Mange kallar han «Mister UT himself»; Sigmund Borgundvåg er nestoren mellom skipsdesignarane i den maritime klynga og står bak suksesshistoria til utviklinga av UT-designa.
På mange måtar tok han med seg leiken frå barndommen inn i yrkeslivet, frå han som gutunge laga modellbåtar til han som vaksen sette ein ny standard for fartøya rundt oljeplattformene i Nordsjøen. Med utviklinga av UT-704 og UT-705 vart han og klynga på Sunnmøre ein del av det norske oljeeventyret på 1970-talet. Ideane og teikningane til Sigmund vart maritim historie. Han vaks opp i fjøresteinane på Stad. Han jobba på fiskebåtar og slepebåtar og observerte korleis båtane oppførte seg i sjøen. Etter teknisk skule kom han til Ulstein i 1964 via eit par andre store verft. I Ulsteingruppen tok han mellom anna leiinga av designavdelinga og starta etter kvart å utvikle supplybåt-modellar.
Det vart ei suksesshistorie. Då Ulstein mellom anna selde designselskapet sitt i 1999, følgde Sigmund med – og hamna etter kvart i Rolls-Royce, der han har vore til dags dato, sjølv om han for lengst har passert 70.
Dei første offshorefartøya i Nordsjøen var amerikanske og laga for heilt andre tilhøve enn det Borgundvåg kjende til utanfor norskekysten. Han tok med seg røynslene og laga mellom anna høgare fribord. Båtane skulle gå godt i sjøen, vere trygge og fungere godt for mannskapet. Denne utviklinga har halde fram til dags dato.
