Olav Hofseth er gründer og oppfinnar. Han står bak vakuumtoalett-løysinga til Jets Vacuum og var med på å starte bedrifta. Jets er blitt eit industrieventyr med internasjonal ry.
Olav er fødd og oppvaksen på Sigvaldhaugen med fem brør. Foreldra var Selma og Osvald Hofseth. Han gifte seg med Unni f. Brandal i 1964. Dei har tre born. Olav utdanna seg til maskinsjef i Ålesund og siglde ute med Bergesen frå 1965 til 1977. Så jobba han på Bergens Rørhandel i Ulsteinvik, og der fekk han ideen om å gjere betre dei sanitære løysingane om bord i skip. Olav hadde gjort mykje for å jobbe inn vakuumpumpeløysingar i den norske skipsbyggingsmarknaden. Med erfaring som maskinsjef i utanriksfart gjorde han ein omfattande innsats for å gjere desse produkta betre. I 1986 sa han opp stillinga si ved Bergens Rørhandel og gjekk inn i samarbeid med John Gjerde AS i Sande og Marin Teknikk i Herøy. Målet var å starte ei bedrift som kunne utvikle ei ny og betre vakuumløysing. Blakk, men med stort frimot, etablerte han Jets. Jets er ei suksesshistorie, men ikkje ei solskinshistorie. Det har handla om hardt arbeid og vilje til utvikling og tilpassing.
Olav har vore styreleiar i Ulsteinvik Indremisjon i åtte år. Han har leia eigarstyret for Tryggheim barnehage i nærare 20 år, og stått i spissen for Ulstein KrF i fire år; styremedlem i 20. Han har sete i kommunestyret i åtte år og like lenge i skulestyret. Han er ein trufast israelsvenn og har vitja landet fleire gonger.
