Hendingar i næringslivet elles mot slutten av tiåret

Hausten 1997 utvida Overvåg AS første etasje i butikken sin med 170 kvadratmeter. Her fekk herrane si eiga avdeling med merkeklede. Dameavdelinga ville halde fram som før. Overvåg hadde teke over ein del av det tidlegare Rema-lokalet. Butikkdrivar Greta Overvåg Wingsternes forklarte utvidinga med at ho ønskte ei større herreavdeling: – Mange menn i Ulstein er kvalitetsbevisste og har etterlyst ein merkevarebutikk, forklarte ho i samtale med lokalavisa.

Samtidig etablerte Rørservice AS seg som nabo til Overvåg, i lokala som Rema 1000 flytta ut av. Palmar Gjerde frå Gjerdsvika ville dermed få 250 kvadratmeter til butikk og lager: – Eg har lenge tenkt på ei utviding, men har venta på ledige lokale. No dukka dei opp, fortalde Gjerde til lokalavisa. Han starta Rørservice AS i 1970. At han no etablerte seg i Ulsteinvik, såg han på som ei naturleg utvikling. Tettstaden var det største senteret i regionen, og han ville såleis nå fleire kundar.

Hausten 1997 starta Lisbeth Haraldsvik butikken Linette i Pilskog-bygget i Ulsteinvik. Ho hadde teke over babyutstyret frå Borg Import, der Astrid Urvik hadde selt barneklede og babyutstyr i 20 år. Til lokalavisa fortalde Urvik at ho hadde valt å konsentrere seg om barneklede etter at ho bestemte seg for å flytte butikken sin inn i andre etasje i det nye Mega-bygget. Lisbeth Haraldsvik sa dette til lokalavisa: – Eg har vore husmor i alle år. No har eg tid til overs, og måtte berre satse når eg fekk førespurnaden.

Før jul i 1997 vart det nye drivarar av Ringstad Blomster. Frå nyttår dette året slutta Åse Ringstad i firmaet etter 30 år. To medarbeidarar gjennom høvesvis 20 og 12 år skulle drive butikken vidare, Janne Karlson Slettestøl og Greta Flø. Sistnemnde som dagleg leiar. Ringstad Blomster hadde vore meir enn ein blomsterbutikk. Verksemda var også ei handverksbedrift. Dei produserte mellom anna dekorasjonar i mange slags materiale.

I starten av februar 1998 hadde Synssenteret kome på plass i Norrønabygget i Ulsteinvik, rett ovanfor Rema 1000: – Vi har fått installert topp moderne utstyr, og kan tilby kundane alle typar optiske tenester. Mellom anna er vi dei første her som kan tilby kontaktlinser, fortalde Sverre Gaustad til lokalavisa. Mellom dei som fronta saka på bilete i avisa var også Geir Lydersen og Sølvi Moldskred som er mellom dei som har ført Synssenteret vidare til dagens Havblikk i det inste Kleven-bygget i Ulsteinvik.

I februar 1998 fortalde lokalavisa at det hadde kome liv i det såkalla Fredriksen-huset i Vikemyra 3 i Ulsteinvik. I romjula flytta Tegneren AS inn etter eit omfattande restaureringsarbeid. Det gamle funkishuset gav byrået gode arbeidstilhøve. Tegneren hadde skapt reklameprofilar for mange av bedriftene i distriktet i dei snart 25 åra byrået hadde eksistert. Dagleg leiar var Arnljot Myrene.

I 1997 gjekk opplagstalet til Vikebladet Vestposten opp med 139. Avisa vart med det den mestaukande lokalavisa i Møre og Romsdal dette året. Opplagsauken var den største sidan samanslåing av Vikebladet og Vestposten i 1989. I Ulstein var dekningsprosenten no over 90 prosent.

Utover i siste halvdel av 1990-talet var byggjeplanane til Vestre Sunnmøre Samvirkelag i Ulsteinvik mykje omtalt i lokalpressa. Det store Mega-varehuset ville også omfatte tomta der Skeide-bygget låg. I april 1998 kom det likevel melding om at bygginga var utsett. Årsaka var usemje mellom dei som åtte tomta der bygget skulle reisast. Det ingen kunne vite i 1998, var at Mega skulle bli ein del av butikksenteret Blåhuset nokre år seinare.

Nye Møbelcentralen var i juni 1998 på plass i nye lokale i Saunesmarka. Butikken, som hadde halde til i Ulsteinvik sentrum, kunne no tilby kundane møblar over 1200 kvadratmeter. Eigarar og drivarar var Sissel Worren og Jarl Andersen, begge med lang erfaring frå møbelbransjen. Dei var tilsette ved Møbelringen før dei tok over Møbelcentralen våren 1997.

Den 13. august 1998 hadde forretningskvinna Sigrid Strand den siste arbeidsdagen sin på Cubus i Ulsteinvik. Forretninga som den no 76 år gamle kvinna hadde bygt opp, var i stor grad medverkande til at Ulsteinvik vart eit handelssenter for regionen. I 36 år hadde Sigrid drive forretning i Ulsteinvik; då ho no gav seg og overlét verksemda til Ann-Lisbeth Giske Flem og Peter Flem, hadde butikken 15 tilsette og ei omsetning på 20 millionar kroner.

I oktober 1998 markerte Overvåg Frisør at salongen hadde halde til i Ulsteinvik i 60 år og var den eldste frisørsalongen i bygda. Det var Solveig Vik som starta salongen ved Kyrkjegata litt utanfor kyrkja. Dottera Alma Vik Overvåg tok over i 1952. I jubileumsåret var dottera Kristin Overvåg og niesa Kari Janne Vik (seinare gift Andersen) også med i salongen.

I midten av november 1998 opna ein designbutikk med hovudvekt på interiør i Fannemel-bygget i Ulsteinvik. I butikklokala skulle det også vere ein såkalla coffee-shop med plass til å ta ein kaffikopp der kundane òg kunne bla i interiørmagasin i tråd med den nye urbane trenden som hadde kome til Noreg for ein del år sidan. No hadde han kome til Ulsteinvik, og det var arkitektane Åse Stensvaag og André Klevberg som stod bak, og butikken hadde tilknyting til arkitektkontoret deira i det same bygget. Den nye butikken fekk namnet Invit, og laurdag 28. oktober var dei første kundane på plass på barkrakkane ved vindauget, med designkatalogar og ein cappuccino mellom fingrane.

I oktober 1998 opna Café Nova dørene igjen etter tre veker med omfattande ombygging og oppussing. Ingen ting var att av det gamle; nytt interiør, nytt kjøkken, ny meny og fleire nytilsette. Eigarane Darane og Magnar Kvalsund hadde også fått skjenkeløyve i restauranten. Dei tradisjonelle rettane stod på menyen enno, men i tillegg ville ekteparet Kvalsund by gjestene rettar med smak frå engelsk og asiatisk kjøkken. Lokalet var også delt med glasvegg med tanke på dei som røykte.

I november 1998 vart det kjent at Rico Bil AS i Ålesund tok over som hovudaksjonær i Ulstein Bil i Ulsteinvik. Mazda- og Hyundai-forhandlaren i Saunesmarka hadde slite økonomisk den siste tida, og håpte no på ei meir kostnadssparande drift og eit breiare tilbod til kundane: – Vi har hatt eit nært samarbeid med Rico Bil lenge. No vil samarbeidet bli formalisert, og vi vil redusere kostnader på annonsering, lager og IT, kommenterte dagleg leiar Svein Idar Eiksund i Ulstein Bil.

Ved årsskiftet 1998/99 vart Haddal Daglegvare gjort om til S-Marknad. Det var drivarane av nærbutikken og huseigaren som tok initiativet til å få Vestre Sunnmøre Samvirkelag til å kjøpe seg inn i lokala og ta over drifta av den tidlegare Joker-butikken. Frå før hadde Vestre Sunnmøre Samvirkelag 132 medlemer med Haddal som postadresse.

Før jul 1998 vart det også kjent at Napoli Pizzeria ville etablere seg i Ulsteinvik. Firmaet skulle halde til i huset til Per Harald Eikrem ved sida av Bokhandelen til Eiken. Napoli hadde halde til i dei tidlegare lokala til Eide slakteri på Hareid i to år, og det var tyrkiske Erdal Islek som stod bak selskapet.

Hareidingen Eldar Holm i selskapet Vik Invest AS satsa i Ulsteinvik. Hausten 1998 var terrassehuset Vik Terrasse med 12 husvære i ferd med å reise seg i Vikemarka. Holm dreiv også Holm Invest AS som hadde kjøpt Fannemel-bygget i Ulsteinvik sentrum, som no skulle ha namnet Ulstein Sentrumsbygg.

Ulsteinvik opplevde ein kraftig handelsauke. Omsetninga i detaljhandelen hadde auka med nær 20 prosent dei første åtte månadene i 1998. Dette understreka posisjonen som handelssenter. Bilhandelen gjekk opp med 21 prosent i 1998 i høve til året før. Kolonialvarer var nummer to på lista over vekst. Dagleg leiar i Rema 1000 i Ulsteinvik, Jonny Mork, fortalde lokalavisa om ei dobling i omsetninga frå 1997 til 1998. Det siste året hadde forretninga selt varer for 40 millionar kroner. Mork meinte veksten i Ulstein skuldast dei mange sterke butikkane: – Vi dreg folk frå heile regionen. Eg har kundar både frå Herøy, Sande og Hareid, fortalde Mork. Det var elles solid omsetningsvekst både for møblar og klede.

Men midt i januar 1999 måtte butikken Hilde og Marit AS i Fannemelbygget i Ulsteinvik stenge, selskapet var konkurs. Den tradisjonsrike butikken var tidlegare driven av Åshild Sivertsen i ei årrekke.

Den første nyheitsmeldinga i Vikebladet Vestposten i 1999 var at eigarane av avisa hadde opna for å selje. Forhandlingane med moglege nye eigarar var alt i gang. Den 6. februar var det klart at Orkla Media kjøpte avisa gjennom Sunnmørsposten. Dette var berre eitt eigarskifte i ei rekke i løpet av 1990-talet der lokalt eigde bedrifter fekk eigarar utanfrå – og til dels frå utlandet. Mellom dei større aksjonærane i Vikebladet Vestposten var Leif B. Thorkildson, Einar Ekroll og Roar Øvrebøe.

Våren 1999 kom investeringsselskapet God Invest AS til verda. Selskapet hadde som mål å hjelpe kristne forretningsfolk. Berre ei veke etter utlysinga i mai 1999 var selskapet halvvegs til målet på tre millionar i aksjekapital innan 10. juni. Leiar i interimsstyret, som skulle bli sjølve frontfiguren i selskapet, Agnar Dag Ulstein, hadde håp om at dei ville få inn dei resterande 1,5 millionane. Meininga var at 10 prosent av overskotet skulle gå til evangeliserande arbeid. Førebiletet for Ulstein og God Invest var Hans Nielsen Hauge, som var både predikant og forretningsmann. Litt seinare på året melde God Invest at mange ville investere i selskapet.

I 1999, etter 33 år, trappa Gunvor og Dagfinn Dragsund ned forretninga Radioservice i Ulsteinvik. Forretninga heldt førebels fram, og det var Serviceringen som tok over. Men Dragsund gav seg ikkje heilt; han held ei stund fram med reparasjonar av TV, videoar og liknande i eit lokale ved tannlegesenteret ved sida av Fredheim.

Planlegginga av Mega-utbygginga i Ulsteinvik gjekk sin gang. I september 1999 kunne vi lese i lokalavisa at Vestre Sunnmøre Samvirkelag hadde sikra seg Skeide-eigedomen, og etter fleire års arbeid såg no planane ut til å bli ein realitet. Kontraktar med butikkar og verksemder som ville etablere seg i bygget skulle vere klare i løpet av hausten. Planen var å starte bygginga i 2000. Men som vi veit, tok Ulsmo over heile prosjektet og bygde Blåhuset. Det kjem vi tilbake til i neste hovudkapittel. Men førebels var namnet Vik kjøpesenter – med planar om 16 butikkar, ein etasje med kontor og parkeringshus i kjellaren.

Hausten 1999 kom meldinga om at Bard Eigedom AS med Bjarne Wærdahl som dagleg leiar la planar om eit fireetasjes forretningsbygg i Ulsteinvik sentrum. Bygget skulle etter kvart bli kjent som Convex-bygget og skulle stå klart i oktober 2000.

Familieselskapet Borgstein AS kjøpte Brattøra-eigedommen frå Moldskred-familien hausten 1999: – For oss er det viktig at dette området er eit av dei få sentrumsnære områda som er igjen i Ulsteinvik, fortalde Henning Ulstein til lokalavisa. Det skulle etter kvart vise seg at Borgstein ville nytte eigedommen til eit forretningssenter – Amfi.