Gjennom dei 20 åra Kirsti Pedersen Haugen budde i Ulstein, var ho sterkt med på å gi kulturlivet i Ulstein eit lyft. Ikkje berre med sine eigne scenebidrag, men like mykje ved å lyfte fram andre, ofte unge, talent.
Kirsti voks opp i ein musikkglad heim i Sandefjord. Ho openberra sjølv tidleg eit talent både for song og musikk. I tillegg til songen lærte ho seg fleire instrument. Mest nytta ho piano, fiolin, gitar og bratsj. I 1979 vann ho Prøysenprisen med eit visesongprosjekt. I 1982 kom Kirsti til Ulsteinvik, då ho vart lærar på Sunnmøre Folkehøgskule. Ho gifte seg med Peer Haugen frå Grimstad. Dei har tre born. Dei kjøpte seg hus på Osnes, og Kirsti gjorde seg raskt gjeldande i kulturlivet lokalt.
På 70-talet hadde ho starta gruppa Siloa. No fekk denne gruppa ein ny start med songarar og musikarar frå Ulstein. Gruppa opptrådde i mange samanhengar, ikkje minst gjorde dei inntrykk då dei førte an i lovsongen under fleire store Oasesamlingar rundt om – og fleire gonger i kyrkjene på Hareidlandet.
Ho jobba lenge som regionsmusikar og Møremusikar, og gjennom arbeidet sitt i musikkskulen kom ho i kontakt med mange unge. Ho var spesielt flink til å sjå talenta og oppmuntre dei til å kaste seg ut i det. Kirsti dirigerte Profil (Ulstein tensing). Under Julenattineen i 2002 fekk Kirsti Ulstein kommunes kulturpris.
Eitt av dei arrangementa som verkeleg står att etter Kirsti, er «Julenattineen», ein kyrkjekonsert rett før jul. Arrangementet har blitt tradisjon i Ulstein. Ho var initiativtakar, akkompagnatør, korist og solist. Under Julenattineen i 2002 fekk Kirsti Ulstein kommunes kulturpris. Dette året flytte ho og familien til Grimstad.
