Den 1. september 1970 var ein merkedag i Hareid. Då kom det første prøvenummeret av den nye lokalavisa ut, Vestposten med skulemannen, forfattaren og journalisten Ivar Grimstad som redaktør, ein ekte grimsting. Grimstad skulle no kombinere avisarbeidet med jobben som rektor ved Møre Folkehøgskule i Ørsta.
Vikebladet hadde heilt sidan 1929 hatt som ambisjon å vere lokalavis for begge kommunar. Avisa baserer seg mykje på lokale meldarar, og er ikkje like tett på stoffet i Hareid, sjølv om omfanget av hareidsstoff varierer. Der er mange dyktige skribentar i Hareid, som stadig forsyner Vikebladet med artiklar, mellom desse fleire grimstingar. Det må vel også seiast at Vikebladet i 1970 mykje hadde køyrt etter same malen som gjennom alle år. Bilete var det lite av i avisa den gongen. No kom der ein konkurrent på Hareid, med offsettrykk, bilete, teikningar, leiarar, dyktige pennar og eit mylder av småstoff og notisar. Grimstingane hadde gjort eit forsøk på å starte lokalavis nokre år tidlegare. I 1962 kom Bygda ut ein gong i veka heile året, berre avbrote av feriar. Men den gongen var det ikkje økonomi i tiltaket. Åtte år seinare prøvde dei igjen, og no lykkast dei betre. Dei nytta haustsemesteret 1970 til å gi ut nokre prøvenummer medan dei venta på at trykkerimaskiner skulle kome på plass i lokala på Hareid. Eit fyldig julenummer dette året bar bod om at eigarane meinte avisa kunne vere liv laga. Det skulle vise seg å halde stikk. Den 22. januar 1971 melder redaktøren på leiarplass at Vestposten frå no av vil kome fast kvar veke. Avisdagen var fredag. Men det gjekk ikkje meir enn vel fire månader så melde redaktøren at avisa ville kome med to utgåver i veka, tysdag og fredag. Snakk om satsing. Truleg fekk dei kalde føter i det ærverdige avishuset på andre sida av Eidet. Likevel skulle det gå ei tid før Vikebladet gjekk opp til to gonger i veka.
Bladstyrar Johs. Thorkildson i Vikebladet overlét roret til Johan Ottesen i 1976. Samtidig vart det skipa eit aksjeselskap, Vikebladet AS, og avisa skulle få offset-trykk. Frå årsskiftet 1977 kom avisa to gonger i veka, tysdag og torsdag. I november 1979 etablerer Vikebladet kontor på Hareid. Svein Smørdal vart avisa sin representant der. Styreleiar Hans Gisle Holstad i Vestposten karakteriserte hendinga som avisimperialisme.
Aviskonkurransen vart no skjerpa, og Vestposten vart kraftig pressa på nyheiter frå Hareid. Sigurd Grimstad skreiv eit innlegg i Vestposten der han slo fast: – Det siste året har Vikebladet rusta kraftig opp. Dei har teke mål av seg, ikkje til å vere lokalavis, men regionalavis, der Hareid skal få sin filial. For å nå dette målet skal vi skrinlegge ønsket vårt om å ha eige organ (…). Men vi vil ha ei eiga avis.
