Ragnhild Kriken Garnes har lagt ned eit stort arbeid med turn og rytmisk gymnastikk. Ho er som første kvinne æresmedlem i Hødd og har teke imot ei rekke prisar.
Ragnhild vart fødd i Volda og har to sysken. Ho byrja på barneturn som 4-åring og var med på turn stort sett heile tida fram til siste året på gymnas. Etter kvart vart det også trena jazzgymnastikk, og ho tok trenarutdanning. Ho utdanna seg til lærar med fordjuping i engelsk og kroppsøving. I 1972 gifte ho seg med ulsteiningen Odd Idar Garnes. Dei har tre born.
Ragnhild byrja som lærar ved Ulstein ungdomsskule i 1973. I 1978 starta ho turngruppa, IL Hødd saman med Randi Dimmen, Oddbjørg Walaunet og nokre til. Då hadde ho vore trenar for dametrim i trimgruppa sidan 1973. I turngruppa starta ho med masseparti for born – og dameturn. Etter kvart vart det litt apparatturn. I 1981 starta ho med rytmisk sportsgymnastikk, som i dag heiter rytmisk gymnastikk. Ho tok trenarutdanning og dommarutdanning i RG – og har halde på som trenar i RG fram til sommaren 2014. Samtidig var ho forbundsdommar i mange år og dømde Norgescup og NM. Ho har trena fram mange flinke gymnastar og fått gode resultat.
Ragnhild er framleis med på dameturn eller veteranturn og skal saman med Ann Lisbeth Bjerkvik frå Hareid delta på Gymnastrada (eit turnstemne med deltakarar frå heile verda) i Helsinki i juli 2015.
I 2004 vart ho utnemnd til æresmedlem i Hødd som første kvinne. Ho har fått Møre og Romsdal gymnastikk- og turnkrets si kretsfortenestemedalje i både sølv og gull, Idrettskretsen sin innsatspokal for administrativ innsats (2000) og Kulturprisen i Ulstein (2000).
