På tampen av 1976 kunne ordførar Olav B. Urke i Ulstein summere opp situasjonen slik: – Gymnaset og idrettshallen er under arbeid; det vil bli eit løft for kommunen som må bere 50 prosent av kostnadene. Det vil auke lånegjelda også i året som kjem, men skatteinngangen har vore god, vi har teke over Ulstein Vassverk og Haddal Vassverk, 84 hus er under bygging i kommunen, og vi har asfaltert vegar for 400 000 kroner utan å ta opp lån.

No må vi ta tak i kloakken, sa Urke ifølgje Vikebladet. Bustadfeltet Hofsetmarka var byggeklart i 1976, og dei 42 tomtene for einebustader i feltet disponerte. Kommunen var no i ferd med å regulere resten av feltet i Hofsetmarka. Det var også sett i gang klargjering av 17 einebustadtomter i Sundgotmarka. I Solsida var det ved utgangen dette året nokre få ledige tomter igjen. Men på Flø var det enno ikkje noka løysing med omsyn til bustadfelt; det skulle gå enno ei tid med mykje diskusjon før det kom i orden.

Folketalet i Ulstein auka frå 5084 i januar 1976 til 5162 i januar 1977, ein vekst på 78 eller vel 1,5 prosent. I alt 275 personar hadde flytta til kommunen. Men folkeveksten flata ut i 1977, slik at folketalet 1. januar 1978 var 5180, ein vekst på berre 18. I 1977 var det fleire som flytta frå kommunen enn som flytta til, 260 mot 246. Men i 1978 var veksten i rute igjen med ein vekst på 80, slik at folketalet 1. januar 1979 var 5260. Ved starten av 1979 slo ordførar Olav B. Urke fast at det ikkje var krisetider i Ulstein, og at kommunen låg godt an i høve til andre kommunar. Men han var spent på sysselsetjinga i verftsindustrien det komande året.

*

Barneparken ved idrettshallen nedanfor Ulstein ungdomsskule kunne markere tiårsjubileum i 1978. Første planleggingsmøtet vart halde alt i 1961, men arbeidet møtte massiv motstand i nemnder og kommunestyre. Først i 1968 vart det fart i arbeidet. No vart eit område ved barneskulen peika ut, og Åse Lillebø Kristiansen tok på seg arbeidet med å vere den første «parktanta». I tida etter hadde barneparken vore til stor glede både for born og foreldre. Det var foreldra som dreiv parken, men kommunen hadde stilt med tomt og bygt parkhuset. I 1979 vart huset utvida. Det var då 28 born i barneparken.

Hausten 1979 utvida Ulsteinvik sanitetsforeining 6-årsklubben i Bjørndals Minne til å omfatte ein korttidsbarnehage for born mellom fem og sju år. Barnehagen skulle no vere open for to grupper på 14 born fire timar to dagar i veka. To kvinner arbeidde som «tanter» ved barnehagen.

Utover på 1970-talet bygde Ulstein kommune opp tiltak som skulle hjelpe eldre menneske til å bu i heimen så lenge dei ønskte. Kommunen hadde som mål å gi dei eldre eit allsidig tilbod som kunne hjelpe dei til eit meiningsfylt liv i det miljøet dei var vande med: heimehjelp, heimesjukepleie og husmorvikarteneste. Kommunen gav dessutan tilskot til pårørande som pleia sine eldre heime. Elles hadde saniteten sett i verk ulike trivselstiltak, slikt som fotpleie og besøksteneste. Sosialsjef Arthur Grønmyr kommenterte tiltaka i Vikebladet i juli 1978: – Det er særleg to ting som talar for at dei eldre bør bu heime lengst råd, trivsel og økonomi. Svært mange av dei eldre ønskjer å bu heime. Dessutan er ei slik ordning som oftast billigare for samfunnet enn opphald på institusjon.

I 1979 oppretta Ulstein kommune bustadkontor. No skulle dei samle ein del funksjonar som tidlegare var spreidd på ulike etatar, og gjere det lettare for publikum med omsyn til bustadsaker, bustønad, utbetringslån og –tilskot, eigenkapitallån og tildeling av tomter i kommunale felt.

Elisabeth Starheim var den første bustadsekretæren i Ulstein. Ho var mellom anna oppteken av å legge til rette for meir variert bustadbygging og la grunnlaget for det som seinare skulle bli Hofsetgrenda. Starheim ønskte at det skulle dannast bustadselskap i kommunen. Men så vart ho sjuk og døydde etter ei tid.

Tysdag 9. januar 1979 opna den nye tannklinikken i Ulsteinvik. Bygget var levert av Moelven og hadde tre behandlingsrom for folketannrøkta. Ti år tidlegare skaffa Hareid lokale til folketannrøkta. Det førte med seg at elevane i Ulstein måtte ta bussen over Eidet for å få behandling. Nokre år seinare fekk Ulstein tannlegelokale i rådhuset, men på grunn av for små lokale måtte kommunen sjå seg om etter større lokale til tannlege og PPT-teneste.