Våren 1973 garanterte kommunen for eit lån på 175.000 kroner til å finansiere leidningsnettet til Mosvatnet. Det var tale om ei restfinansiering, og utbygginga til Mosvatnet kosta totalt 550.000 kroner. Men å få hand om Mosvatnet som framtidig, permanent vasskjelde skulle bli ein lang prosess for Ulstein. I 1975 vart Ulstein Vassverk AL etter forhandlingar samd med kommunen om at kommunen skulle overta vassverket med alle eigedommar.
Ulsteiningane måtte ha ei større drikkevasskjelde i takt med folkeauken. Striden med grunneigarar i Hareid om Mosvatnet spissa seg stadig til. Hausten 1979 vart det klart at kommunen ville ta saka for retten. Ulstein ville med lova i hand prøve å få Mosvatnet i Hareid kommune som drikkevasskjelde ettersom kommunen ikkje hadde oppnådd semje med grunneigarane.
Ulstein kommunale elektrisitetsverk arbeidde heile tida aktivt for å skaffe nok straum til innbyggjarar og næringsliv. I 1973 tok kommunen til dømes opp eit lån på 400.000 kroner til ny stålrørgate i Ulsteindalen og til kraftforsyninga til bustadfeltet Solsida i Haddal og til ombygging av kraftlina Hasund-Dimnøya.
Frå 1. januar 1976 gjekk Ulstein (og Hareid) ut av Søre Sunnmøre Kraftlag. No ville Ulstein kommunale elektrisitetsverk på vegner av kommunen kjøpe krafta direkte frå Tussa.
