I dag er «Sjøborg» kjent som kulturhuset i Ulsteinvik. Men det var Julius Ulstein som sette opp det opphavlege Sjøborg i Ulsteinvik i 1917. Julius var fødd på Ulstein og døydde 103 år gammal.
I 1916 gifte han seg med Sina Rotnes (Vartdal). Dei fekk seks born. Julius fekk sett opp Central hotell i 1915. Dette var det største og flottaste bygget i Ulsteinvik – utanom kyrkja – på den tida. Julius måtte gå frå hotellet då han gjekk konkurs i 1922. Kommunen overtok bygget, og Sina dreiv hotellet vidare medan Julius reiste til Svalbard for å vere med på å vinne ut kol. Kona sparte pengar, det same gjorde han, og det gjorde dei i stand til å setje opp ein ny hotellbygning i Ulsteinvik (1927). Denne bygningen stod til midten av 1960-talet, då han måtte vike plass for eit nytt og moderne hotell. I 1982 bygde dei – saman med andre investorar – nytt hotell i Varleitet ovanfor Ulsteinvik sentrum, noko som i dag har blitt til Sunnmøre Folkehøgskule.
Sjøborg vart rive på 1970-talet etter å ha tent fleire bruksområde. I første etasje var det damskipsekspedisjon, der Julius var ekspeditør også etter at kommunen hadde teke over eigedommen. Det var også ein lang periode mottak av fisk. Sjøborg hyste også heradskasserar, likningskontor og forsyningsnemnd. Formannskapet og kommuneingeniøren heldt også til her.
Julius var ein typisk entreprenør. Då han hadde bygd opp hotella eller Sjøborg, var han liksom ferdig med det. Andre måtte ta hovudansvaret for drifta.
