Borghild Hatlemark starta som jordmor i 1916, og fram til ho slutta i 1956 hadde ho teke imot 2000 born. For dette arbeidet mottok ho 1. juli i 1957 Kongens Fortenestemedalje.
Å vere jordmor på den tida innebar ofte strabasiøse turar i kjerre og båt; snart til Fjelle og snart til Vattøya og Flø. ”- Det var vinter i ein drivande snøkave”, fortalde ho. ”Edvard Fjelle henta oss med slede. Men det var så gale med snøfok at ingen av oss såg kvar vi for. Berre hesten visste det, og det vart berginga den gongen. Elles minnest eg mange båtferder til Hatløya og Vattøya i ymse slag vêr. Karfolka måtte ofte bere meg både om bord og frå borde i sjøgangen. Alle fødslar var heime den gongen, for folk hadde faktisk betre heimehjelp enn i dag. Men mange var fattige og hadde mest ikkje kjerald eller ause i huset. Det kom vel med at eg var van med litt av kvart i min eigen barndom”, fortalde ho til Magne Grimstad sen på sin 80-årsdag.
Borghild Hatlemark, som kom frå Rødven i Romsdalen, utdanna seg til jordmor i Bergen, og jobba med det i over 65 år.
Livet var også tøft for Borghild; ho hadde ein sjuk mann i 13 år, og miste to born og mann på rekke og rad. Det var hardt.
Best hadde Borghild det då ho fekk stelle plantene i hagen og spa opp bedda. Ho brukte å spøke med at det var gartnar ho skulle ha vore. I tillegg var ho med i foreiningslivet i misjonsforeining, husmorlaget og saniteten.
