I dette oversynet over skulehaldarar og lærarar i Ulstein, har eg også teke med klokkarane og prestane. Både før og etter innføringa av allmugeskulen sto prestar og klokkarar sentralt i opplysingsarbeidet. Allereie etter reformasjon vart prestar og klokkarar pålagde å drive katekismeopplæring på søndagar etter kyrkjetid («Kirkeordinansen» av 1539). Sjølv om konfirmasjon og allmugeskule ikkje vart innført før 200 år seinare, var dette den første spiren til ein ordna skule her i landet. I 150 år var skulen i røynda meir eller mindre ein rein kristendomsskule.

Elles gjev dette avsnittet også eit kronologisk over­syn over omorganiseringar av skulestellet gjennom heile perioden – og lærarlista er delt opp etter desse nyordningane.

Lista er komplett så langt det har vore råd å få det til. Når det gjeld dei første 150 åra, kan det vere noko usikkert- både med omsyn til kven som skulte kvar og når dei byrja og slutta som lærarar. Dersom det er tvil, har eg prøvd å gjere merksam på det. Ordninga med kombinerte postar gjer det også vanskeleg å finne fram i dei siste tiåra.