Trusselen om å legge ned den ti år gamle telefon-vaktsentralen i Ulsteinvik spissa seg til utover i 1991. Men ein rapport frå dei fire eigarkommunane på Ytre Søre Sunnmøre konkluderte sommaren 1991 med at kompetanse innan kommunikasjon og kjennskap til geografien var viktigare enn medisinsk kunnskap. Dei meinte at vaktsentralen måtte oppretthaldast. Dei fire kommunane søkte derfor om dispensasjon frå den nye beredskapsplanen frå Sosialdepartementet, som ville sentralisere den medisinske meldetenesta. Men det gjekk mot nedlegging av vaktsentralen, ikkje så langt fram i tid
Den 4. mars 1992 vart telenettet i Ulstein og Hareid kommune digitalisert. Dermed var heile øya kopla om til eit moderne telefonnett. Kommunane vart den fjerde av dei 17 kommunane i Ålesund teleområde som vart digitalisert.
Hareid starta så vinteren 1993 planlegginga av ein legevaktsentral ved sjukeheimen: – Vi vil med dette invitere Ulstein til å samarbeide om denne sentralen, skreiv ordførar Einar Holm i eit brev til nabokommunen. Han konstaterte at arbeidet med å halde fram med den gamle telefonvaktsentralen i Ulsteinvik hadde slått feil. Dispensjonssøknaden hadde blitt avslått både i Helsedirektoratet og Sosialdepartementet. I mars 1993 signaliserte Ulstein at kommunen gjerne ville samarbeide med Hareid om sentralen.
Torsdag 30. september 1993 var siste dagen for Vaktsentralen i Ulsteinvik. På ettermiddag same dagen tok legevaktsentralen for Hareid og Ulstein ved Hareid sjukeheim over. Gjennom 13 år hadde vaktsentralen i Ulsteinvik tent folket på Søre Sunnmøre. No miste dei 10 tilsette jobben sin, alle kvinner. Den siste tida hadde 20-25 sjuke- og hjelpepleiarar ved Hareid sjukeheim fått opplæring i korleis den nye sentralen skulle handterast. Ein av pleiepersonalet skulle til ei kvar tid gå med det berbare varslingsapparatet samstundes som ho passa det vanlege arbeidet sitt. Sentralen fekk telefonnummeret 70013113.
