Kjartan Grimstad var ein sentral person innan det kristne organisasjonslivet i Ulstein. Han sat i soknerådet frå 1970 til 1985. I perioden 1970 til 1974 var han soknerådsleiar.
Kjartan sat i to periodar i kommunestyret for KrF frå 1972 til 1975 og 1984 til 1987. Han sat også i formannskapet. Kjartan utdanna seg som lærar og hadde si første lærargjerning på Nesjestranda frå 1958 til 1965. Han kom til Ulstein og vart realskulelærar til Ulstein ungdomskule vart reist i 1970 og 1971. Her arbeidde han fram til han pensjonerte seg i 1998, med unntak for skuleåret 1984 til 1985, då han og kona Margit studerte i byen Saint Paul i Minnesota i USA.
Kjartan Grimstad er først og fremst kjend for ein heil generasjon ungdomar som hadde ungdomshuset Fredheim og heimen til Kjartan og Margit som sine samlingsstadar. Frå tidleg på syttitalet og langt ut på åttitalet hadde han ansvaret for ungdomskveldane og bibelgruppene som var knytte til arbeidet ved Fredheim, der han bl.a. inviterte Ungdom i Oppdrag som inspirasjon for ungdomane.Han var med på å starte Alfakurs Ulstein.
Kjartan var sentral i det kristne arbeidet ikkje berre lokalt, men også regionalt og på landsplan. Han sat i fleire år i Oase-leiinga – ei kristen inspirasjons- og fornyingsrørsle for kristenfolket i Noreg.
