døgnfluge og eksisterer den dag i dag.

Midt i november 2004 opna Sjøhuset restaurant på Geileneset. Drivar var Karl Johan Barstad: – Vi har plass til 45 gjester i restauranten nede, og i andre etasje tek vi framleis imot dei som ønskjer å nytte selskapslokalet. I denne avdelinga kan vi ta imot 65 gjester. Også her har vi pussa opp med lysare fargar og interiør, fortalde Barstad til lokalavisa.

Det gjekk godt i store delar av det lokale næringslivet utover i 2005. Bilfirmaet G. Eilertsen AS var ikkje noko unntak, men heller i ei særstilling i regionen. Med ein marknadsprosent på dryge 30 prosent selde Eilertsen bilar, hovudsakleg Toyota, for 80 millionar kroner i 2004, 157 nybilar og 100 bruktbilar.

I januar 2005 opna Kokk`n Roll i Convex-bygget i Ulsteinvik. Dette var den nyaste tilveksten innan catering og selskapsmat i Ulsteinvik. Hallbjørn Tømmerbakk og Øyvind Rekkedal starta verksemda si i dei tidlegare lokala til Matlyst. Dei to satsa ikkje berre på catering og levering av mat til private og bedrifter, men tilbaud seg også å lage mat heime hos folk. Kokk`n Roll skulle klare å halde det gåande nokre år.

Då Vigdis Baade og gjengen hennar tok over kaféen på Blåhuset i Ulsteinvik i november 2004, var dei spente på korleis det skulle gå. Men vinteren 2005 såg Kafé Appetitt ut til å gå bra. Det vart ein god start då dei opna, og sidan hadde det vore godt trykk.

Etter litt konkurranse mellom Ulstein og Herøy bestemte Herøy-bedrifta Sebastian AS seg i februar 2005 for å flytte til Ulsteinvik. Ingeniørfirmaet under leiinga av Johannes Kristian Bjøringsøy hadde halde til på Leikong. Bedrifta skulle flytte inn tredje etasje i Sjøgata 55 i hjertet av Ulsteinvik.

I februar 2005 fortalde Borgstein AS at selskapet ville fylle ut og byggje på sørvestsida av Sjøgata mellom Geileneset og Saunesosen i Ulsteinvik. Planen var omfattande, og Borgstein ønskte i første omgang å sikre seg retten til ei slik utbygging. Det skulle bli litt att og fram, men til slutt enda det med eit samarbeid til beste for utviklinga av Ulsteinvik. Då politikarane tok tak i saka første gongen, kom det fram at også Ulsmo hadde planar for dette området. No vart det ein dragkamp om retten til å byggje ut. Kommunestyret signaliserte etter kvart at dei ønskte eit samarbeid mellom Borgstein og Ulsmo om utbygginga. Borgstein hadde sikra seg retten til å byggje ut, men i mars 2005 inviterte selskapet Ulsmo med på planane. Det vart no skipa eit nytt selskap, der Bakkely Invest og Havblikk Eigedom vart aksjonærar saman med Borgstein, og Ulsmo vart inviterte inn i det nye selskapet. Ulsteinvik Utvikling AS ville skape ein heilt ny bydel nedanfor Sjøgata, eit handels- og bustadområde, og i mars 2005 var arkitektar alt i sving med arbeidet.

I februar 2005 gjorde Ulsmo også kjent at dei ville kjøpe Nordea-bygget på nabotomta til Blåhuset. Planen var å byggje Blåhuset saman med eit nytt bygg på Nordea-tomta og slik skape eit kjøpesenter på 10.000 kvadratmeter. Slik vart det, og i dag hugsar vi knapt noko anna.

I slutten av april 2005 opna ein butikk i Ulsteinvik som har halde det gåande til denne tid. Arnhild Vik og Madli Heimtun opna då Kreativiteten. Butikken låg ovanfor Hatløy Målarforretning i den einvegskøyrde gata på Geileneset. Dei laga både tre- og tøyprodukt, heimelaga. Seinare flytta butikken til Kyrkjegata.

Dagleg leiar Norvald Berge avvikla i juni 2005 Rimi-butikken i Ulsteinvik. No vart det opphøyrssal i Sjøgata 45: – Det er ikkje enkelt å drive Rimi-butikk når omsetninga er så låg, slo Berge fast i samtale med lokalavisa. Han hadde drive Rimi i Ulsteinvik i 13 år: – Det er ikkje mogleg å drive med den omsetninga vi har no, på under 20 millionar kroner i året. Vi har gått med underskot dei siste to åra. Det er tryggast å avvikle før det er for seint, sa Berge. Han hadde drive ulike daglegvarebutikkar i Ulsteinvik sidan 1990. Det gjekk ikkje lenge før han var tilbake med eit nytt konsept.

Det hadde vore litt fram og tilbake for selskapet Nor Teknikk AS og planane deira for Geileneset. Men i slutten av august 2005 avgjorde politikarane at selskapet hadde dokumentert ei finansiering som gjorde det sannsynleg at bedrifta kunne gjennomføre utbygginga dei hadde lagt planar om. Eit samla kommunestyre vedtok såleis i starten på september 2005 å la Nor Teknikk byggje ut på Geileneset. No såg Kåre Skinnes, Fredrik Steen og Nils-Erik Skeide fram til å utføre planane sine. Her skulle det bli både restaurant, bustadblokk og sjøvarmeanlegg.

Så vart det nytt liv i det tidlegare bakeriet til Josef Ulfstein. Hausten 2005 lukta det i staden pizza frå bakeriet. Då opna Aladdin Pizzeria og Grill. Innehavar var Refak Ghazi – som også hadde pussa opp lokalet og laga om det til serveringstad. Det kom og gjekk ulike eigarar i åra som følgde, men pizzarestauranten har halde det gåande til i dag (2020).

Hjørnesteinbedrifta Ulstein Betongindustri i Haddal slo på stortromma i samband med 50-årsjubileet i september 2005. Det hadde bedrifta god grunn til. Ordreinngangen var på rekordnivå, og omsetninga hadde aldri vore større, i første halvår av jubileumsåret på heile 34 millionar kroner. Sjølve jubileumsgildet vart arrangert på Haddal grendehus med 150 gjester. Her var det både tidlegare og noverande tilsette, samarbeidspartnarar, aksjonærar – og ikkje minst slekta til familiebedrifta. Av gründergenerasjonen var det no berre kona til Tolleiv Moldskred, Ingrid, som levde. Ho var til stades og fekk med seg ei stor blomsterhelsing.

I slutten av oktober 2005 opna det nye kjøpesenteret Brattøra Amfi i Ulsteinvik. I det store, påkosta bygget skulle Amfi-kjeda drive senteret og syte for leigetakarar. På opningstidspunktet var der sju forretningar. Men det kom raskt fleire til. I første omgang skulle kjøpesenteret i Ulsteinvik ha same senterleiing som Moa Amfi, men ut på våren 2006 fekk Brattøra sin eigen senterleiar. I oktober 2005 var eitt av trekkplastera i Amfisenteret på plass, daglegvareforretninga Meny. Butikken eksisterte der nokre år før han gav opp og overlét lokala til Kiwi. I Amfisenteret opna no også bakar- og konditori-forretninga Braud og Bollur, med kafé i tillegg.

Utover i 2005 og 2006 var det reine forretningsboomen i Ulsteinvik. Nye kjøpesenter og nye butikkar gav større vareutval, men også større konkurranse. Hausten 2005 flytta fleire forretningar inn i Amfisenteret, og i slutten av november opna Lidl på Saunes. På toppen av det heile låg planane der for ein ny bydel langs Sjøgata.

Hausten 2005 gjorde Ståle Hatløy ein handel utanom det vanlege. Han kjøpte heile båtlageret til Båtbutikken på Stålhaugen. I alt 22 småbåtar skifta eigar etter at Henning Ulstein og Ståle Hatløy skreiv under avtalen som kosta Hatløy kring 5 millionar kroner: – Det er vel spesielt å kjøpe 22 båtar i oktober, men vi ser dette som ein god handel – som vil styrke posisjonen vår i marknaden, uttalte Ståle Hatløy i Hatløy Jernvare Marina til lokalavisa.

I slutten av november 2005 opna kaféen Kaffikari i lokala i den gamle Johannesenbuda på Geileneset i Ulsteinvik. Drivar var Kari Andersen. Ho hadde spesialisert seg på kaffi og barista, men skulle også drive kafé med matservering. Nils-Erik Skeide og Glenn Thoresen eigde bua, og Andersen leigde. Ho hadde bakgrunn som frisør.

I desember 2005 opna Frode Sundgot fotobutikk som ein del av Glass- og Rammesenteret i Ulsteinvik. Sundgot hadde starta med fotojobbing alt som 16-åring, då i butikken til foreldra sine, Rammesenteret. Seinare vart Frode dagleg leiar av Fotoland, no arbeidde han på El-kjøp i Sundgotmarka, men hadde altså gått inn samarbeid med syskenbarnet Morten Solheim om å opne ein fullverdig fotobutikk som ein del av Glass- og Rammesenteret i Ulsteinvik sentrum.