Einar Grimstad var fødd i Ulsteinvik og var eldst av ni syskjen. Einar var aktiv i det kristne ungdomsarbeidet knytt til Fredheim. I vaksen alder starta han det lokale bokforlaget Spor Forlag.
Einar vaks opp i ei anna tid enn i dag. Som 16 åring hadde Einar aleineansvaret for speidargutane som reiste på landsleir til Lindesnes i 1974. Den yngste guten hadde ikkje fyllt 10 år enno. Einar var aktiv i speidararbeidet i Ulstein og gjekk gradene heilt til topps og var ein periode troppsleiar.
På 1970-tallet og med sterk påverknad frå Jesus-rørsla var han med å starte musikkgruppa Salvation som fekk gjennomslag langt utover lokalmiljøet. Han sat i fleire periodar som leiar for Ulstein Kr. Ungdomslag. Einar starta også Gospelkoret som hadde si første øving 11. januar 2011..
Einar hadde ein aktiv yrkesbakgrunn som lærar, rektor og i det private næringslivet før han i desember 2005 starta Spor Forlag og gjekk inn som dagleg leiar på nyåret i 2006. Ulstein fekk med dette eit lokalt bokforlag som gav fødselshjelp, råd og vink til forfattarar med ulike bokprosjekt.
Det historiske årskriftet Levd Liv var eit av Einars viktigaste bokprosjekt som han la ned mykje arbeid i også når han kjempa mot den nådelause sjukdomen. Etter at Einar gjekk bort, tok Osberget over tidsskriftet og held fram med å gi det ut.
