Arne I. Jørgensen var første rektor ved Ulstein vidaregåande skule, eller Ulsteinvik gymnasklassar som det heitte den første tida. Jørgensen stod sentral då den nye vidaregåande skulen vart reist og teken i bruk i 1977.
Arne vart fødd i Tvedestrand, der han vaks opp. I 1952 reiste han til Oslo for å studere. Han valde realfag. I 1960 flytte han og kona til Molde, der han fekk jobb som lektor og inspektør på gymnaset. Dei fekk etter kvart tre born
I 1971 var det duka for oppstarting av gymnasklassar i Ulsteinvik. Jørgensen vart utnemnd til rektor og fekk jobben med å bygge opp det som starta med to klasser (kvar med 27 elevar frå heile regionen) på Bjørndals Minne til ein fullverdig vidaregåande skule. Den første tida bar preg av provisoriske ordningar og ein litt utfordrande utstyrssituasjon.
I 1972 vedtok Ulstein kommunestyre å be fylkestinget gjere vedtak om å etablere vidaregåande skule i Ulsteinvik for Vestre Sunnmøre region. Kommunen ville stille høveleg tomt til disposisjon. Den nye skulen vart teken i bruk i 1977, medan idrettshallen først stod ferdig året etter. Innflyttinga vart legendarisk, då Jørgensen steig inn i klasseromma og bad elevane bere med seg pultar og stolar opp til den nye skulen. Lang, lang rekke. Han var og ein særs dugande pedagog, og godt likt av elevane sine. Jørgensen sat som rektor til 1998.
Arne I. Jørgensen dreiv friidrett i studietida og tok med seg denne interessa til Ulsteinvik, der han straks vart engasjert i Hødd som trenar og leiar for unge løparar. Her la han ned ein stor innsats over mange år. Dei siste åra før han gav seg, var han aktiv i trimgruppa.
