Ulstein hadde mot slutten av 1970-talet fire postområde: Eiksund, Garnesgrend, Haddal og Ulsteinvik. Tilhøva hadde vore stabile, og Postverket hadde 14 tilsette i kommunen. Men det nærma seg no den perioden der posten skulle bli rasjonalisert og fleire postkontor lagde ned.
Dette råka også Ulstein. I 1977 var Eiksund postområde 75 år. Frå 1902 til 1921 var namnet Eksund. Den første postopnaren var Severin H. Eiksund. I jubileumsåret var det sonen Arthur Eiksund som var postopnar. Han hadde hatt stillinga i 41 år.
Ulsteinvik Postkontor flytta i juni 1978 inn i nye lokale i bygget til Sunnmørsbanken. Kontoret fekk inngang både frå Bjørndalsvegen og opp frå Sjøgata. Postmeister i Ulsteinvik var no Olav Henriksen. Til stades ved opninga var mellom andre det legendariske landpostbodet Fridtjof Hofseth. Kontoret hadde 11 tilsette, og flest kvinner.
