Alt i august 2001 lufta Trond Berg ideen han hadde fått, med enkeltpersonar han kjende og hadde tiltru til, mellom dei Kjersti Kleven: Ville det vere mogleg for SUFH å kjøpe hotellet i Varleite? Oppmuntra som han vart, gjekk han vidare med tankane sine til hotelleigarane og ein mann som Steinar Sivertsen Kulen. Også John Moldskred i konsulentselskapet Lorgen vart spurt om råd.
Nokre av desse åra frå 2002 til 2005 var tunge år for den lokale industrien. Det var i ferd med å breie seg ei depressiv stemning over lokalsamfunnet. På den internasjonale scenen hadde Bush invadert Afghanistan i sin kamp mot terror. På nasjonalt plan ymta politikarar og økonomar om den kommande avviklinga av norsk industri. Kapital-guruen Trygve Hegnar spådde undergang for norsk verftsindustri. I denne situasjonen er det Ap-politikaren Kjell Rud, kjend som ein dyktig strateg i kulissane, men sjeldan på talarstolen i kommunestyresalen, møter rektor Trond Berg på den sistnemndes kontor til ein prat om laust og fast. Dei to er ikkje heilt samde om tidspunktet for møtet, men truleg var det i slutten av august 2002. Det er ikkje noko merkeleg med at Rud og Berg møtest. Dei har hatt mykje med kvarandre å gjere. Rud dreiv elektrofirma og utførte stadig arbeid for SUFH.
– Vi prata om laust og fast. Det var nedgangstider i Ulsteinvik og mangel på arbeid. Så vi spurde kvarandre: Kvifor ikkje setje i verk noko positivt; kvifor ikkje tenke heilt nytt? Trond snakka om behova til folkehøgskulen, om auditoriet. Vi kom inn på det fine auditoriet ved Ulstein Hotell, fortalde Rud i 2015 – om samtalen då ein luftig idé med eitt datt over leppene: Kva om folkehøgskulen kjøpte hotellet, så kunne hotellet bygge nytt i sentrum, og kommunen overta skulebygningane på Reiten. Dette var ein idé som måtte plantast mellom folk – og modne i uformelle samtalar, gjerne under vignetten «Kvifor ikkje gjere noko nytt?» Slik hugsa Rud samtalen då han snakka med denne forfattaren i 2015.
Førebels var saka ikkje kjend i kommunale fora, men det som hadde vore ein luftig idé, voks litt etter litt til noko meir handfast. Ulstein Hotell ville vere tent med å ligge i sentrum, folkehøgskulen måtte ha større armslag, og Ulstein ville vekse på eit nytt og tidsmessig kulturhus. Kunne kommunen bruke skulebygningane på Reiten til noko fornuftig? Kva med økonomien i det heile?
– Kjell Rud var den første politikaren eg drøfta idéen med. Men han visste nok ikkje at eg alt då hadde vore i kontakt med hotelleigarane. Vi såg ikkje heile trekantpakken den gongen. Den brukte vi det neste året på å skru saman. Men Kjell Rud visste at det ville vere viktig at politikarane fekk eit eigarskapsforhold til idéen. Der var han med sitt kontaktnett og sin måte å jobbe på – ei viktig fødselshjelp, konkluderer Berg. Då han presenterte grovskissa til ein trekant for ordførar Jan Berset rundt 10. november 2002, hadde Berg altså knadd på idéen saman med både hotelleigarar og andre ei stund.
