Bertha Karoline Osnes (f. Søvik) var ein av få kvinnelege gründerar i si tid i Ulstein. Ho makta å skape eit levebrød for seg og familien gjennom drifta av det som «alle» kjende som Berthakiosken midt i Ulsteinvik sentrum.
Bertha var fødd på Straumshamn i 1907 og voks opp med fem sysken. Ho gifte seg med Ruben Osnes frå Ulstein i 1943. Dei fekk to born. Dei flytte til Ulsteinvik i 1953. Ruben var sjømann og døydde i 1966.
Det var kring midten av 1950-talet at gardbrukar Johan P. Ulstein sette opp ei salsbu på haldeplassen i Ulsteinvik. I 1960 selde han bua Iskrembaren til Ruben J. Osnes, og frå same året tok ekteparet Bertha og Ruben over drifta av kiosken. Dette fall i tid saman med ei akselererande utvikling i bygda med omsyn til industri, kommunikasjonar, folketalsauke, bustadreising, tenesteyting og handel.
Kiosken låg sentral ved hotell, kai, busshaldeplass, telefonsentral, drosjesentral og ferjekai. Dermed vaks talet på kundar raskt, og Bertha utvida vareutval og tenester. Hit til kiosken kom reisande, ikkje berre for å kjøpe kioskvarer, men og for å få greie på buss- og ferjeruter – og kanskje søkje ly for vind og ver. Hit kom arbeidarar frå verfta, skuleelevar og andre, kjøpte aviser, ei brus – osv. Til tider kunne folk stå som sild i tønne i den vesle kiosken. Bak disken stod eigar og drivar Bertha Osnes, vennleg, blid og tenestevillig. Berthakiosken vart eit lokalt landemerke, ein treffstad med sin eigen kultur og eit gryande nytt kioskkonsept lokalt.
Men alt har ein ende, utviklinga i bygda gjekk sin gang, og i 1982 kravde kommunen at kiosken måtte fjernast innan 1. april året etter. Då pakka Bertha saman sakene sine og avslutta om lag 22 år samanhengande kioskdrift. Ein epoke i Ulsteinvik var over. Etterpå vaska ho på Vikebladet i fleire år.
