Konsentrasjon om det eine naudsynlege har vore eit varemerke for indremisjonsrørsla. Ein har sett forkynninga av dom og frelse som sitt første og einaste oppdrag. Dette har også ført til at det er sjeldan foreininga har engasjert seg i saker av samfunnsmessig art – vel å merke om ein ser bort frå Gamleheimen. Berre ved to høve finn eg slike utspel. Ved eit høve skreiv dei til heradsstyret og ba dei forby dans på den nye kommunekaia og midt i 20-åra vende dei seg til bokhandlaren og ba han halde att når det galdt sal av «dårlege» bøker. Likevel er det grunn til å tru at indremisjonen indirekte har hatt stor politisk innverknad gjennom dei av medlemane som gjekk inn i lokalpolitikken.
Kvar står så indremisjonen i Ulsteinvik i dag? Aktiviteten har halde seg jamnt dei siste tiåra. Hovedforeininga har sine møte søndag føremiddag og sine nattverdmøte ein gong i månaden. Ein har prøvd å ha høne- og samtalemøte kvar onsdag. I tillegg til desse faste møta kjem to møteveker kvar vår og eit vekelangt bibelkurs kvar haust.
Tre kvinneforeiningar arbeider for indremisjonen. Det er Osnes Kvinneforening, «Den lille gren» og «Vårknopp». Bedehusforeininga vart teken oppatt for eit par år sidan og arbeider i dag aktivt for bedehuset.
Desse sit i styret for hovedforeininga i jubileumsåret: Olav Hofseth (formann), Ottar Nygjerde (nestformann), Agnar Dag Ulstein, Janny Engås, Ingrid Ringstad, Reidun Røyset og Johan Sverre Ulstein. Oddbjørn Ringstad er kasserar.
Foreininga driv også barne- og ungdomsarbeid. Yngres- og yngstes-avdelingar samlast fast i bedehuskjellaren annankvar onsdag. Annankvar laurdag har IUF ungdomskveldane sine same staden og det må nemnast at IUF her har halde god kontakt med Ulstein kr. Ungdomslag gjennom fleire år for å unngå kollisjonar.
Heilt nytt er det at IUF har prøvd å få i stand ei fast ordning med andakter på Sjukeheimen.
I februar 1982 tok Eldar Skeide til i ei nyoppretta stilling som områdesekretær i indremisjonen. Han har kontor i Ulsteinvik og skal spesielt ta seg av og fylgje opp barne- og ungdomsarbeid i kommunane Herøy, Sande, Ulstein og Hareid. Etter avtalen skal han også kunne nyttast av Sunnmøre Indremisjon til nokre møteveker, ein del einskildmøter og leirteneste om sommaren. Skeide har gått på Det Vestlandske Indremisjonsforbund sin bibelskule i Bergen.
