Skulestyrar Reinhard Høydal vil først og fremst bli hugsa for dei mange avisartiklane sine. Han var bokmann og skribent, og gjorde ein stor innsats for folkeboksamlinga i Ulsteinvik.
Høydal vart fødd i Bergen, vaks opp i Hyllestad og gjekk på skule i Voss og Volda. Han fekk etter kvart kone og to born. I 1951 vart han skulestyrar ved Ulsteinvik folkeskule. Ei stilling han hadde til 1969 då han gjekk av med pensjon.
Men kanskje var det i litteraturverda han levde sitt rikaste liv. Her vandra han som kjentmann i poesi og prosa mellom nye og eldre bokverk. I heimen sin bygde han opp ei stor og utsøkt boksamling. Mot slutten av livet gav Høydal 1500 av desse bøkene til Hyllestad kommune. Han gav også mange bøker til Ulstein vidaregåande skule. Bokkunnskapen nytta han mellom anna til å skrive bokmeldingar, til dømes i Sunnmørsposten gjennom ei årrekke. Skreiv gjorde han heile livet. Han var medarbeidar i Gula Tidend, Dagbladet og Sunnmørsposten, redaktør av Nordtrønderen ein periode. Han skreiv tallause artiklar i Vikebladet, der han også hadde si faste petitspalte, «Mannen med pipa». Han skreiv noveller og forteljingar til dømes i Norsk Barneblad og Nynorsk Vekeblad. Og han skreiv ei rekke prologar, revyviser, rim og kvad som han gledde publikum med i lyd og lag. Frå 1952 til 1957 var Reinhard Høydal leiar for Ulstein kunstlag. Han sat i kommunestyret for Venstre.
Han var ein lang periode primus motor for folkebiblioteket i Ulstein, eit arbeid han gjorde i fritida.
