I oktober 1964 vedtok Ulstein kommunestyre at det skulle byggjast idrettshall med symjebasseng aust for Ulsteinvik skule. I budsjettet for 1968 var både idretts- og symjehall, hybelhus og pengar til opparbeiding av bustadfelt kome med. I slutten av 1968 kom dei første annonsane i lokalavisa, som fortalde om opningstider for symjehall og badstove. Det skulle bli offentleg bading tre dagar i veka.
I 1966 vart den nye skulen i Eiksund teken i bruk. Hausten 1967 vart skulen formelt vigsla. Festsamkoma gjekk for seg i gymnastikksalen under leiing av krinsformann Arthur Eiksund. Skuledirektør Anders Stølen var til stades, Leiv Havåg las sin eigen prolog, skuleborna sytte for song, musikk og talekor, og damekoret i bygda song under leiing av Per Havåg. Mykje folk var til stades då leiar i byggenemnda, Arthur Eiksund, overleverte skulen til ordførar Peter Saunes og Ulstein kommune.
Kommunaldepartementet oppmoda midt på 1960-talet 147 kommunar i Noreg om å utarbeide eit bustadprogram for den komande femårsperioden. Ulstein var tidleg ute. Formannskapssekretær Asbjørn Waage (seinare kontorsjef/rådmann), arbeidde fram bustadplan for perioden 1966-1970. Denne vart så vedteken av kommunestyret. I utgreiinga omkring planen skriv Waage mellom anna: – Næringslivet i kommunen gir i dag høve til full sysselsetjing. Men ei krise i skipsindustrien kan skape problem og forrykke bustadprogrammet. No er mangelen på bustader eit problem for industrien i kommunen og er eit hinder for å skaffe nok arbeidskraft. Det er ei kommunal oppgåve å løyse dette problemet.
Waage peikte på utrekningar som viste at folketalet i 1970 ville ha kome opp i nærare 4375, ein auke på 440 frå 1. januar 1966. Bustadbehovet ville ligge på 1207 bueiningar per 31. desember 1970. For å skaffe tomter til desse bustadene måtte kommunen ha 385 dekar jord. Dette ville koste. Kommunen ville ifølgje utrekningane til Waage måtte ut med kring 20 millionar kroner i faste anlegg i perioden og måtte vere budd på å ta opp nærare 9 millionar kroner i lån. Waage slår også fast at bustadprogrammet ville stille store krav til administrasjonen i kommunen, ikkje minst til teknisk etat, men også til formannskapskontoret som skulle koordinere det heile. I tillegg måtte det etablerast eit nært samarbeid mellom kommunen, næringslivet og alle dei grunneigarane som måtte stille grunn til disposisjon. I ettertid veit vi at den kommunale overtakinga av tomtegrunn kunne skape konfliktar.
Men verfta var utolmodige. I fleire år hadde det vore eit problem å skaffe faglært arbeidskraft på grunn av bustadspørsmålet. Dei to største bedriftene i kommunen, Hatlø og Ulstein, såg seg i 1966 difor nøydde til å gjere noko sjølve. I samarbeid med kommunen og arbeidskontoret sette dei ned ei nemnd som skulle syte for at det vart reist to hybelbygg på Osnes.
Per 1. januar 1966 budde det 3948 personar i Ulstein. Den 1. januar 1967 hadde folketalet auka til 4026. Det var særleg unge menneske i alderen 18 til 30 år som flytta til kommunen, dei fleste frå nabokommunane. Tidleg i 1967 starta kommunen opparbeiding av bustadfeltet ved Høddvoll – med tomteplass til om lag 20 bustader, 18 private og to kommunale. I januar 1968 hadde folketalet i kommunen vakse til 4153. Vinteren 1967 var det 32 husvære under oppføring i Ulstein. Kommunen hadde også registrert 20 husvære under planlegging. I tillegg kom dei omtalte hybelhusa med totalt 54 bustadeiningar.
I løpet av sommaren 1967 tok også rådhusplassen form. Dette var området nedanfor kyrkja, Geilevika, som området heitte den gongen sjøen gjekk fram her. No vart dette eit grøntanlegg. Stadig fleire område med sjø vart i åra framover erobra av utfyllingar til tørt land for tomter til mellom anna forretningar i Ulsteinvik.
I september 1967 kunne Vikebladet igjen melde om stor byggjeaktivitet i Ulstein, både private, offentlege og industrielle bygg. På idretts- og symjehallen i Ulsteinvik var dei no i ferd med å starte på andre høgda. På nybygget ved Sunnmøre ungdomsskule, som snart skulle få namnet Sunnmøre Folkehøgskule, dreiv dei på med å pusse opp innvendig, og Ulstein kyrkje utvida våpenhuset. Den nye hallen ved Ulstein Propeller reiser seg, og Ulstein Mekaniske fundamenterer ny platehall.
Våren 1968 er det også veldig byggjeaktivitet i kommunen. Nye privatbustader kjem under tak, Kleven har reist ein stor plateverkstad, rutebileigar Kolbjørn Moldskred har sett opp eit ruvande garasje- og verkstadbygg ovanfor Saunesbrua, og arbeidet med å byggje hybelhusa på Osnes er godt i gang. Samtidig skulle Ulstein Samvirkelag gå i gang med ei omfattande utviding.
Våren 1968 låg eit oppdatert byggjeprogram føre – for tidsrommet 1968-1972. Det var igjen kontorsjef Asbjørn Waage som hadde ført programmet i pennen. Tempoplanen var slik: 1968: Hybelhus for industrien og fullføring av idrettshallen. 1969: Bygging av legebustad og kontor og første byggjesteg for vassverket. 1970: vassverket 2. byggjesteg og førebuande arbeid av ungdomsskulen. 1971: Utbygging av ungdomsskulen. Bustadhus for eldre, førebuande arbeid. 1972: Vidare utbygging av ungdomsskulen. Bustadhus for eldre, avsluttande arbeid for gods- og trafikkterminal. Samtidig vart det avgjort at Bøen på Skeide ville bli skulestad for Ulstein nye skule, men det prosjektet ville ikkje bli realisert før om nokre år.
I 1969 la kontorsjef Waage fram byggjeprogrammet for 1969-73. Han skriv: – Året 1968 viste seg som eit godt år økonomisk sett for kommunen. Dette har sett kommunen i stand til å arbeide vidare med dei store byggjeprosjekta i skule- og helsesektoren. Vi har også klart å gjennomføre ulike andre oppgåver som har kome på i løpet av året. I 1968 var fødselsoverskotet på 56, og dessutan flytta det 273 personar til kommunen, medan berre 177 reiste frå Ulstein. Dette førte til ein folkeauke på heile 152, slik at folketalet i starten på 1969 hadde kome opp i 4305. Waage rekna med at folkeauken ville halde fram i 1969 og skape press på bustadmarknaden. Medan kommunen tidlegare år hadde rekna med ein byggjekvote på 59 husvære, rekna Waage med at dei no måtte opp i 69 husvære per år, og dermed 344 hus fram til 1973. Waage tenkte seg på dette tidspunktet at kommunen måtte byggje ut sju bustadfelt. Dette innebar mellom anna eit nytt bustadfelt i Hofset-Holseker-området, eitt bustadfelt på Sundgot, eitt i Haddal og eitt i Eiksund. Dessutan ville kommunen klargjere byggefeltet på Skeide. Politikarane slutta opp om denne planen.
Sunnmøre Ungdomsskule hadde innviingsfest for nybygget sitt i desember 1968. I løpet av 1969 vart det meir og meir klart at Ulstein ville få gymnas i ei eller anna form. På eit møte i februar dette året gav skulestyresmaktene på Ytre Søre Sunnmøre uttrykk for at det nye gymnaset burde plasserast i Ulsteinvik. Skulesjef Otto Strand i Ulstein hadde arbeidd iherdig for å få dette til.
Behovet for ein sjukeheim vart stadig meir tydeleg utover på 1960-talet. Det var samtidig ønske om ei utviding av kvileheimen. I 1968 hadde kvileheimen 24 plassar på aldersavdelinga og ni sjukesenger. Denne vesle avdelinga var sprengd og situasjonen vart karakterisert som prekær.
