Ein statistikk frå 1972 viste at det var stigning i dyrka areal i Ulstein fram til 1968. Sidan då vart det dyrka mindre. I 1972 var mjølkeproduksjonen i kommunen på topp i Møre og Romsdal med 5868 kilo mjølk i gjennomsnitt per ku i året, eit høgt tal også i nasjonal målestokk. Sidan 1956 hadde kutalet minka frå 630 til 330 i 1971. Då stansa nedgangen, og i 1972 var det ein liten oppgang og ein auke i mjølkeproduksjonen på 12 prosent.
Resultatet av fiskeriteljinga i 1971 viste stor tilbakegang i talet på fiskarar både nasjonalt og i Ulstein. I 1960 hadde kommunen 292 aktive fiskarar, i 1971 i alt 114, 78 av desse hadde fiskeri som hovudyrke, 36 som biyrke.
Dei siste fem åra av 1970-talet var det lite endring i talet på fiskebåtar i Ulstein. I 1979 var det to større fiskefartøy i kommunen, to over 50 fot og åtte sjarkar på mellom 30 og 50 fot. Resten av dei 54 båtane som var registrerte i merkeregisteret, var under 30 fot, av desse var 25 med i fiske i vesentleg grad. Fiskarane i kommunen stod for om lag 17 prosent av skatteinntektene. I august 1979 kunne Knut Arne Høyvik om bord i Ulstein-båten Karl Vadøy rapportere om godt fiske, men det var krevjande å halde båten mellom anna på grunn av kostnadene. Karl Vadøy var ein 90 fots bankfiskebåt og på dette tidspunktet den einaste større fiskebåten i kommunen etter at Lovinda var seld. Det var Arne Høyvik og sonen Knut Arne som åtte båten, som dei no dreiv på femte året. No dreiv dei banklinefiske ved Shetland og Færøyane med 11 mann om bord.
