Ei av sakene som endeleg var i ferd med å finne si løysing, var bossaka. Bossplassane både i Hareid og i Fløstranda i Ulstein var i ferd med å bli sprengde. Men no skal Ulstein og Hareid samarbeide, og dei har samla seg om eit bossbrenningsanlegg i Saunesmarka i Ulstein.
Anlegget har fått førsteprioritet på fylkeslista, og planen er å starte arbeidet før 1980 er omme, slik at anlegget kan stå klart våren 1981. Så raskt går det ikkje. Vedtaket har ikkje passert utan protestar. I Ulstein protesterer vel 100 oppsitjarar i Holsekerdalen og Hofsetmarka. Dei er redde for forureina røyk frå anlegget. Men saka går sin gang. Samtidig er den nye reinhaldsbilen, som kommunane deler på, klar til bruk. Han har 180 hestar og kostar 475.000 kroner, meir enn eit husbankhus.
Sjølv om det hadde teke si tid, var det stor optimisme då forbrenningsanlegget i Saunesmarka starta i januar 1982. SSR rekna med at anlegget også ville produsere mykje energi. Utover året blir det klart at også Herøy ville bli med. Otto Holstad frå Hareid vart vald til formann i det nyskipa reinhaldsverket, som etter kvart skulle bli kjent som SSR. Men gleda over anlegget vart kortvarig, og problema med støv, manglande kapasitet og forureining vart etter kvart akutte. Alt 6. april 1982 melde lokalavisa om kapasitetsproblem ved anlegget, og at SSR framleis måtte køyre boss til Fløstranda.
Norsk Samkjeleforening hadde hausten 1983 arbeidd ut ein rapport om anlegget til Søre Sunnmøre Reinhaldsverk i Saunesmarka. Rapporten synte til dels store avvik frå det som var garantert frå leverandøren. Mellom anna synte målingane at støvutsleppet somme tider var fem gonger større enn konsesjonskrava, samtidig som kapasiteten ved forbrenningsanlegget var langt mindre enn garantert. Det gjekk mot endå ei ny ordning for bosset i Ulstein.
