Aksel Hauge har vore aktiv og samfunnsengasjert pådrivar i politikken, kulturen, historielaget, godtemplarlosjen og mykje meir. Aksel Hauge var skipsrøyrleggar ved Ulstein Verft frå 1953 – 2000, 47 år.
Han har sete i ei rekke kommunale og regionale utval, styre og råd gjennom fleire tiår. I over 50 år har han vore aktiv med i Arbeidarpartiet, i periodar som leiar. Han sat i Ulstein kommunestyre frå 1968-80, av dette to periodar i formannskapet. Han har særleg vore engasjert sosialpolitisk, og har såleis sete i helse- og sosialutvalet som medlem og leiar i 22 år. Han har vore styreleiar i den verna bedrifta Ulstein produksjon i 20 år og har hatt ei rekke verv på liknande område t.d medlem og styreleiar for Volda sjukehus. Han har vore lekdommar i Lagretten i 30 år, og «skjønnsmann» i 36 år.
Alt i 1952 byrja han i Ulstein Mannskor, der han framleis er aktiv. Han har vore stemneleiar og ansvarleg for fleire songarstemne både lokalt og regionalt. Han har også vore leiar i Sunnmøre Songarlag. Han har fleire gonger vore nytta som solist, og i 2004 vart han æresmedlem i koret. Han har også vore styremedlem i Norges Songarlag.
Som leiar i Ulstein historielag har han sytt for auka aktivitet og leidd redaksjonsnemnda for årsskriftet Levd liv som kjem ut for tiande gong denne hausten. Han har vore aktiv medlem i Godtemplarlosjen IOGT i over 60 år. Han har vore med i Tempelriddarordenen i over 30 år.
Hauge har vore svært aktiv i kulturlivet gjennom 60 år. Han fekk Ulstein kommunes kulturpris i 2008. Privat har han også vist eit stort sosialt engasjement, og saman med kameratar i mannskoret har han vore fast underhaldar for pensjonærane ved Ulstein sjukeheim. Aksel har fått Kongens fortenestemedalje.
