Ulstein Revmatikarlag markerte 20-årsjubileum i mai 1998 i Bygdestova på eldresenteret. Foreininga starta opp med om lag 100 medlemer. Talet på medlemer hadde minka litt med åra, men kampviljen var framleis til stades. Varmbadet hadde vore ei viktig sak; kronerulling til eit nytt beinmålingsapparat til sjukehuset i Volda ei anna. I tillegg til faste møte ein gong i månaden og innsamling til turar har laget også turnus der dei vitjar revmatologisk avdeling på sjukehusa og stiller opp med mat, kaffi og underhaldning. Olaug Flø, Rolf Sundgot, Hanna Hide og Liv Breivik hadde sentrale posisjonar i laget etter starten. I jubileumsåret var Hanna Hide leiar.
I juni 1998 var det songarstemne med 400 aktørar i Ulsteinvik. Stemnet var med på å setje ein spiss på Ulsteindagane – som no hadde blitt innarbeidde som eit årleg arrangement. Det var ulsteinkoret Con Moto som arrangerte dette stemnet, og dei fekk mange godord. Stemnet var velorganisert og med god song. Særleg songarfesten med populærmusikk-kavalkade vart framheva: – Det er noko av det beste vi har vore med på, kommenterte dirigent Tor Havnevik i koret Vivace frå Molde til lokalavisa.
Ulsteindagane hadde altså blitt ein institusjon i Ulstein i løpet av 1980- og 90-talet. I 1999 var det også kyrkjejubileum, og konserten med Bjørn Eidsvåg var eit høgdepunkt. Saman med tensingkoret Profil tok han publikum i kyrkja med storm. Ulsteindagane hadde eit tettpakka program, og folk likte seg. Ei basketballturnering var eit populært innslag.
Til jul i 1998 kom Con Moto med ei CD-plate innspelt i Volda kyrkje. Vikebladet Vestposten var raus med rosen: – Dette er ei innspeling med profesjonelt tilsnitt, strippa for forstyrrande amatørskap slik du ofte høyrer i lokale produksjonar. Volda kyrkje gir ein effektfull katedralklang. Det gjeld ikkje minst i den flotte versjonen av Himmelske fader i versjonen til voldingen S. H. Geitvik. Dirigent for koret var Svein Eiksund, instruktør i førebuingane til innspelinga var Mona Julsrud, og alle solistane var frå korets eigne rekker: Marit M. Ingjerd, John M. Kleven, Dag Storaker, Stig Grimstad og Ståle Rasmussen. Det var John M. Kleven som hadde finansiert prosjektet. Han håpte på smitteeffekt til andre delar av kulturlivet i Ulstein: – Eg vil gjerne legge igjen ein varig verdi i kulturlivet, sa Kleven til lokalavisa.
I slutten av september 1998 vann Hasundgot heile 9-0 over Hovdebygda i 4. divisjon for herrar. Dermed vart det opprykk til 3. divisjon for første gong i lagets historie. Men det skulle bli komplikasjonar. I november kom det ei melding som skapte krigsstemning i klubben. Fotballforbundet hadde annullert opprykket til Hasundgot, og i staden meinte forbundet at Skodje som enda tredje sist i 3. divisjon, skulle få ein ny sesong i divisjonen. Men kraftige protestar førte til at forbundet ombestemte seg, og Hasundgot fekk ein sesong i tredjedivisjon.
Rett før jul i 1998 kunne Hødd-folket juble. Etter mykje att og fram vart det klart at kommunestyret hadde bestemt seg for å løyve fem millionar kroner til utbetring av Høddvoll. Leiar i anleggsutvalet i klubben, John Osnes, var mellom dei som hadde arbeidd hardt for å få i hamn ein avtale som innebar støtte frå både private investorar og kommunen. Pengane frå kommunen var fondsmidlar.
Midt i juni 1999 starta arbeidet med å legge nytt gras på Høddvoll. Graset kom frå Østfold med trailerar og vart lagt på fortløpande. I løpet av fire-fem dagar skulle dei 7500 kvadratmeterane med gras rullast ut. Den nye bana var 52 centimeter høgare på midten enn på sidene for å unngå vassopphoping midt på bana. Ein månad seinare låg det nye friidrettsanlegget også innbydande og klart på Høddvoll. Den 1. august inviterte Hødd og Dimna IL til stemne på det nye anlegget. Samtidig markerte Hødd 80-årsjubileum.
Det hadde gått litt opp og ned med 1. mai-feiringa i Ulstein opp gjennom åra. Men i 1999 kunne dagen markere 100 år sidan starten. Då vart fridomsdagen til arbeidarane og 100-årsfeiringa til LO markert med eit større arrangement på Ulstein samfunnshus. Con Moto, Ulstein mannskor og den unge pianisten Atle Hovden Havåg var på plass og bidrog til det kulturelle, Distriktssekretær Melvin Steinsvoll (LO) og Marie Lovise Widnes (SV) stod for dei politiske innslaga, medan Bjarne Røren samla dei lokalhistoriske trådane til fagrørsla.
