1980-talet var eit innhaldsrikt tiår for utviklinga i Ulstein. Kommuneleiinga visste at det var avgjerande for næringslivet at det var tilgang på husvære og tomter, både for tilflyttarar og innfødde. 1979 hadde vore eit bra byggjeår i Ulstein kommune; 50 bustadhus med 58 husvære vart sette i arbeid. Dei fleste av husa kom til i bustadfelta Hofsetmarka og Sundgotmarka. Men Flø figurerte no endeleg på bustadstatistikken med fire hus, og likeeins Eiksund med fire hus.

På begge stader var det dessutan hus under prosjektering. I krinsane elles kunne både Dimna, Røren og Ringstaddalen notere seg for nybygg. Flø var likevel framleis utan byggjefelt, og våren 1982 kunne Vikebladet fortelje at minst 10 unge ville ha bygt på Flø om dei fekk tomt. No var det mange som reiste frå bygda. Skulesjefen hadde prognosar som viste at talet på elevar ved Flø skule ville gå ned på sikt. Det skulle gå endå fleire år før Flø fekk seg byggjefelt. Då var det for seint for skulen.

Det er elles byggjeaktivitet ulike stader i Ulsteinvik. Frå tomter køyrer dumperar stadig store mengder overskotsmasse til sentrum. No er det området ved småbåthamna som blir fylt ut og skal bli nytta til ein trasé for Sjøgata som skulle kome midt gjennom området der Ulstein Forbruksforening stod. Vidare reiste Øyehols Varehus seg i Saunesmarka, bossbrenningsanlegget i same området, hotellet i Varleite, utvidinga av kvileheimen og montørstasjonen til Televerket i Saunesmarka.

I mars 1982 drøfta kommunestyret tomtesituasjonen i Ulstein. Politikarane gjekk inn for å arbeide opp feltet Solsida II i Haddal denne våren, og 33 tomter i 2. byggjesteg i Varleite like etter. Også her tok dei sikte på å kunne tilby byggjeklare tomter våren 1983. Så ville politikarane arbeide for å få klargjering av tomteområde i Dimna, Eiksund og på Ulstein.

Samtidig tok arbeidet til med det nye byggjefeltet Hofsetgrenda, seinare heitande Støyleråsa. Ein gjeng privatpersonar hadde kjøpt opp området, fått arkitektfirmaet Arkitre i Ålesund til å hjelpe seg med utforming og anbod og la opp til at feltet skulle byggjast ut i tungrupper med fire hus i kvart tun, til saman 19 hus. Utover i 1983 stod feltet ferdig, og det vart vellykka.

Ulstein kommune melde gjennom Vikebladet om ein god tomtesituasjon i februar 1983 med 32 byggjeklare tomter i tre felt, Varleite, Sundgotmarka og i Solsida i Haddal. No starta også opparbeidinga av andre byggjesteg i Varleite. Det gjaldt området mellom hotellet og byggjesteg 1. Her skal det bli plass ti tomter, og så vil feltet bli bygt opp vidare oppover, slik at det til saman vil stå 23 tomter klare i 1984.

Men den eventyrlege veksten i talet på bustader, folketal og tilflytting på 1970-talet i Ulstein flata noko ut utover på 1980-talet. I bustadplanen for 1985 til 1988 rekna kommunen med at det ville vere bruk for 52,5 nye husvære i snitt per år. I perioden 1971 til 1983 kom det til over 56 husvære i snitt per år, og i toppåret 1977 heile 63 husvære. Ved utgangen av 1984 ville det vere om lag 1690 husvære i Ulstein som gav rom til eit folketal på om lag 5420. Kommunen rekna no med at det i perioden fram til 1988 måtte byggjast om lag 270 nye bustader i Ulsteinvik, 40 i Eiksund og Haddal, 35 i Dimna, 55 på Ulstein/Skeide og 20 på Flø. Det skulle vise seg at utbygginga i Flø ikkje kom i gang i denne perioden.