Ståle Rasmussen har vore konsernsjef i Kleven sidan 2007 og såleis vore med på eit verftseventyr utanom det vanlege. Som musikar har han også spelt ei rolle kulturelt.
Ståle er bakarson og oppvaksen midt i Ulsteinvik sentrum. I 1987 var han ferdig utdanna siviløkonom frå BI i Oslo og gifte seg same året med Sissel Kleven. Dei har tre gutar. I 1989 flytte dei til Sunnmøre; og han vart økonomisjef i Ørsta Stål i 1991. Familien slo seg ned i Ulsteinvik. I 2000 byrja Ståle som administrerande direktør for Kleven Verft.
Ståle vart ny konsernsjef i 2007 om lag samstundes med at marknaden omskapte ordreturken til ei flaumstor elv. Kleven teikna kontraktar som aldri før. Hausten 2014 står Kleven med ei ordrebok på 12 milliardar kroner og ei rekke opsjonar på lur. I år er 50 prosent av alle norske verftsordrar hamna hos Kleven. Rasmussen & co. har hausta dei beste årsresultata i konsernets historie. Heil 400 millionar kroner har dei investert i å fornye Kleven og Myklebust dei siste åra. Robotisering og straumlinjeforma produksjonsprosessar er ein del av bildet.
Ståle har opplevd mange høgdepunkt. Eitt av dei var då Erna Solberg døypte «Olympic Taurus” på Søndre Akershuskai i Oslo laurdag før cupfinalen i 2012. Byen var farga blå, og dagen etter vart Hødd noregsmeister.
Ståle er ein talentfull songar og dyktig på gitar. Han har spelt i fleire band. «Alice» ruvar enno i minnet til musikkinteresserte ulsteiningar. Han har halde musikken ved like, opptrer med mellomrom lokalt og nyttar musikken til å skape fellesskap og kontaktar i det maritime miljøet.
