Magne Grimstad var lærar og rektor og gjorde ein omfattande innsats for å bygge opp speidararbeidet i Ulstein. Han verka og som kordirigent. Han har også vore ein svært aktiv skribent i lokalavisa.
Magne vaks opp på Grimstad i Hareid på gard med foreldre og fem brør. I oppveksten var han aktiv speidar heilt til han reiste på lærarskule i 1946. Då han kom til Ulsteinvik som lærar i 1954, låg triangelarbeidet og speidararbeidet nede. Der var verken leiarar eller gutar. Magne såg oppgåva og starta arbeidet med å byggje opp speidararbeidet på nytt. Snart synte speidarflokken att både i 17. mai-toget og elles i bygda.
I 1963 kjøpte han seg hyttetomt i Eiksund. Då hytta kom opp, vart det mange samlingar og ulike speidaropplegg ved hytta og på holmane. Eit år gjorde NRK opptak ved hytta. Eit anna år hadde dei besøk av ein speidartropp frå Austlandet. Frå 1968 starta han sjøspeiding også. Dei skaffa seg båt som dei fekk bygd om til snekke. Båten fekk namnet “Hod”.
Magne vart tilsett som rektor ved Ulsteinvik barneskule og leia skulen fram til 1993, med eit par års permisjon. Han var dirigent for Ulstein kr. Blandakor i 10 år, og han har vore ein svært aktiv skribent i lokalavisa. Portretta hans av særprega sambygdingar har fått plass mellom stive permar. Han sat i kommunestyret for Venstre.
For Magne var speidararbeidet eit kall. Mykje tid gjekk med, og til heimen hans kom alle dei som skulle ta prøver og få rettleiing. Han var og med og arrangerte ei rekke leirar og samlingar, men då kona Marta døydde i 1969, miste han både lyst og kraft for ei tid.
